2 Sam. 7 - Bhaibheri Rakachena muChindau

Izwi raNathani kunaDhavhidha

¹ Zvino apo mambo paaiya akagara mumhatso yake, naMambo Mwari waiya amupa kuzorora kubva kumagaa ake eshe akamutendenedza,

² mambo wakati kunaNathani muprofeti, “Wona zvino, inini ndinogara mumhatso yakaakwa ngemisidhari, asi bhokisi rechitenderano chaMwari rinogara mukati mwemachira etende.”

³ Nathani wakati kunamambo, “Enda, uite zveshe zviri mumwoyo mwako, ngokuti Mambo Mwari unewe.”

⁴ Asi ngouhwo usiku izwi raMambo Mwari rakauya kunaNathani rechiti,

⁵ “Enda, uronzere muranda wangu Dhavhidha, kuti unoronza izvi Mambo Mwari, ‘Ndiwe iwewe unozondiakira mhatso yokugaramwo here?

⁶ Inini andizi kumbogara mumhatso kubvira pazuva rendakakwidza vana vaIsuraeri kubva Egipite metsa nanyamashi, asi ndaihamba ndiri mutende nomuthabhenakeri.’

⁷ Mundau dzeshe dzendakahamba pakati pevana veshe vaIsuraeri, ndakaereketa izwi here kunoumwe wevatungamiriri verudzi rwaIsuraeri, avo vendakapanga kuusha vanhu vangu vaIsuraeri, ndechiti, ‘Ngenyi musikandiakiri mhatso yemiti yemisidhari?’

⁸ Ndizvo zvino unozoti kumuranda wangu Dhavhidha, ‘Unoronza izvi Mambo Mwari wehondo: ndakakutora kubva kumafuro emakwai, nokubva kooteera makwai, kuita mutongi padera pevanhu vangu Isuraeri;

⁹ neni ndaiya newe kundau dzeshe dzewakahamba, ndakauraya magaa ako eshe kubva pamberi pako; ndinozokuitira zina guru rakadai ngemazina evanhu vakuru vari munyika.

¹⁰ Neni ndinozoemesa ugaro hwevanhu vangu Isuraeri, ndivasime, kuti vagare muugaro huri hwavo, kuti vasachazobvazve; nevaiti vezvakashata avachazovatambudzizve kudai ngekaretu,

¹¹ kubvira panguva yendakaemesa vatongi kuti vatonge padera pevanhu vangu Isuraeri; neni ndinozokupa kuzorora kubva kumagaa ako eshe. Zvakanyadaro Mambo Mwari unoronza kwouri kuti Mambo Mwari unozokuakira mhatso.

¹² Naapo mazuva ako akwana, newe unozoata namadzibaba ako, ndinozoemesa mubarirwana wako unoteera sure kwako, uwo wounozobereka, neni ndinozogwinyisa umambo hwake.

¹³ Ndiye unozoakira zina rangu mhatso, neni ndinozogwinyisa dendemaro roumambo hwake mhera nariini.

¹⁴ Ndinozoita baba ake, naye unozoita mukororo wangu. Naapo paanoita zvakashata, ndinozomujezisa ngendonga yevanhu, nemishwapu yevana vevanhu.

¹⁵ Asi nyasha dzangu adzizobvi kwaari, kudai ngezvendakadzidusa kubva kunaSauri, uwo wendakadzinga kubva pamberi pako.

¹⁶ Mhatso yako noumambo hwako zvinozogwinyiswa pamberi pako mhera nariini.’ ”

¹⁷ Kudai ngemazwi aya eshe, nokudai ngeichi chioniso cheshe, Nathani wakaereketa kunaDhavhidha.

Mukumbiro waDhavhidha woKubonga

¹⁸ Zvino mambo Dhavhidha wakapotera, akagara pamberi paMambo Mwari, naye wakati, “Ndiri anani, A Mambo Mwari, Mwari? Mhatso yangu chiinyi, kuti iwewe undiunze pano?

¹⁹ Neichi chaiya chiro chidoko mukuona kwako, A Mambo Mwari, Mwari; wakaereketa ngemhatso yomuranda wako ngomukuwo wakareba uchauya. Ichi ngachiite kupangwa kwevanhu, A Mambo Mwari, Mwari!

²⁰ NaDhavhidha ungacharonzenyi kwouri? Ngokuti iwewe Mambo Mwari, Mwari unozia muranda wako.

²¹ Ngendaa yechigondiso chako, nokudai ngokuda kwomwoyo wako, iwewe wakaita izvi zveshe zvikurutu, kuti muranda wako azvizie.

²² Ndizvo uri mukuru, A Mambo Mwari, Mwari; ngokuti akunazve wakadai ndiwe, akunazve Mwari umweni ngepabanze pako, kudai ngeizvo zveshe zvetakazwa ngenzee dzedu.

²³ Ndiani wakadai ngavanhu vako Isuraeri? Riripo here dzinza rimweni panyika Mwari waro wakaenda kooriripira kuti vaite vanhu vake, nokudziitira zina pachake, nokumuitira zviro zvikuru zvinotyisa, ngokudusa kubva pamberi pavanhu vako, vewakaripira kubva Egipite, madzinza nezvimwari zvawo.

²⁴ Newe wakagwinyisa vanhu vako Isuraeri kuti vaite vanhu vako mhera nariini; newe, Mambo Mwari, wakaita Mwari wavo.

²⁵ Nazvino, A Mambo Mwari, Mwari, gwinyisa mhera narinii izwi rewakaereketa ngendaa yomuranda wako, nendaa yemhatso yake, uite kudai ngezvewakagondisa.

²⁶ Ndizvo zina rako rinozokuriswa mhera nariini, rinoti, ‘Mambo Mwari wehondo uri Mwari padera paIsuraeri;’ nemhatso yomuranda wako Dhavhidha, kuti igwinyiswe pamberi pako.

²⁷ Ngokuti iwewe, Mambo Mwari wehondo, Mwari waIsuraeri, wakadzionisa kumuranda wako, wechiti, ‘Ndinozomuakira mhatso;’ ndizvo muranda wako wakagwinyiswa mumwoyo mwake kukumbira mukumbiro uyu kwouri.

²⁸ Nazvino, A Mambo Mwari, Mwari, ndiwe Mwari, nemazwi ako anegwinyiso, newe wakagondisa ichi chiro chakanaka kunomuranda wako.

²⁹ Ndizvo zvino, ngazvikunakire kuti ufumise mhatso yomuranda wako, kuti igare iripo pamberi pako mhera nariini; ngokuti iwewe, Mambo Mwari, Mwari wakazviereketa, nemhatso yomuranda wako ngaifumiswe ngechifumiso chako mhera nariini.”