2 Sam. 3 - Bhaibheri Rakachena muChindau

¹ Kwaiyapo kurwa mukuwo wakareba pakati pemhatso yaSauri neyaDhavhidha. Dhavhidha wakaangirira kuanesimba, asi mhatso yaSauri yakaangirira kupera simba.

Vakororo vaDhavhidha

² Dhavhidha wakaberekerwa vakororo muHebroni: wedangwe waiya Amunoni, wakaberekwa ndiAhinoamu muJezireeri;

³ wechipiri waiya Khireabhi, waAbhigairi shirikadzi yaNabhari muKharmeri; wechitatu waiya Abhusaromu mukororo waMaakha, mwanasikana waTharimai mambo weGeshuri;

⁴ wechina Adhonija mukororo waHagithi; wechishanu Shefatia mukororo waAbhithari;

⁵ nowechitanhatu Ithreamu waEgira mukadzi waDhavhidha. Ava vakabarirwa Dhavhidha muHebroni.

Abhina Unobatana naDhavhidha

⁶ Naapo kwaiyapo kurwa pakati pemhatso yaSauri neyaDhavhidha, Abhina wakadzigwinyisa kurwira mhatso yaSauri.

⁷ Zvino Sauri waiya nebunha, zina raro raizwi Rizipha, mwanasikana waAia. NaIshibhoshethi wakati kunaAbhina, “Wapindirenyi kubunha rababa angu?”

⁸ Ndizvo Abhina wakanyangadzwa kakurutu ngemazwi aIshibhoshethi, wakati, “Inini ndiri soro reimbwa here, inorwira Judha? Nyamashi ndinoangira kuitira nyasha mhatso yaSauri baba ako, nokunehama dzake, nokunevangani vake, ndisikazi kukupira munyara dzaDhavhidha; asi unondiitira ndaa nyamashi ngouyu mukadzi.

⁹ Ndizvo Mwari ngaaite kunaAbhina nokututsirazve kwezviri! Ngokuti kudai ndisikaitiri Dhavhidha izvo zvaakapika Mambo Mwari kwaari,

¹⁰ kudusa umambo kubva kumhatso yaSauri, nokuemesa dendemaro raDhavhidha padera paIsuraeri nepadera paJudha, kubvira Dhani kuguma Bheerishebha.”

¹¹ NaIshibhoshethi aazi kupingurazve izwi kunaAbhina, ngokuti waimutya.

¹² Abhina wakatuma nhumwa kunaDhavhidha muHebroni echiti, “Nyika ngeyani? Ita chitenderano chako neni; ringira, nyara yangu inozokudetsera kuunza veshe vaIsuraeri kwouri.”

¹³ Naye wakati, “Zvakanaka; ndinozoita chitenderano newe. Asi chiro chimwe chendinoda kubva kwouri, ngechokuti auzooni hope yangu usati waunza Mikhari mwanasikana waSauri, apo wouya koona hope yangu.”

¹⁴ Zvino Dhavhidha wakatuma nhumwa kunaIshibhoshethi mukororo waSauri echiti, “Ndipe mukadzi wangu Mikhari, uwo wendakadzitengera ngezana remakanda emafumho evaFiristia.”.

¹⁵ Ishibhoshethi wakatumira, koomutora kubva kunomwamuna wake Pharitieri mukororo waRaishi.

¹⁶ Asi mwamuna wake wakateera ngesure kwake echimuchemera metsa vaguma Bhahurimu. Zvino Abhina wakati kwaari, “Chihwirira kanyi!” Naye wakahwirira.

¹⁷ Abhina wakatumira izwi kuvakuru vaIsuraeri echiti, “Mwakada Dhavhidha mukuwo wakapinda kuti aite mambo padera penyu.

¹⁸ Ndizvo zvino itai; ngokuti Mambo Mwari wakagondisa ndiDhavhidha echiti, ‘Ngenyara yomuranda wangu Dhavhidha ndinozoponesa vanhu vangu Isuraeri kubva kunyara dzevaFiristia, nomunyara dzemagaa avo eshe.’ ”

¹⁹ Abhina wakaereketazve munzee dzaBhenjamini; zvino Abhina wakaenda kooronzera Dhavhidha muHebroni izvo zveshe zvevakatenderana kuita vaIsuraeri nevemhatso yeshe yaBhenjamini.

²⁰ Naapo Abhina wakaguma Hebroni kunaDhavhidha, echihamba nevanhu makumi mairi. Dhavhidha wakanasirira Abhina dhiri, nevanhu vaiya naye.

