2 Sam. 21 - Bhaibheri Rakachena muChindau

Dzinza raSauri Rinourawa

¹ Zvino kwaiyapo nzara ngomukuwo waDhavhidha makore matatu anoteererana; naDhavhidha wakabvunza kunaMambo Mwari. Mambo Mwari wakamupingura, akati, “Ngendaa yaSauri nendaa yengazi yemhatso yake, ngokuti wakauraya vaGibheoni.”

² Ndizvo mambo wakadaidza vaGibheoni, wakati kwevari. (Zvino vaGibheoni vaiya vasiri vevana vaIsuraeri, asi vaiya mibarirwana yavaAmoni vakasara; kunyazwi vana vaIsuraeri vaiya vakapika mhiko kuvaponesa, Sauri wakaedza kuvauraya veshe mukutsamwirira kwake kuvana vaIsuraeri nevaJudha.)

³ NaDhavhidha wakati kuvaGibheoni, “Chiinyi chendingamuitira, nokumuripira ndicho kuti mufumise nhaka yaMambo Mwari?”

⁴ VaGibheoni vakati kwaari, “Atizoashiri sirivha nokuti mukore kubva kunaSauri nokuti kunevemhatso yake; haiwa, akusikuda kwedu kuti kuuraiwe naumwe muIsuraeri.” Wakati, “Chiinyi icho chomunoronza, ndicho chendinozomuitira?”

⁵ Navo vakapingura mambo vechiti, “Uwo munhu wakatiuraya, nowakaronga kutiparadza kuti isusu tisaa nendau yokugara munyika dzaIsuraeri,

⁶ ngatipuwe vakororo vake vanomwe, kuti tivaturike pamberi paMambo Mwari muGibheoni pamutunhu waMambo Mwari.” Mambo wakati, “Ndinozovapira kwomuri.”

⁷ Asi mambo wakaponesa Mefibhoshethi, mukororo waJonathani, mukororo waSauri, ngendaa yemhiko yevakapikirana Dhavhidha naJonathani, mukororo waSauri pamberi paMambo Mwari.

⁸ Mambo wakatora vakororo vairi veRizipha mwanasikana waAia, vaakaberekera Sauri ndiArimoni naMefibhoshethi; navakororo vashanu vaMerabhi mwanasikana waSauri, vaakaberekera Adhirieri mukororo waBharizirai muMehorathi.

⁹ Wakavapira munyara dzevaGibheoni, navo vakavaturika pamutunhu pamberi paMambo Mwari. Veshe vanomwe vavo vakaurawa pamwepo. Vakaurawa ngemazuva okutanga kukukura, mazuva okutanga kukukurwa kwebhari.

¹⁰ Zvino Rizipha mukunda waAia wakatora jira resaka, wakadzichingira padera poruware kubvira pakatangira kukukura metsa vanaiwa ngemvura yakabva mudenga; aazikutendera shiri dzomudenga kuti dzimate padera pavo masikati nezvikara zvomushango usiku.

¹¹ Naapo Dhavhidha aronzerwa izvo zvakaitwa ndiRizipha mwanasikana waAia, bunha raSauri,

¹² Dhavhidha wakaenda, akatora magodo aSauri nemagodo omukororo wake Jonathani kubva kuvamuna vaJabheshigireadhi, avo vaiya vakaaba kubva mupato reBhethishani, apo paaiya akaturikwa ngevaFiristia, mukuurawa kwake muGiribhoa.

¹³ Wakaunza kubvayo magodo aSauri naaJonathani mukororo wake; navo vakaunganidza magodo aavo vaiya vakaturikwa.

¹⁴ Vakatsira magodo aSauri naaJonathani mukororo wake munyika yaBhenjamini muZera, muiba raKishi baba ake; vakaita zveshe zvevakapangwa ndimambo. Ngesure kweizvo Mwari wakaitira nyasha nyika.

Hondo neMagakanyara eVaFiristia

¹⁵ VaFiristia vakarwazve nevaIsuraeri; naDhavhidha wakadzaka navaranda vake. Vakarwa nevaFiristia, naDhavhidha wakapera simba.

¹⁶ Ishibhibhenobhi, umwe wevakororo vemagakanyara, kurema kwomukhondo wake kwaida kuita makhirogramu ethusi matatu nehafu, akapakatira shoti itsva, wakapinimidza kuti ungauraya Dhavhidha.

¹⁷ Asi Abhishai mukororo waZeruia wakamuponesa, akarwisa muFiristia, akamuuraya. Zvino vanhu vaDhavhidha vakapika kwaari vechiti, “Auchazobudizve kuenda nesu kuhondo, kuti kusazodzima kujeka kwaIsuraeri.”

¹⁸ Ngesure kweizvi kwakarwiwa hondo nevaFiristia muGobhi; zvino Sibhekhai muHushathi wakauraya Safi, uwo waiya umwe wevakororo vemagakanyara.

¹⁹ Zvino kwakaapozve hondo nevaFiristia muGobhi, naErihanani mukororo waJaareoregimu muBhetherehema wakauraya munun'una waGoriathi muGithi, uwo waiya nechibato chomukhondo wake chakadai ngomuti womuruki.

²⁰ Yakaapozve hondo muGathi, apo paiya nomunhu wakarebesa gakanyara, uwo waiya nezvinwe zvitanhatu munyara dzake, netsoka dzeshe dzaiya nemakunwe matanhatu, makumi mairi nazvirongomuna pamwepo; naye waiya mubarirwana wemagakanyara.

²¹ Naapo ashoora vaIsuraeri, Jonathani mukororo waShimei mukoma waDhavhidha wakamuuraya.

²² Naava varongomuna vaiya mibarirwana yemagakanyara muGathi; vakaurawa ngenyara yaDhavhidha nenyara dzavaranda vake.