2 Sam. 5 - Bhaibheri Rakachena muChindau

Dhavhidha Unoita Mambo waIsuraeri naJudha

¹ Zvino madzinza eshe aIsuraeri akauya kunaDhavhidha muHebroni vechiti, “Ringira, tiri magodo ako nenyama yako.

² Ngokuti panguva yakapinda, apo Sauri ari mambo padera pedu, ndiwe wakatungamirira nokuunzazve vaIsuraeri. Mambo Mwari wakati kwouri, ‘Ndiwe unozoita muushi wevanhu vangu Isuraeri, iwewe unozoita nduna padera paIsuraeri.’ ”

³ Ndizvo vakuru veshe vaIsuraeri vakauya kunamambo muHebroni; namambo Dhavhidha wakaita chitenderano navo muHebroni pamberi paMambo Mwari, navo vakadzodza Dhavhidha kuita mambo padera paIsuraeri.

⁴ Dhavhidha waiya aanemakore makumi matatu apo paakatanga kutonga, naye wakatonga makore makumi marongomuna.

⁵ MuHebroni wakatonga padera paJudha makore manomwe nemwedzi mitanhatu; nomuJerusarema wakatonga makore makumi matatu namatatu padera paIsuraeri naJudha.

⁶ Mambo nevanhu vake vakaenda Jerusarema koorwa nevaJebhusi, vaigara munyikamwo, avo vakaereketa kunaDhavhidha vechiti, “Auzopindi muno, kunyazwi mapofu nezvirema vanozokupetudza sure,” vechipinimidza kuti Dhavhidha aana simba rokupindamwo.

⁷ Zvakanyadaro Dhavhidha wakanyisa masvingo eZioni, iro ndiro dhorobha raDhavhidha.

⁸ Dhavhidha wakati ngeiro zuva, “Kunyazwi ndiani unouraya vaJebhusi, ngaakwire ngomugero wemvura auraye zvirema nemapofu, avo vanonyenywa ndiDhavhidha.” Ndizvo vanoti, “Mapofu nezvirema avazopindi mumhatso.”

⁹ Dhavhidha wakagara mumasvingo, wakaridaidza kuti dhorobha raDhavhidha. Dhavhidha wakaaka dhorobha kutendenedza kubvira paMiro kupinda mukati.

¹⁰ NaDhavhidha wakaramba echikura, kuita mukuru, ngokuti Mambo Mwari, Mwari wehondo, waiya naye.

¹¹ Hiramu mambo weThire wakatuma nhumwa kunaDhavhidha nemiti yemisidhari navatsetsi nevaaki, vakaakira Dhavhidha mhatso.

¹² Dhavhidha wakazia kuti Mambo Mwari wakamuemesa kuita mambo padera paIsuraeri, nokuti wakakudza umambo hwake, ngendaa yevanhu vake Isuraeri.

¹³ Dhavhidha wakadzitorerazve mabunha nevakadzi vamweni kubva Jerusarema, ngesure auya kubva Hebroni; naye wakaberekerwa vakororo nevanasikana.

¹⁴ Naaya ndiwo mazina eavo vaakaberekerwa muJerusarema: ndiShamua, Shobhabhi, Nathani, Soromoni,

¹⁵ Ibhari, Erishua, Nefegi, Jafia,

¹⁶ Erishama, Eriadha naErifereti.

Kunyiswa kweVaFiristia

¹⁷ Naapo vaFiristia vazwa kuti Dhavhidha waiya adzodzwa kuita mambo padera paIsuraeri, veshe vaFiristia vakakwira kootsvaka Dhavhidha. Asi Dhavhidha wakazvizwa, wakadzaka murusvingo.

¹⁸ Zvino vaFiristia vakauya, vakapararira mubani reRefaimu.

¹⁹ Dhavhidha wakabvunza Mambo Mwari echiti, “Ndinozokwira here koorwa nevaFiristia? Unozovapira munyara dzangu here?” Mambo Mwari wakati kunaDhavhidha, “Kwireyo; ngokuti ngegwinyiso ndinozopira vaFiristia munyara dzako.”

²⁰ Ndizvo Dhavhidha wakaguma paBhaari-pherazimu, naDhavhidha wakavanyisapo. Wakati, “Mambo Mwari wapwanya magaa angu pamberi pangu, kudai ngokupwanya kwemvura.” Ndizvo wakadudza zina rendau iyo kuti, Bhaari-pherazimu.

²¹ VaFiristia vakasiyapo miedzaniso yavo yokudira, naDhavhidha navanhu vake vakaitora.

²² VaFiristia vakakwirazve, vakapararira mubani reRefaimu.

²³ Naapo Dhavhidha wakabvunza Mambo Mwari, akati, “Auzokwiriyo. Unozotenderera ngesure kwavo, nokurwisana navo pakaringirana nemiti yemibharsamu.

²⁴ Naapo mwoozwa kutinhira kwokuhamba padera pemiti yemibharsamu, zvino ngwarai; ngokuti zvino Mambo Mwari watanga pamberi penyu kuuraya hondo yevaFiristia.”

²⁵ Dhavhidha wakaita kudai ngezvaakapangwa ndiMambo Mwari; wakabaya vaFiristia kubvira Gebha kugumira Geza.