²¹ Abhina wakati kunaDhavhidha, “Ndomiruka ndiende ndiunganidze vaIsuraeri veshe kunamakosi wangu mambo, kuitira kuti vaite chitenderano newe, nokuti utonge padera pavo veshe kudai ngezvinodikanwa ngomwoyo wako.” Ndizvo Dhavhidha wakaendesa Abhina, naye wakaenda ngokunyarara.

Abhina Unourawa

²² Zvino, varanda vaDhavhidha naJoabhi vakauya kubva koochakata, vakaunza zvakachakatwa zvizhinji navo. Asi Abhina waiya asiyana naDhavhidha muHebroni, ngokuti waiya amuendisa naye wakaenda mukunyarara.

²³ Naapo Joabhi nehondo yaiya naye yauya, vakaronzera Joabhi vechiti, “Abhina mukororo waNeri wakauya kunamambo, naye wakamuendesa, wakaenda mukunyarara.”

²⁴ Zvino Joabhi wakaenda kunamambo echiti, “Wakaitenyi? Ringira, Abhina wakauya kwouri; ngenyi wakamuendesa, kuti aende?

²⁵ Unozia kuti Abhina mukororo waNeri wakauya kookuchengedzera, nokuona kubuda kwako nokupotera kwako, nokuzia zveshe zvounoita.”

²⁶ Naapo Joabhi abuda kubva pamberi paDhavhidha, wakatuma nhumwa kuteera Abhina, vakamuunzazve kubva kuchinyuka cheSira; asi Dhavhidha aazi kuzvizia.

²⁷ Naapo Abhina apetuka Hebroni, Joabhi wakamutora kuenda naye ari ega, akaenda parutii pamusiwo wedhorobha kooereketa naye ngokufishika, naapo wakamubaya mundani. Ndizvo wakafa, ngendaa yengazi yaAsaheri hama yake.

²⁸ Ngesure, apo Dhavhidha azwa, wakati, “Inini noumambo hwangu atina ndaa pamberi paMambo Mwari mhera nariini ngendaa yengazi yaAbhina mukororo waNeri.

²⁹ Ndaa ngaiwe padera pesoro raJoabhi, nepadera pemhatso yeshe yababa ake; kusazoapo naumwe waJoabhi usikazobudisi ngazi, nokuti mapere, nokuti unotseama pamudondoro, nokuti unowa padera peshoti, nokuti unotama chingwa.”

³⁰ Ndizvo Joabhi naAbhishai hama yake vakauraya Abhina, ngokuti wakauraya hama yavo Asaheri mukurwa muGibheoni.

Kuikwa kwaAbhina

³¹ Zvino Dhavhidha wakati kunaJoabhi, nokuvanhu veshe vaiya naye, “Baurai zvokusimira zvenyu, mudzipfekese ngemachira emasaka, mucheme Abhina.” Namambo Dhavhidha emene wakateera muiri wakafa.

³² Vakaika Abhina muHebroni. Mambo wakachema yaamho ngeizwi rake gurutu paiba raAbhina; nevanhu veshe vakachema.

³³ Mambo wakachema Abhina, akati, “Wakafa Abhina kudai ngokufa kwebenzi here?

³⁴ Nyara dzako dzaiya dzisikazi kusungwa, netsoka dzako dzaiya dzisikazi kusungwa ngemanguri; kudai ngomunhu unowa pamberi pevanhu vakashata, newe wakafa ngokudaro.” Nevanhu veshe vakamuchemazve.

³⁵ Zvino vanhu veshe vakauya koonyengerera Dhavhidha kuti adye kudya, achimasikati; asi Dhavhidha wakapika echiti, “Ndizvo Mwari ngaaite kudaro kwendiri nokupinda, kudai ndechizoraira chingwa, nokuti chiro chimweni hacho zuva risati rabira!”

³⁶ Ndizvo vanhu veshe vakaona izvi, zvakavadakadza; kudai ngezviro zveshe zvaakaita mambo zvakadakadza vanhu veshe.

³⁷ Ndizvo vanhu veshe nevaIsuraeri veshe vakazia ngeiro zuva kuti kusaiya kupanga kwamambo kuuraya Abhina mukororo waNeri.

³⁸ Namambo wakati kuvaranda vake, “Amuzii here kuti muzvare, munhu mukuru, wafa nyamashi muIsuraeri?

³⁹ Nyamashi inini andina simba, kunyazwi ndinyari mambo wakadzodzwa; ava vanhu vakororo vaZeruia vakakonza kwendiri. Mambo Mwari unozounzidzira kumuiti wezvakashata kudai ngomushando wake!”