2 Sam. 18 - Bhaibheri Rakachena muChindau

Kunyiswa noKuurawa kwaAbhusaromu

¹ Zvino Dhavhidha wakaerenga vanhu vaiya naye, wakaemesa nduna padera pemakumi emazana nenduna padera pemazana.

² NaDhavhidha wakapaura hondo kuita zvikwata zvitatu; wakatuma rupande rwechitatu rwevanhu ngenyara yaJoabhi, norupande rwechitatu ngenyara yaAbhishai, mukororo waZeruia mukoma waJoabhi, norupande rwechitatu ngenyara yaIthai muGithi. Mambo wakati kunevanhu, “Ngegwinyiso inini pachangu ndinozoenda nemwi.”

³ Asi vanhu vakati, “Iwewe auzoendi. Ngokuti kudai isusu tikatiza, avazopinimidzi tisu; kunyazwi rupande rwedu rwafa, avazopinimidzi tisu. Asi iwewe unoedzana negumi remakumi emazana (10,000); ndizvo zvino kwakapinda kunaka kuti iwewe utitumire kudetserwa uri mudhorobha.”

⁴ Mambo wakati kwevari, “Icho chinooneka chakanaka kwomuri ndinozochiita.” Ndizvo mambo wakaema ngeparutii pemusiwo wedhorobha, apo vanhu veshe vechibuda ngemazana nemakumi emazana.

⁵ Mambo wakapanga Joabhi naAbhishai naIthai echiti, “Mungwarirenyi zvakanaka ngendaa yangu mujaha uwo Abhusaromu.” Nevanhu veshe vakazwa apo mambo paakapanga nduna dzeshe ngendaa yaAbhusaromu.

⁶ Ndizvo vanhu vakabuda murubaya koorwa naIsuraeri; nokurwa kwakaitika mukati mwegwasha raEfuremu.

⁷ Vanhu vaIsuraeri vakanyiswa ngevanhu vaDhavhidha. Kwaiyapo kuurayana kukurutu ngeiro zuva, nevamuna makumi mairi emakumi emazana (20:000) vakafa.

⁸ Hondo yakapararira padera penyika yeshe; negwasha rakapedza kuuraya vanhu vazhinji ngeiro zuva kupinda vakaurawa ngeshoti.

⁹ Abhusaromu wakashongana nevanhu vaDhavhidha. Abhusaromu waiya akagadha padera penyurusi rake, nenyurusi rakapinda pakati pematai akabatana omuokhi. Soro rake rakakwikwa ngematai omuokhi, naye wakatitsudzu pakati pedenga nenyika; nenyurusi raaiya akagadha rakaenda.

¹⁰ Munhu umweni wakazviona, wakaronzera Joabhi, akati, “Ringira, ndaona Abhusaromu akatitsudzu pamuokhi.”

¹¹ Joabhi wakati kunomunhu wakamuronzera, “Ringira, ndiwe wakamuona! Auzi kumubaya ngenyi kuti awe pashi pamavhu? Neni ndaizodai ndakupa zvigurwa zvesirivha gumi nebhande.”

¹² Asi munhu wakati kunaJoabhi, “Kunyazwi kudai ndikanyazwa kurema kwezvigurwa zvesirivha zviri gumi remazana munyara dzangu, ndisaizotambanudza nyara yangu kubaya mukororo wamambo; ngokuti mukuzwa kwedu mambo echikupanga iwewe naAbhishai naIthai echiti, ‘Ngwariranyi kuti kusaapo munhu unoshaishira mujaha uwo Abhusaromu.’

¹³ Ngenjira imweni, dai ndaita zvakashata ngendaramo yake, (akuna chiro chakafishika kunamambo,) zvino iwewe pachako waizodai waema parutii.”

¹⁴ Joabhi wakati, “Andingapedzi nguva ndechiereketa newe kudaro.” Naye wakatora mikhondo mitatu munyara dzake, wakabaya Abhusaromu ngepamwoyo, apo paaiya achapona ari pamatai pomuokhi.

¹⁵ Nemajaha gumi avo vaitwara zvokurwa zvaJoabhi vakatendenedza Abhusaromu, vakamubaya, vakamuuraya.

¹⁶ Zvino Joabhi wakaridza gwama, nevanhu vakauya kubva koorumbirira vaIsuraeri, ngokuti Joabhi wakapetudza vanhu sure.

