2 Sam. 9 - Bhaibheri Rakachena muChindau

Dhavhidha naMefibhoshethi

¹ Dhavhidha wakabvunza echiti, “Uchiyo here wakasara wemhatso yaSauri, uwo wendingaonisa nyasha ngendaa yaJonathani?”

² Zvino waiyapo muranda wemhatso yaSauri, zina rake ndiZibha, naye wakadaidzwa kunaDhavhidha. Mambo wakati kwaari, “Ndiwe Zibha here?” Naye wakati, “Muranda wako ndiye!”

³ Mambo wakati, “Uchipo here umweni wemhatso yaSauri wakasara uwo wendingaonisa nyasha dzaMwari?” Zibha wakati kunamambo, “Kwasara mukororo waJonathani, wakaremara tsoka dzake.”

⁴ Mambo wakati kwaari, “Uri pari?” Zibha wakati kunamambo, “Ringira, uri mumhatso yaMakhiri, mukororo waAmieri muRodhebha.”

⁵ Zvino mambo Dhavhidha wakatuma vanhu koomutora kubva kumhatso yaMakhiri, mukororo waAmieri paRodhebha.

⁶ Mefibhoshethi, mukororo waJonathani, mukororo waSauri wakauya kunaDhavhidha, wakawa ngehope yake, mukuremeredza. Dhavhidha wakati, “Mefibhoshethi!” Wakapingura, “Ringira muranda wako ndiye.”

⁷ Dhavhidha wakati kwaari, “Usatya, ngokuti ngegwinyiso ndinozoonisa nyasha kwouri ngendaa yaJonathani baba ako; ndinozopetudza kwouri nyika yeshe yaSauri baba mukuru ako, newe unozodya chingwa patafura rangu nguva dzeshe.”

⁸ Naye wakagwadama pashi, akati, “Muranda wako uri chiinyi kuti uringire imbwa yakafa yakadai ndini?”

⁹ Zvino mambo wakadaidza Zibha, muranda waSauri, wakati kwaari, “Ndapa kunomuzukuru wamambo wako zveshe zvaSauri nezvemhatso yake yeshe.

¹⁰ Iwewe nevakororo vako, nevaranda vako, munozomurimira munda, unozomuunzira michero, kuti muzukuru wamambo wako aone zvokudya; asi Mefibhoshethi muzukuru wamambo wako unozodya kudya patafura rangu mukuwo weshe.” Zvino Zibha waiya nevakororo gumi navashanu navaranda makumi mairi.

¹¹ Zvino Zibha wakati kunamambo, “Muranda wako unozoita kudai ngezvaaronza mambo wangu kumuranda wake.” Mefibhoshethi wakadya patafura raDhavhidha kudai ngoumwe wevakororo vamambo.

¹² Mefibhoshethi waiya nomukororo mudoko, zina rake ndiMikha. Navo veshe vaigara mumhatso yaZibha vakaita varanda vaMefibhoshethi.

¹³ Ndizvo Mefibhoshethi wakagara muJerusarema, ngokuti waidya nguva dzeshe patafura ramambo. Zvino waiya akaremara tsoka dzake dzeshe.