2 Sam. 16 - Bhaibheri Rakachena muChindau

Dhavhidha naZibha

¹ Naapo Dhavhidha apinda padoodoko mutunhu, ringira, Zibha muranda waMefibhoshethi wakashongana naye, anezvimbongoro zviiri zvinezvigaro padera pazvo akatwara mazana mairi (200) ezvingwa, nezana rezvikore zvemavhini, nezana remichero yezienza, nembudu imwe yevhini.

² Mambo wakati kunaZibha, “Ngenyi waunza izvi?” Zibha wakati, “Zvimbongoro ngezvavanhu vemhatso yamambo, kuti vagadhe; nezvingwa nemichero yezienza ngeyemajaha kuti adye; nevhini kuti avo vanopera simba mushango vamwe.”

³ Mambo wakati, “Uri pari mukororo wamambo wako?” Zibha wakati kunamambo, “Ringira, uri muJerusarema; ngokuti wakati, ‘Nyamashi mhatso yaIsuraeri inozohwirinza kwendiri umambo hwemadzimambo angu.’ ”

⁴ Zvino mambo wakati kunaZibha, “Ringira, zveshe zvaiya zvaMefibhoshethi zvinozoita zvako.” Zibha wakati, “Ndinokupota ngokupfaa pamberi pako, ngandione nyasha mukuona kwako, makosi wangu mambo.”

Dhavhidha naShimei

⁵ Naapo Dhavhidha wakaguma Bhahurimu, kwakabuda munhu wemhuri yemhatso yaSauri, zina rake ndiShimei, mukororo waGera; wakahamba echituka.

⁶ Wakaposhera mapuwe kunaDhavhidha navaranda vamambo Dhavhidha veshe; zvino vanhu veshe nengwazi dzehondo vaiya ngokumudyo nokumuoshwe kwake.

⁷ Shimei wakadaidzira apo zvaaituka echiti, “Buda, buda, iwewe munhu wengazi, munhu wakashata!

⁸ Mambo Mwari waunzidzira padera penyu mweshe ngazi yemhatso yaSauri, pandau yake pounotonga iwewe zvino; Mambo Mwari wakapa umambo munyara yaAbhusaromu mukororo wako. Wona, zvino kushaisha kwakagumira ngokuti uri munhu wengazi.”

⁹ Naapo Abhishai mukororo waZeruia wakati kunamambo, “Ngenyi kuti imbwa iyi yakafa ituke makosi wangu mambo? Nditendere kuti ndiambukeyo ndimugure soro.”

¹⁰ Asi mambo wakati, “Ndinendaa yenyi kwomuri, vakororo vaZeruia? Kudai echituka, ngokuti Mambo Mwari wakati kwaari, ‘Tuka Dhavhidha,’ ndiani zvino ungaronza kwaari kuti, ‘Waita kudaro ngenyi?’ ”

¹¹ Dhavhidha wakati kunaAbhishai nokuvaranda vake veshe, “Ringirai, mukororo wangu emene wakabarwa ndini unotsvaka kupona kwangu. Zvino munoshama ngenyi ngouyu muBhenjamini? Murekerenyi ngaatuke, ngokuti wakaronzerwa ndiMambo Mwari.

¹² Pamweni Mambo Mwari unozoona kutambudzika kwangu, naMambo Mwari unozondiunzidzira ngezvakanaka pandau yokutukwa uku nyamashi.”

¹³ Ndizvo Dhavhidha nevanhu vake vakaenda ngenjira, apo Shimei wakahamba ngomubandanda romutunhu vakaringirana naye, echituka, apo echihamba, echiposhera mapuwe, nokukandira kwaari bukuta.

¹⁴ Mambo nevanhu vake veshe vaiya naye vakaguma varemba paJorodhani, wakazororapo pachake.

Abhusaromu muJerusarema

¹⁵ Abhusaromu nevanhu veshe vaIsuraeri vakaguma Jerusarema; Ahithoferi waiya naye.

¹⁶ Naapo Hushai muAkhi mungani waDhavhidha aguma kunaAbhusaromu, Hushai wakati kunaAbhusaromu, “Mambo ngaapone mhera nariini. Mambo ngaapone mhera nariini.”

¹⁷ Abhusaromu wakati kunaHushai, “Idzi ndidzo nyasha dzako here kunomungani wako? Auzi kuenda ngenyi nomungani wako?”

¹⁸ Hushai wakati kunaAbhusaromu, “Haiwa; asi uwo waanotsanangura Mambo Mwari, naava vanhu, nevanhu veshe vaIsuraeri, ndiye wendinozoita wake, ndechigara naye.

¹⁹ Zvakanyadaro, ndiani wendingashandira? Andizoshandiri mukuona kwomukororo wake here? Kudai ngezvendakashandira baba ako, ngokudaro ndinozoshandira iwewe.”

²⁰ Zvino Abhusaromu wakati kunaAhithoferi, “Tipangenyi zano, tinozoitenyi?”

²¹ NaAhithoferi wakati kunaAbhusaromu, “Potera kunemabunha ababa ako, awo aakasiya kuti angwarire mhatso; nevaIsuraeri veshe vanozozwa kuti wadziita chinuhwo kunababa ako; naapo nyara dzavo veshe vanewe dzinozogwinyiswa.”

²² Ndizvo vakaemesera Abhusaromu tende ngepadera pemhatso; naAbhusaromu wakapotera kuatana nemabunha ababa ake mukuona kwevaIsuraeri veshe.

²³ Zvino ngaawo mazuva kupanga kwaAhithoferi kwaiya kwakadai ngomunhu unobvunza mazwi aMwari; ndizvo kudaro kweshe kupanga kwaAhithoferi kunaDhavhidha nokunaAbhusaromu.