2 Sam. 19 - Bhaibheri Rakachena muChindau

Joabhi Unopanga Dhavhidha

¹ Wakaronzerwa Joabhi kuti, “Ringira, mambo unochema nokutsumba Abhusaromu.”

² Ndizvo kunyisa kweiro zuva kwakapindurwa kukaita kuchema kuvanhu veshe; ngokuti vanhu vakazwa ngeiro zuva kutambudzika kwaakaita mambo ngendaa yomukororo wake.

³ Vanhu ngeiro zuva vakapotera mudhorobha ngokuzvonga, kudai ngevanhu vanotsveruka apo vatiza kubva kuhondo.

⁴ Mambo wakafukidza hope yake, namambo wakachema ngeizwi guru, akati, “A mukororo wangu Abhusaromu, A Abhusaromu mukororo wangu, mukororo wangu!”

⁵ Zvino Joabhi wakapinda mumhatso yamambo, akati, “Watsverudza nyamashi hope dzavaranda vako veshe avo vaponesa kupona kwako nyamashi, nokupona kwevakororo vako, nokupona kwevanasikana vako, nokupona kwevakadzi vako, nokupona kwemabunha ako,

⁶ ngokuda magaa ako wechizonda vanokuda. Ngokuti waronza nyamashi kuti aupinimidzi ngenduna nokuti ngevatungamiriri; ngokuti ndinoona nyamashi kuti kudai Abhusaromu aiya echipona, neisusu taiya tafa teshe, zvaizokudakadza kakurutu.

⁷ Ndizvo zvino miruka, uende uerekete zvakanaka kunevaranda vako; ngokuti ndinopika ndiMambo Mwari kudai usikaendi, akuna munhu naumwe unozogara newe uhwu usiku; neizvi zvinozoita zvakashatisisa kupinda kushata kweshe kwakakugumira kubvira uchijaha metsa zvino.”

⁸ Zvino mambo wakamiruka, wakagara pachigaro chake pamusiwo. Vakaronzerwa vanhu veshe vechiti, “Wonai, mambo wakagara pamusiwo;” nevanhu vehondo veshe vakaungana pamberi pamambo. Naapo vaIsuraeri veshe vaiya vatizira umwe ngaumwe kutende rake.

Dhavhidha Unohwirira Jerusarema

⁹ Vanhu veshe vakaphikisana mumadzinza eshe aIsuraeri vechiti, “Mambo wakatiponesa kubva kunyara dzamagaa edu, wakatinunura kubva kunyara dzevaFiristia; nazvino watotiza kusiya nyika ngendaa yaAbhusaromu.

¹⁰ Asi Abhusaromu wetakadzodza kuita mambo padera pedu wakafa muhondo. Ndizvo zvino amuereketi ngenyi izwi rokupetudza mambo?”

¹¹ Mambo Dhavhidha wakatuma nhumwa kunaZadhoki naAbhiatha vapristi echiti, “Ereketai kunevakuru vaJudha mwechiti, ‘Ngenyi imwimwi muri vokugumisira kupetudza mambo wenyu kumhatso yake? Kuereketa kwevaIsuraeri veshe kwaguma kunamambo.

¹² Imwimwi muri hama dzangu, muri godo remagodo angu nenyama yenyama yangu; ndizvo ngenyi muri vokugumisira kupetudza mambo?’

¹³ Mwechiti kunaAmasa, ‘Iwewe andiwe wemagodo angu nenyama yangu here? Ndizvo Mwari ngaaite kudaro kwendiri nokupindazve, kudai usikazoiti nduna yehondo yangu kubvira zvino nenguva dzeshe pandau yaJoabhi.’ ”

¹⁴ Amasa wakapfaisa mwoyo yevanhu veshe vaJudha, yakaita kudai ngowomunhu umwe; ndizvo vakatumira izwi iri kuna mambo vechiti, “Petuka, iwewe navaranda vako veshe.”

¹⁵ Ndizvo mambo wakapetuka, wakaguma Jorodhani. VaJudha vakauya Girigari kooshongana namambo, nokumuperekedza kuti aambuke Jorodhani.

¹⁶ Shimei mukororo waGera, muBhenjamini weBhahurimu, wakakasira kudzaka nevanhu vaJudha kooshongana namambo Dhavhidha;

¹⁷ naye waiya nevamuna gumi rimwe remazana (1,000) evanhu vaBhenjamini, naZibha muranda wemhatso yaSauri, navakororo vake gumi navashanu nevaranda vake makumi mairi; navo vakakasira, vakaambuka ruseri rweJorodhani kutangira mambo,

¹⁸ naapo yechiambuka ngarava yokutwara zvemhatso yamambo, nokuita icho chaakapinimidza kuti chakanaka. Shimei mukororo waGera wakawa pashi pamberi pamambo, apo aiya echiambuka Jorodhani,

Dhavhidha Unoitira Nyasha Shimei

¹⁹ naye wakati kunamambo, “Mambo wangu asandierengera ndaa, nokuti kukarakadzazve izvo muranda wako zvaakaita, ngokukurerusa ngezuva rowakabuda makosi wangu mambo wechibva Jerusarema; mambo asapinimidza ndizvo mumweya mwake.

²⁰ Ngokuti muranda wako unozia kuti ndakashaisha; ndizvo ringira ndauya nyamashi ndiri wokutanga kutangira mhatso yeshe yaJosefa kudzaka kushongana nemakosi wangu mambo.”

²¹ Abhishai mukororo waZeruia wakapingura echiti, “Shimei aazourawi here ngeizvi, ngokuti wakatuka wakadzodzwa waMambo Mwari?”