¹⁷ Vakatora Abhusaromu, vakamukandira muhunza huru yaiya mugwasha, vakaunganidza murwi wemapuwe mukuru padera pake. Naapo vaIsuraeri veshe vakatiza umwe ngaumwe kuenda kutende rake.

¹⁸ Zvino Abhusaromu achapona wakadziemesera sika huru, iyo iri mubani ramambo, ngokuti wakati, “Andina mukororo wokuti zina rangu richerechedzwe;” wakadudza sika iyo zina rake. Ndau iyo nanyamashi inodaidzwa kuti, Sika yaAbhusaromu.

Dhavhidha Unoronzerwa ngoRufu rwaAbhusaromu

¹⁹ Zvino Ahimaazi mukororo waZadhoki wakati, “Ngandirumbe zvino, ndironzere mambo mashoko okuunzidzirwa kwake ndiMambo Mwari kubva kumagaa ake.”

²⁰ Joabhi wakati kwaari, “Aungaronzi mashoko nyamashi; unozoronza mashoko ngezuva rimweni, asi nyamashi auzoronzi, ngeiyi ndaa, ngokuti mukororo wamambo wafa.”

²¹ Zvino Joabhi wakati kumuKhushi, “Enda iwewe, uronzere mambo izvo zvewaona.” MuKhushi wakakotama pamberi paJoabhi naye wakarumba.

²² Zvino Ahimaazi mukororo waZadhoki wakatizve kunaJoabhi, “Zvakanyadaro, nditendere ndinokupota, kuti ndirumbe kuteera muKhushi.” NaJoabhi wakati, “Unorumbirenyi, mwana wangu, wechiona kuti aungapuwi muthuso ngamashoko?”

²³ “Zvakanyadaro,” wakati, “Ndinozorumba.” Ndizvo wakati kwaari, “Rumba.” Zvino Ahimaazi wakarumba ngenjira yomubani, wakatangira muKhushi.

²⁴ Zvino Dhavhidha waiya akagara ngepakati pemisiwo miiri yedhorobha. Murindi wakakwira ngeparukumbati kuenda padera pomusiwo, wakamirudza madziso ake, akaona munhu wairumba ari ega.

²⁵ Murindi wakadaidzira, wakaronzera mambo. Mambo wakati, “Kuti ari ega, unemashoko mumuromo mwake.” Wakaangira kuuya, naye wakakwedzera pasinde.

²⁶ Zvino murindi wakaona munhu umweni echirumba; nomurindi wakadaidzira kunomungwariri wepamusiwo, akati, “Wona, munhu umwenizve unorumba ari ega.” Mambo wakati, “Unounzawo mashoko naye.”

²⁷ Murindi wakati, “Ndinopinimidza kuti kurumba kwouwo kutanga kwadai ngekwaAhimaazi mukororo waZadhoki.” Namambo wakati, “Iye munhu wakanaka, unounzawo mashoko akanaka.”

²⁸ Zvino Ahimaazi wakadaidzira kunamambo echiti, “Zveshe zvakanaka hazvo.” Wakawa ngehope yake pashi pamberi pamambo, akati, “Ngaakudzwe Mambo Mwari, Mwari wako uwo wakapira vanhu vakakumukira mambo wangu.”

²⁹ Mambo wakati, “Mujaha Abhusaromu unopona here?” Ahimaazi wakapingura, “Apo Joabhi paakatuma muranda wamambo, neinini muranda wako ndakaona nyongana huru, asi andizi kuzia kuti chaiya chiinyi.”

³⁰ Mambo wakati kwaari, “Tarauka, ueme apo.” Wakatarauka, wakaema akati mwii.

³¹ Zvino wakaguma muKhushi; nomuKhushi wakati, “Mashoko akanaka amakosi wangu mambo! Ngokuti Mambo Mwari wakuunzidzira nyamashi kubva kusimba veavo veshe vaikumukira.”

³² Mambo wakati kumuKhushi, “Mujaha Abhusaromu unopona here?” MuKhushi wakati, “Magaa amakosi wangu mambo, navo veshe vanotsvaka kuremadzwa kwako, ngavadai ngouwo mujaha.”

³³ Mambo wakatambudzika kakurutu, wakakwira mukamera riri ngepadera pomusiwo, akachema apo echikwira echiti, “A mukororo wangu Abhusaromu, mukororo wangu, mukororo wangu Abhusaromu! Kudai Mwari echitenda ndaizokufira, A Abhusaromu, mukororo wangu, mukororo wangu!”