2 Sam. 23 - Bhaibheri Rakachena muChindau

Mazwi oKugumisira aDhavhidha

¹ Zvino aya ndiwo mazwi okugumisira aDhavhidha: “Dhavhidha mukororo waJesi unoti, munhu uwo waakamirudza Mwari, wakadzodzwa waMwari waJakobe; muembi wezvakanaka waIsuraeri.

² Mweya waMambo Mwari unoereketa kubudikidza ndini; izwi rake riri parurumi rwangu.

³ Mwari waIsuraeri waereketa, Buwe raIsuraeri rakaereketa kwendiri rechiti, ‘Uwo unotonga padera pevanhu ngokururamisa, echitonga ngokutya Mwari,

⁴ wakadai ngokujeka kwemangwanani, kudai ngezuva rinojeka mangwanani asina makore, kudai ngemvura inomerera nduhwe yomwenje, mukujeka ngesure kwokunaya kwemvura.’

⁵ Mhatso yangu aizi kudaro kunaMwari here? Ngokuti wakaita chitenderano neni chinoti mhera nariini, chakaemeswa muzviro zveshe zvinegwinyiso. Ngokuti urwo ndirwo ruponeso rwangu nokudisisa kwangu kweshe, aazi kuita kuti zviitike here?

⁶ Asi vanhu veshe vasikadi Mwari vanozodai ngeminzwa inorashwa, ngokuti aingabatwi ngenyara.

⁷ Kuvabata munhuwo unosisira kushandisa simbi rechibato chomukhondo. Navo vanozopishwa yaamho ngomuriro pandaupo.”

Nduna Dzinembiri dzaDhavhidha

⁸ Aya ndiwo mazina engwazi dzaDhavhidha: Joshebhashebhethi muTakhemoni waiya nduna huru yenduna nhatu; wakamirudza mukhondo wake kurwa nevanhu mazana masere (800), akavauraya chikamwe.

⁹ Pasinde pake pakati pevatatu waiteerwa ndiEreaza mukororo waDhodho, mukororo waAhohi. Waiya umwe wengwazi nhatu dzaiya naDhavhidha ngomukuwo wevakashoora vaFiristia avo vaiya vakaungana pandau imweyo kurwa. Vamuna vaIsuraeri vakapetuka sure,

¹⁰ asi wakamiruka. Wakabaya vaFiristia metsa nyara yake yakapera simba, kunyazwi nyara yake yakakakatira shoti. Mambo Mwari wakavaunzira kunyisa kukuru ngeiro zuva. Zvino vanhu vakapetuka kwaari, asi kwega kuunganidza zvevakafa.

¹¹ Waiteera pasinde pake ndiShama mukororo waAgee muHarari. VaFiristia vakaungana pamwepo paRehi. Waiyapo munda wakazara ngenyemba; navanhu vehondo vaIsuraeri vakatiza vaFiristia.

¹² Asi Shama wakaema pakati pemunda uyo, akaurwira, akauraya vaFiristia; naMambo Mwari wakaunza kunyisa kukuru.

¹³ Vatatu venduna makumi matatu vakadzaka, vakaguma koobatana naDhavhidha pabako rinozwi Adhuramu ngomukuwo wokukukura; naapo chiunga chevaFiristia chakadzimika matende acho mubani reRefaimu.

¹⁴ Dhavhidha waiya mumarusvingo ngouwo mukuwo, nevarwi vevaFiristia vaiya muBhetherehema.

¹⁵ Dhavhidha wakadisisa akati, “A kudai umwe angandimwisa mvura yechinyuka cheBhetherehema, chiri ngepamusiwo!”

¹⁶ Zvino ngwazi nhatu dzakahamba ngepakati pehondo yevaFiristia, vakachera mvura pachinyuka cheBhetherehema chaiya pamusiwo, vakaitora, vakaiunza kunaDhavhidha. Asi aazi kuimwa, asi wakaidururira kunaMambo Mwari,

¹⁷ ngokuti wakati, “Mambo Mwari, musatendera kuti ndiite ichi chiro. Ndingamwa ngazi yevanhu here, avo vakaenda koodzipinza mungozi yokupona kwavo?” Ndizvo ngokudaro aazikuimwa. Izvi zviro ndizvo zvakaitwa ngaavo vatatu vaiya ngwazi.

¹⁸ Zvino Abhishai munun'una waJoabhi mukororo waZeruia, waiya nduna huru pakati pevatatu. Ngomukhondo wake wakarwa nemazana matatu (300) nokuvauraya, wakaita mbiri pakati pevatatu.

¹⁹ Waiya akapindisisa kuita mbiri pakati pevatatu. Ndizvo wakaita nduna huru yavo; asi aazi kuedzana nevatatu vokutanga.

²⁰ Bhenaia mukororo waJehoiadha mukororo womunhu waiya ngwazi weKabhizeeri, uwo waiya muiti wezviito zvakakura; wakauraya ngwazi mbiri dzeMoabhi. Wakadzakawo akauraya mhondoro mukati mwehunza ngezuva rakawa chando.

²¹ Naye wakauraya muEgipite, munhu wakanaka kuringirika. MuEgipite waiya nomukhondo munyara yake, asi Bhenaia wakaenda koorwa naye anendonga, akabvuka mukhondo kubva munyara yomuEgipite, akamuuraya ngomukhondo wakewo.

²² Izvi ndizvo zviro zvakaitwa ndiBhenaia mukororo waJehoiadha, wakaita mbiri huru pakati pevatatu.

²³ Wakavapinda ngoungwazi pakati peavo makumi matatu, asi aazi kuedzana nengwazi nhatu. NaDhavhidha wakamuemesa kuita nduna padera pevarindi vake.

²⁴ Pakati pemakumi matatu vaiyapo ava: Asaheri, munun'una waJoabhi, Erihanani mukororo waDhodho weBhetherehema,

²⁵ Shama muHarodhi, Erika muHarodhi,

²⁶ Herezi muPhariti, Ira mukororo waIkeshi muThekoa,

²⁷ Abhieza muAnathothi, Mebhunai muHushathi,

²⁸ Zarimoni muAhohi, Maharai weNetofa,

²⁹ Herebhi mukororo waBhaana, munhu weNetofa, Ithai mukororo waRibhai, uwo wakabva Gibhea, wevana vaBhenjamini,

³⁰ Bhenaia muPhirathoni, Hidhai wemikova yeGaashi,

³¹ Abhiaribhoni muAbhathi, Azimavhethi muBhahurimu,

³² Eriabha muShaaribhoni, vakororo vaJasheni, naJonathani,

³³ mukororo waShama muHarari, Ahiamu mukororo waShara muHarari,

³⁴ Erifereti mukororo waAhasibhai muMaakhathi, Eriamu mukororo waAhithoferi muGiro,

³⁵ Hezro muKharmeri, Phaarai muAbha,

³⁶ Igari mukororo waNathani muZobha, Bhani muGadhi,

³⁷ Zereki muAmoni, Naharai muBheerothi, mungwariri wezvokurwa zvaJoabhi mukororo waZeruia,

³⁸ Ira muIthira, Garebhi muIthira,

³⁹ Uria muHiti, makumi matatu nevanomwe pamwepo.