2 Sam. 2 - Bhaibheri Rakachena muChindau

Dhavhidha Unoitwa Mambo waJudha

¹ Ngesure kweizvi Dhavhidha wakabvunza kunaMambo Mwari echiti, “Ndingakwira here kuguta nokuti ngeriri raJudha?” Mambo Mwari wakati kwaari, “Kwira.” Dhavhidha wakati, “Ndinozokwira kundau iri?” Wakati, “KuHebroni.”

² Ndizvo Dhavhidha wakakwirayo, nevakadzi vake vairi, Ahinoamu muJezireeri, naAbhigairi, shirikadzi yaNabhari muKharmeri.

³ Dhavhidha wakaunza vanhu vake vaiya naye, munhu weshe nemhuri yake; navo vakagara mumaguta eHebroni.

⁴ Zvino vamuna vaJudha vakauya, vakadzodzapo Dhavhidha kuita mambo padera pemhatso yaJudha. Naapo vakaronzera Dhavhidha vechiti, “Vamuna vaJabheshigireadhi ndivo vakaika Sauri,”

⁵ Dhavhidha wakatuma nhumwa kuvamuna veJabheshigireadhi echiti kwevari, “Mambo Mwari ngaamufumise, ngokuti mwakaonisa nyasha iyi kunamambo wenyu, Sauri, ngokumuika!

⁶ Zvino Mambo Mwari ngaaonise nyasha negwinyiso kwomuri! Neniwo ndinozoonisa nyasha kwomuri, ngokuti mwakaita ichi chiro.

⁷ Ndizvo nyara dzenyu ngadzigwinyiswe, mushinge; ngokuti mambo wenyu Sauri wakafa, nemhatso yaJudha yakandidzodza kuita mambo padera pavo.”

Ishibhoshethi Unoitwa Mambo waIsuraeri

⁸ Asi Abhina mukororo waNeri, nduna yehondo yaSauri, wakatora Ishibhoshethi, mukororo waSauri, wakamuunza kuMahanaimu.

⁹ Wakamuita mambo padera peGireadhi, vaAshu, vaJezireeri, vaEfuremu, vaBhenjamini, nepadera pevaIsuraeri veshe.

¹⁰ Ishibhoshethi, mukororo waSauri waiya anemakore makumi marongomuna apo paakatanga kutonga padera paIsuraeri, naye wakatonga makore mairi. Asi mhatso yaJudha yakateera Dhavhidha.

¹¹ Nguva iyo Dhavhidha yaakaita mambo muHebroni padera pemhatso yaJudha yaiya makore manomwe nemwedzi mitanhatu.

Hondo pakati paIsuraeri naJudha

¹² Abhina mukororo waNeri, nevaranda vaIshibhoshethi mukororo waSauri vakabuda kubva Mahanaimu kuenda Gibheoni.

¹³ Joabhi mukororo waZeruia, nevaranda vaDhavhidha, vakabuda vakashongana navo padziya reGibheoni. Chikwata chimwe chakagara pashi parutii rumwe rwedziya, nechimweni chakagara parutii rumweni rwedziya.

¹⁴ Abhina wakati kunaJoabhi, “Majaha ngaamiruke zvino vavhikisane pamberi pedu.” Joabhi wakati, “Ngavamiruke vauye mberi.”

¹⁵ Ndizvo vakamiruka, vakaerengwa vechipinda, gumi navairi vaBhenjamini naIshibhoshethi mukororo waSauri, nevaranda vaDhavhidha gumi navairi.

¹⁶ Navo vakabatana ngamasoro, vakabayana ngeshoti parutii; ndizvo vakawa pashi pamwepo. Ndizvo zina rendau iyo rakadudzwa kuti, Herikathi-hazurimu (rubaya rwengazi), ruri muGibheoni.

¹⁷ Hondo yaityisa kakurutu ngeiro zuva; Abhina nevanhu vaIsuraeri vakanyiswa ngevaranda vaDhavhidha.

¹⁸ Joabhi, naAbhishai, naAsaheri, vakororo vatatu vaZeruia vaiyapo. Zvino Asaheri wairumba ngokukasira kudai ngemhara yomushango.

¹⁹ Asaheri wakarumbirira Abhina; mukurumba kwake aazi kupauka kuenda kumudyo nokuti kumuoshwe, apo aiteera Abhina.

²⁰ Zvino Abhina wakaringira sure kwake, akati, “Ndiwe Asaheri here?” Naye wakapingura akati, “Eya ndini.”

²¹ Abhina wakati kwaari, “Paukira kumudyo nokuti kumuoshwe, ubate umwe wemajaha, utore zvakachakatwa zvake.” Asi Asaheri aazi kupauka kubva mukumuteera.

²² Abhina wakatizve kunaAsaheri, “Pauka kubva mukunditeera; ndingakuurayirenyi? Ndingazoita maringiriranenyi naJoabhi mukoma wako?”

²³ Asi wakaramba kupauka. Ndizvo Abhina wakamubaya mundani ngechibato chomukhondo, chakamupotya ngokumushana. Wakawa apo, akafa pandauyo. Naavo veshe vakagumapo paakafira Asaheri, vakaemapo.

²⁴ Asi Joabhi naAbhishai vakarumbirira Abhina. Naapo zuva raakupota vakaguma kuMutunhu weAma, uwo uri pamberi peGiya, munjira yomushango reGibheoni.

²⁵ Vanhu vaBhenjamini vakaungana ngokwavo sure kwaAbhina, vakaita chikwata chimwe; vakaema padera pomutunhu.

²⁶ Zvino Abhina wakadaidzira kunaJoabhi echiti, “Shoti inoparadza mhera nariini here? Auzii here kuti magumo anozovava? Unozoita mukuwo wakaitawani usati wapanga vanhu kuti varekere kurumbirira hama dzavo?”

²⁷ Joabhi wakati, “Kudai ngezvaanopona Mambo Mwari, kudai usikazi kuereketa, ngegwinyiso vanhu vaizoangira kurumbirira hama dzavo, vasikarekeri metsa mangwani.”

²⁸ Ndizvo Joabhi wakaridza hwama, nevanhu veshe vakaema; avazi kucharumbirira Isuraeri nokuti kuangira kurwa.

²⁹ Abhina nevanhu vake vakahamba usiku hweshe, kupinda ngomuArabha; vakaambuka paJorodhani, vakahamba masikati eshe ngomuBhitroni, vakaguma Mahanaimu.

³⁰ Joabhi wakapetuka kubva koorumbirira Abhina; naapo aiya aunganidza vanhu veshe pamwepo, kwakatamika varanda vaDhavhidha, gumi nevapfumbamwe, ngepabanze paAsaheri.

³¹ Asi varanda vaDhavhidha vaiya vauraya vanhu vaBhenjamini, mazana matatu nemakumi matanhatu (360) evanhu vaAbhina.

³² Vakatora Asaheri, vakamuika muiba rababa ake, iro raiya muBhetherehema. Joabhi nevanhu vake vakahamba usiku hweshe, vakaguma Hebroni kwoedza.