²² Asi Dhavhidha wakati, “Ndinozoitenyi kwomuri, imwimwi vakororo vaZeruia, kuti ngeiri zuva muite magaa kwendiri? Kungaurawa here munhu nyamashi muIsuraeri? Ngokuti andizii here kuti ngezuva iri inini ndini mambo padera paIsuraeri?”

²³ Mambo wakati kunaShimei, “Auzofi iwewe.” Namambo wakapika mhiko yake kwaari.

Dhavhidha Unoitira Nyasha Mefibhoshethi

²⁴ Mefibhoshethi muzukuru waSauri wakadzaka kooshongana namambo, asikazi kushamba tsoka dzake nokuti kupara murebvu wake, nokuti kusuka zvokufuka zvake kubvira zuva raakabva ndiro mambo metsa zuva raakauyazve mukunyarara.

²⁵ Naapo aguma kubva Jerusarema kooshongana namambo, mambo wakati kwaari, “Auzikuenda neni ngenyi, Mefibhoshethi?”

²⁶ Naye wakapingura, “Makosi wangu, A mambo, muranda wangu wakandichengedzera; ngokuti muranda wako wakati kwaari, ‘Ndisungire mbongoro, kuti ndigadhe padera payo, ndiende namambo.’ Ngokuti muranda wako chirema.

²⁷ Wakatsa muranda wako kunamakosi wangu mambo. Asi makosi wangu mambo wakatodzana nengirosi yaMwari; ndizvo itai izvo zvinomunakira mukuona kwenyu.

²⁸ Ngokuti veshe vemhatso yababa angu vakadai ngevakafa pamberi pamakosi wangu mambo. Asi iwewe wakaisa muranda wako pamwepo naavo vanodya patafura rako. Inini ndichine simba renyi rendingachauyazve kuti ndikumbire kunamambo?”

²⁹ Mambo wakati kwaari, “Uchaereketa ngenyi ngendaa dzako? Ndakati, ‘Iwewe naZibha koanisiranai nyika.’ ”

³⁰ Mefibhoshethi wakati kunamambo, “Eya, ngaatore yeshe, ngokuti makosi wangu mambo watouya kumhatso yake ngokunyarara.”

Dhavhidha Unoitira Nyasha Bharizirai

³¹ Zvino Bharizirai muGireadhi wakadzaka kubva Rogerimu, wakaenda Jorodhani namambo, kumuperekedza kuambuka Jorodhani.

³² Bharizirai waiya amunhu musharuka, aanemakore makumi masere! Ndiye waiburira mambo kudya, achagara Mahanaimu ngokuti iye waiya gurudza gurutu.

³³ Mambo wakati kunaBharizirai, “Uya, uambuke neni, ndinozokupa kudya muJerusarema.”

³⁴ Asi Bharizirai wakati kunamambo, “Ndichine kupona kwakaitawani kuti ndiuye, ndikwire namambo Jerusarema?

³⁵ Nyamashi uno ndaane makore makumi masere; ndingachakona here kutsanangura pakati pezvakanaka nezvakashata? Muranda wako ungachakona here kuraira zvokudya nezvokumwa? Ndingacharizwa here izwi revamuna vanoemba nerevakadzi vanoemba? Ngenyi muranda wako echitutsira kuita mutwaro kunamakosi wangu mambo?

³⁶ Muranda wako unozoperekedza mambo padoko seri kweJorodhani. Ngenyi mambo echida kundiripira ngechiro chakanaka chakadai?

³⁷ Ndinokupota, tendera muranda wako kuti ahwirire, kuti ndifire mudhorobha rangu, ndiikwe pasinde neiba rababa angu neramai angu. Asi uripano muranda wako Khimhamu; ngaatenderwe kuti aambuke namakosi wangu mambo; uite kwaari zvinooneka zvakanaka kwouri.”

³⁸ Mambo wakapingura, “Khimhamu unozoambuka neni, ndinozoita kwaari kunyazwi chiinyi chinooneka chakanaka kwouri; nacho cheshe chounozoda kwendiri, ndinozochiita kwouri.”

³⁹ Zvino vanhu veshe vakaambuka Jorodhani namambo wakaambuka; mambo wakachingamidza Bharizirai ngomuromo, wakamufumisa; naye wakahwirira kanyi kwake.

Judha naIsuraeri Vanophikisana ngendaa yaMambo

⁴⁰ Mambo wakapinda kuenda Girigari, naKhimhamu wakaenda naye. Vanhu veshe vaJudha norupande rwevanhu vaIsuraeri vakaperekedza mambo.

⁴¹ Zvino vanhu veshe vaIsuraeri vakauya kunamambo vakati kwaari, “Ngenyi hama dzedu vamuna vaJudha vakakuba, nokuunza mambo nevemhatso yake ruseri rweJorodhani nevanhu veshe vaDhavhidha naye?”

⁴² Veshe vamuna vokwaJudha vakapingura vamuna vokwaIsuraeri vechiti, “Ngokuti mambo ihama yedu yaamho. Munotitsenekera ngenyi ngeiyi ndaa? Taiya takadyenyi chamambo, nokuti wakatipa chipo here?”

⁴³ Asi vamuna vaIsuraeri vakapingura vamuna vokwaJudha vechiti, “Isusu tine zvikoaniswa marupande gumi kunamambo, munaDhavhidha tine zvakawanda yaamho kupinda imwimwi. Zvino imwimwi ngenyi mwakatishoora? Atisupi here takatanga kuereketa ngokuunzazve mambo wedu?” Asi mazwi evamuna vokwaJudha aiya noushungu kupinda mazwi evamuna vokwaIsuraeri.