2 Sam. 17 - Bhaibheri Rakachena muChindau

Hushai Unopausa Abhusaromu

¹ Zvakanyadaro, Ahithoferi wakati kunaAbhusaromu, “Nditendere zvino nditsanangure vamuna makumi emazana gumi nemairi (12,000), ndinozomiruka ndirumbirire Dhavhidha ngouhwu usiku.

² Ndinozomugumira achakaremba akapera simba, nokumukarudza; nevanhu veshe vanaye vanozotiza. Inini ndinozobaya mambo ega,

³ neni ndinozopetudza vanhu veshe kwouri kudai ngomuroorwa wapetudzwa kumwamuna wake. Iwewe unotsvaka kupona kwomunhu umwe ega; ndizvo vanhu veshe vanozoa nokunyarara.”

⁴ Kupanga uku kwakadakadza Abhusaromu nevakuru veshe vaIsuraeri.

⁵ Zvino Abhusaromu wakati, “Daidzawo Hushai muAkhi, tizwewo zvaanoronza.”

⁶ Naapo Hushai aguma kunaAbhusaromu, Abhusaromu wakaereketa kwaari echiti, “Ahithoferi waereketa kudai; zvino toita kudai ngokuronza kwake here? Kudai zvisikazi kudaro, ereketa iwewe.”

⁷ Hushai wakati kunaAbhusaromu, “Kupanga kwaAhithoferi akuzi kunaka ngeiyi nguva.”

⁸ Hushai wakati, “Unozia kuti baba ako nevanhu vake ingwazi, navo vanekuvava mumwoyo yavo, kudai ngebheya rakatorerwa vana varo mushango. Ngepabanze peizvi, baba ako ingwazi yehondo; aazogari nevanhu vehondo usiku hweshe.

⁹ Kunyazwi zvino wakadzifisha mune rimwe remapako, nokuti kundau imweni. Naapo kungazoitika kuti vamweni vevarwi vedu vaurawe pakutanga, kuti kunyazwi ndiani unozozwa unozoti, ‘Kuripo kuurayana pakati pevanhu vehondo vanoteera Abhusaromu.’

¹⁰ Zvino kunyazwi ngengwazi, mwoyo wake wakadai ngowemhondoro, unozopera simba yaamho ngokutya; ngokuti vaIsuraeri veshe vanozia kuti baba ako ingwazi muhondo naavo vanaye ingwazi muhondo.

¹¹ Asi kupanga kwangu kunoti vaIsuraeri veshe ngavaungane kwouri kubvira Dhani kuguma Bheerishebha, kudai ngouwandu hwejecha riri paruandhle, kuti uende wemene kuhondo.

¹² Ndizvo tinozoguma kwaari kunyazwi ngepari paari, tinozomata padera pake kudai ngebeto rinowa padera pamavhu; iye nevanhu vake veshe vaanavo akuzosari naumwe wavo.

¹³ Kudai echizopetuka kuenda mudhorobha, naapo vaIsuraeri vanozounza mapote kuiro dhorobha nokurikweera kunemufuya, metsa akuzosaripo nebuwe doko narimwe.”

¹⁴ Abhusaromu navanhu veshe vaIsuraeri vakati, “Kupanga kwaHushai muAkhi kwakapinda kunaka kunokupanga kwaAhithoferi.” Ngokuti Mambo Mwari wakaemesa kuti kupanga kwaAhithoferi kunyiswe, ngezano raMambo Mwari rokuti aunze kushata padera paAbhusaromu.

Dhavhidha Unonyowedzwa noKutiza

¹⁵ Zvino Hushai wakati kunaZadhoki nokunaAbhiatha vapristi, “Uku nouku ndikwo kupanga kwaAhithoferi kunaAbhusaromu nokuvakuru vaIsuraeri, nouku ndikwo kupanga kwangu.

¹⁶ Ndizvo zvino tumirai izwi ngokukasira, muronzere Dhavhidha kuti asagara usiku uhwu mushango romurubaya, asi ngaakasire aambuke ruseri; ngokuti mambo ungazouraiwa nevanhu veshe vaanavo.”

¹⁷ Zvino Jonathani naAhimaazi vaiya vechigarira muEnirogeri, kuti vasazooneka apo voopotera mudhorobha; nomusikana wakaenda koovaronzera, navo vakaenda kooronzera mambo Dhavhidha.

¹⁸ Asi murumbwana wakavaona, wakaronzera Abhusaromu; ndizvo vamuna vairi vakahamba ngokukasira metsa vakaguma kumhatso yomunhu umweni muBhahurimu, uwo waiya nomupisi wemvura muruwanze rwake; vakapoteremwo.

¹⁹ Mukadzi wakafukidza muromo womupisi, akaanika koroni yakagaiwa padera pawo; apana chiro chakaziikanwa ndizvo.

²⁰ Naapo varanda vaAbhusaromu vaguma kunomukadzi uwo kumhatso, vakati, “Vari pari Ahimaazi naJonathani?” Mukadzi wakati kwevari, “Vaambuka mufuya wemvura.” Naapo vakavatsvaka avazi kuvaona, vakahwirira Jerusarema.

²¹ Naapo vaiya vaenda, vamuna vakabuda kubva mumupisi, vakaenda, vakaronzera mambo Dhavhidha. Vakati kunaDhavhidha, “Miruka, uambuke zvino mufuya ngokukasira; ngokuti Ahithoferi wakapangana ndiwe kudai.”

²² Ndizvo Dhavhidha wakamiruka nevanhu veshe vaiya naye, vakaambuka ruseri rweJorodhani; ngomukuwo wemangwanani, akuna naumwe waiya asati aambuka Jorodhani.

²³ Naapo Ahithoferi aona kuti kupanga kwake akuzi kupurutanwa, wakaisa chigaro pambongoro yake, akaenda kanyi kudhorobha rake. Wakarongedza mhatso yake zvakanaka, akadzisungira; akafa, akaikwa muiba rababa ake.

²⁴ Zvino Dhavhidha wakaguma Mahanaimu. Abhusaromu waiya aambuka Jorodhani, iye nevanhu veshe vaIsuraeri pamwepo naye.

²⁵ Zvino Abhusaromu wakaemesa Amasa kuita nduna yehondo pandau paJoabhi. Amasa waiya mukororo womunhu zina rake ndiJetha muIshumaeri, uwo wakaroora Abhigari mwanasikana waNahashi waiya hazvadzi kunaZeruia, mai aJoabhi.

²⁶ VaIsuraeri naAbhusaromu vakaemesa matende avo muGireadhi.

²⁷ Naapo Dhavhidha aguma Mahanaimu, Shobhi, mukororo waNahashi weRabha wevakororo vaAmoni, naMakhiri mukororo waAmieri weRodhebha, naBharizirai muGireadhi weRogerimu,

²⁸ vakaunza manhi nendiro, zvidziyo zvedongo, nekoroni, nebhari, ufu, nekoroni yakakangwa, chuchururu, nenyemba,

²⁹ uchi, mafuta, makwai, nechizi dzen'ombe, zvaDhavhidha nevanhu vaiya naye kuti vadye; ngokuti vakati, “Vanhu vehondo vaanenzara, vademera, vaanenyota mushango.”