2 Sam. 24 - Bhaibheri Rakachena muChindau

Dhavhidha Unoerenga Vanhu

¹ Noushungu hwaMambo Mwari hwakabakazve kunevaIsuraeri, wakamusa Dhavhidha kuti ati kwevari, “Endai, muerenge Isuraeri naJudha.”

² Ndizvo mambo wakati kunaJoabhi nduna yehondo, uwo waiya naye, “Enda zvino, uerenge vanhu kunyika dzeshe dzaIsuraeri, kubvira Dhani metsa kuguma Bheerishebha, kuti ndizie uwandu hwavo.”

³ Asi Joabhi wakati kunamambo, “Mambo Mwari, Mwari wako ngaatutsire uwandu hwevanhu ngemazana akapetwa ngemazana, naapo madziso amakosi wangu mambo azvione! Asi ngenyi makosi wangu mambo echida kuita ichi chiro?”

⁴ Asi izwi ramambo rakanyisa Joabhi nenduna dzehondo. Ndizvo Joabhi nenduna dzehondo vakabuda kubva pamberi pamambo, kuenda kooerenga vaIsuraeri.

⁵ Vakaambuka Jorodhani, vakaemesa matende avo muAroeri, ngokumudyo kwedhorobha rinogara pakati pomubani reGireadhi, rinoringirana neGadhi nokuringirana naJaza.

⁶ Zvino vakasvika Gireadhi, nokunyika yeThatimihodheshi; vakagumazve Dhani, nokubva Dhani vakatenderera kuenda Sidhoni.

⁷ Vakaguma kumasvingo eThire, nokumadhorobha eshe evaHivhi neevaKhenani; navo vakaenda mubani raJudha metsa vakaguma Bheerishebha.

⁸ Ndizvo apo vaiya vahamba kudarika nyika dzeshe, vakauyazve Jerusarema mukupera kwemwedzi mipfumbamwe nemazuva makumi mairi.

⁹ Joabhi wakaronza uwandu hwevanhu veshe kunamambo avo vakanyorwa: muIsuraeri vaiyamwo ngwazi mazana masere emakumi emazana (800,000), vaikona kubaya ngeshoti, nevanhu vaJudha vaiya mazana mashanu emakumi emazana (500,000).

¹⁰ Asi mweya waDhavhidha wakamutambudza ngesure apo aerenga vanhu. Dhavhidha wakati kunaMambo Mwari, “Ndakashaisha kakurutu ngeizvo zvendakaita. Asi zvino, ndinokupota, Mambo Mwari, dusa kushaisha kwomuranda wako; ngokuti ndakaita ngoupenzi.”

¹¹ Naapo Dhavhidha amuka mangwanani, izwi raMambo Mwari rakaguma kunomuprofeti Gadhi, mufemberi waDhavhidha, rechiti,

¹² “Enda, wechiti kunaDhavhidha, ‘Ndizvo zvinoronza Mambo Mwari, ndinopa kwouri zviro zvitatu kuti utsanangure chimwe chokuti ndikuitire.’ ”

¹³ Ndizvo Gadhi wakauya kunaDhavhidha, akamuronzera, akati kwaari, “Kungazouya here makore matatu enzara munyika yako? Nokuti utize magaa ako mwedzi mitatu, vechikurumbirira? Nokuti kuuye nhenda inotyisa mazuva matatu munyika yako? Zvino nasa kupinimidza, uone mupinguro wendinozopa kunewakandituma.”

¹⁴ Zvino Dhavhidha wakati kunaGadhi, “Ndakadzipwa kakurutu; ngatiwire zvino munyara yaMambo Mwari, ngokuti nyasha dzake ihurutu; haiwa kuti tiwire munyara dzevanhu.”

¹⁵ Ndizvo Mambo Mwari wakatuma nhenda inotyisa padera pavaIsuraeri, kubvira mangwanani metsa kuguma mukuwo wakaemeswa; kwakafa vanhu makumi manomwe emakumi emazana (70,000) kubvira Dhani metsa kuguma Bheerishebha.

¹⁶ Asi apo ngirosi yatambanudza nyara yayo padera peJerusarema kuti iriparadze, Mambo Mwari wakakunukuka kubva mukushata ukwo, wakati kungirosi yaiuraya vanhu, “Zvakwana, pfinyisa zvino nyara yako.” Ngirosi yaMambo Mwari zvino yaiya yaapandau yembuwa yaArauna muJebhusi.

¹⁷ Naapo Dhavhidha aona ngirosi iyo yechiuraya vanhu, wakati kunaMambo Mwari, “Ndashaisha inini ndega, inini ndega ndakaita zvakashata; asi aya makwai akaitenyi? Ndinokupota kuti nyara yako ngaiwe padera pangu, nepadera pemhatso yababa angu.”

¹⁸ Ngeiro zuva Gadhi wakauya kunaDhavhidha, akati kwaari, “Kwira, uakire Mambo Mwari arita pandau yokupurira yaArauna muJebhusi.”

¹⁹ Dhavhidha kudai ngokuronza kwaGadhi wakakwira kudai ngezvaakapangwa ndiMambo Mwari.

²⁰ Naapo Arauna aringira kubani, wakaona mambo nevaranda vake vechikwedzera kwaari; Arauna wakabuda, akakotamisa hope yake pashi pamberi pamambo.

²¹ Arauna wakati, “Ngenyi zvino makosi wangu mambo echiuya kunomuranda wake?” Dhavhidha wakati, “Kutenga kubva kwouri ndau yako yokupurira, kuti ndiakirepo Mambo Mwari arita ngendaa yenhenda inotyisa, kuti ibve pakati pevanhu.”

²² Zvino Arauna wakati kunaDhavhidha, “Makosi wangu mambo ngaatore aite mudiro chinooneka chakanaka kwaari; dziripano kabi dzokuita mudiro wokupisha, nezviro zvokupura, nezviro zvimweni zvinoshandiswa ngemakabi, zviitwe huni.

²³ Zveshe izvi zviro Arauna unopa kunamambo.” NaArauna wakati kunamambo, “Mambo Mwari, Mwari wako ngaakuashire.”

²⁴ Asi mambo wakati kunaArauna, “Haiwa, asi ndinozozvitenga kwouri ngomutengo wazvo; ngokuti andizopiri mudiro wokupisha kunaMambo Mwari, Mwari wangu, weizvo zvisikazi kundidaidzira mutengo.” Ndizvo Dhavhidha wakatenga ndau yokupurira, nekabi ngemakumi marongomuna ezvigurwa zvesirivha.

²⁵ Dhavhidha wakaakirapo Mambo Mwari arita, wakapira midiro yokupisha nemidiro yokuiyanisa. Ndizvo Mambo Mwari wakapingura mikumbiro ngendaa yenyika, nenhenda inotyisa yakapera muIsuraeri.