2 Sam. 20 - Bhaibheri Rakachena muChindau

Kumukira kwaShebha

¹ Zvino waiyapo munhu wakashata, zina rake raizwi Shebha, mukororo waBhikhiri, muBhenjamini. Wakaridza gwama, echidaidzira echiti, “Atina chikoaniswa kunaDhavhidha, zve atina nhaka kunomukororo waJesi! Pararirai mweshe umwe ngaumwe kutende rake, A Isuraeri!”

² Ndizvo vamuna veshe vaIsuraeri vakarekera kuteera Dhavhidha, vakateera Shebha mukororo waBhikhiri; asi vamuna vaJudha vakateera mambo wavo kubvira Jorodhani metsa kuguma Jerusarema.

³ Dhavhidha wakauya kumhatso yake Jerusarema; namambo wakatora mabunha ake gumi, avo vaakasiya kungwarira mhatso, wakavakonyera mumhatso yakangwarirwa, akavapa kudya, asi aazi kupotera kwevari. Ndizvo vakakonyerwa metsa zuva rokufa kwavo, vechigara muushirikadzi.

⁴ Zvino mambo wakati kunaAmasa, “Ndiunganidzire vamuna vekwaJudha mumazuva matatu, newe unozoapowo pachako.”

⁵ Ndizvo Amasa wakaenda koounganidza vamuna vekwaJudha; asi wakanonoka metsa zuva rakapinda iro raakaemeserwa.

⁶ Dhavhidha wakati kunaAbhishai, “Zvino Shebha mukororo waBhikhiri unozotitambudza kakurutu kupinda kutambudza kwaakaita Abhusaromu; tora zvino varanda vamambo wako, umurumbirire ngokuti pamweni ungapinda mumaguta akashosherwa, akatitiza.”

⁷ Vamuna vaJoabhi nevaKherethi, nevaPherethi, nevanhu veshe vari ngwazi vakabuda kubva Jerusarema, vakarumbirira Shebha mukororo waBhikhiri.

⁸ Naapo vaiya vaguma paiya nebuwe guru muGibheoni, Amasa wakauya kooshongana navo. Joabhi waiya akafuka machira ehondo akaasunga ngebhande, rine shoti muchiunu chake mumakara aro; naapo achahamba kuenda mberi yakadonha.

⁹ Joabhi wakati kunaAmasa, “Unotamba here, munun'una wangu?” NaJoabhi wakabata Amasa ngechirebvu ngenyara yokumudyo, kuti amuchingamidze ngomuromo.

¹⁰ Asi Amasa aazi kuona shoti yaiya munyara yaJoabhi; ndizvo wakamubaya mundani, nemaura ake akawa pashi pamavhu, aazi kumubayazve; naye wakafa. Zvino Joabhi naAbhishai hama yake vakarumbirira Shebha mukororo waBhikhiri.

¹¹ Umwe wevanhu vaJoabhi wakaema pasinde paAmasa, akati, “Kunyazwi ndiani unoda Joabhi, kunyazwi ndiani uwo unoda Dhavhidha ngaateere Joabhi.”

¹² Amasa wakathauta mungazi yake mupato, naapo munhu aona kuti vanhu veshe vaiemapo. Wakadusa Amasa kubva mupato kumuisa mushango, akamufukidza ngejira, apo aona kuti vanhu veshe vaipinda vaiemapo.

¹³ Naapo aduswa kubva mupato, vanhu veshe vakaenda kunaJoabhi kuti vateere Shebha mukororo waBhikhiri.

¹⁴ Shebha wakahamba kupinda ngomumadzinza eshe aIsuraeri metsa kuguma Abheri reBhethimaakha, nokuneveshe veBheri; navo vakaunganidzana pamwepo vakamuteera mudhorobha.

¹⁵ Hondo yaJoabhi yakaguma. Vakamukomba muAbheri reBhethimaakha; vakaemesa mavhu kuita dunhu padhorobha, rakaema pasinde porukumbati rwokubanze. Vanhu veshe vaiya naJoabhi vakaponda rukumbati urwo kuruputsira pashi.

¹⁶ Zvino kwakadaidzira mudzimai wakangwara ari mudhorobha echiti, “Izwanyi! Izwanyi! Ronzai kunaJoabhi kuti akwedzere pano, ndierekete naye.”

¹⁷ Wakakwedzera pasinde kwaari; mudzimai wakati, “Ndiwe here Joabhi?” Naye wakapingura, akati, “Ndini.” Zvino wakati kwaari, “Purutana mazwi omurandakadzi wako.” Wakapingura akati, “Ndinozwa.”

¹⁸ Zvino wakapingura echiti, “Vanhu vekare vaiereketa vechiti, ‘Ngegwinyiso vaibvunza kupanga kwaAbheri;’ ngokudaro vaipedza ndaa.

¹⁹ Inini ndiri umwe weavo vanoda kunyarara nokugondeka muIsuraeri; iwewe unoda kuparadza dhorobha guru raIsuraeri. Ngenyi wechida kutangurira nhaka yaMambo Mwari?”

²⁰ Joabhi wakapingura echiti, “Ngakuite kuretu kwendiri, ngakuite kuretu, kuti nditangurire nokuti kuparadza!

²¹ Andiyopi ndaa akadi! Asi munhu unogara munyika yemitunhu yaEfuremu unozwi ndiShebha mukororo waBhikhiri, wakamukira mambo Dhavhidha. Muunzenyi kwendiri ega, ndinozorekera dhorobha.” Mudzimai wakati kunaJoabhi, “Ringira, soro rake rinozokandirwa kwouri ngepadera porukumbati.”

²² Zvino mudzimai wakaenda kunevanhu veshe ngoungwaru hwake. Navo vakagura soro raShebha mukororo waBhikhiri, vakarikandira kunaJoabhi. Ndizvo Joabhi wakaridza gwama, veshe vakaparara kubva padhorobha, munhu umwe ngaumwe wakaenda kutende rake, naapo Joabhi wakahwirira Jerusaremu kunamambo.

Nduna dzaDhavhidha

²³ Zvino Joabhi waiya padera pehondo yeshe yaIsuraeri; Bhenaia mukororo waJehoiadha waiya padera pavaKherethi napadera pevaPherethi;

²⁴ Adhoramu waiya nduna yechibharo; Jehoshafati mukororo waAhirudhi waiya munyori;

²⁵ Shevha waiya munyorizve; Zadhoki naAbhiatha vaiya vapristi;

²⁶ Ira muJairi waiyawo mupristi waDhavhidha.