2 Sam. 15 - Bhaibheri Rakachena muChindau

Abhusaromu Unoronga Kumukira Umambo

¹ Ngesure kweizvi Abhusaromu wakadzinasirira ngoro nemahachi, nevamuna makumi mashanu kuti varumbe pamberi pake.

² Abhusaromu waimuka mangwanani maishi echiema ngeparutii rwenjira pamusiwo wedhorobha; naapo pechiguma munhu unendaa kuti itongwe ndimambo, Abhusaromu waimudaidza echiti, “Wabva kudhorobha riri?” Naapo echiti, “Muranda wako uri wedzinza rakatikuti raIsuraeri,”

³ Abhusaromu waiti kwaari, “Wona, ndaa dzako dzakanaka nokururama; asi akuna munhu wamambo wakaemeswa kukuzwa.”

⁴ Abhusaromu waitizve, “A dai ndaiitwa mutongi munyika! Zvino vanhu veshe vanendaa vaizouya kwendiri, neni ndaizovaitira zvakanaka.”

⁵ Kunyazwi ndiani munhu wakaguma pasinde kumuembera, waitambanudza nyara yake kumubata nokumuchingamidza ngomuromo.

⁶ Ndizvo zvaakaita Abhusaromu kunomuIsuraeri weshe, uwo wakauya kunamambo kootongwa ndaa dzake; ngokudaro Abhusaromu wakaba mwoyo yevanhu vaIsuraeri.

⁷ Pakapera makore marongomuna Abhusaromu wakati kunamambo, “Ndinokupota, nditendere ndiende kuti ndiripire mhiko yangu, yendakapika kunaMambo Mwari muHebroni.

⁸ Ngokuti muranda wako ndakapika mhiko ndichagara Geshuri muAramu, ndechiti, ‘Kudai Mambo Mwari echizondihwirinzazve Jerusarema, ndinozodira Mambo Mwari muHebroni.’ ”

⁹ Mambo wakati kwaari, “Enda ngokunyarara.” Ndizvo wakamiruka, akaenda Hebroni.

¹⁰ Asi Abhusaromu wakatuma nhumwa ngokufishika kumadzinza eshe aIsuraeri echiti, “Apo pomunozwa kurira kwegwama, munozodaidzira mwechiti, ‘Abhusaromu ndimambo muHebroni!’ ”

¹¹ Abhusaromu wakaenda nevamuna mazana mairi (200) kubva Jerusarema; vakadaidzwa kuita vaeni, vakaenda vasikazii chiro.

¹² Naapo Abhusaromu paaipisha midiro, wakadaidza Ahithoferi muGiro, gota raDhavhidha, kubva kudhorobha rake Giro. Bangano rokumukira mambo rakakura, ngokuti vanhu vakaangira kuwanda kunaAbhusaromu.

Dhavhidha Unotiza Kubva Jerusarema

¹³ Nhumwa yakaguma kunaDhavhidha yechiti, “Mwoyo yevanhu vaIsuraeri yaenda kunaAbhusaromu.”

¹⁴ Zvino Dhavhidha wakati kuvaranda vake veshe, avo vaiya naye muJerusarema, “Mirukai! Ngatitize, ngokuti apana naumwe ungapokonyoka kubva kunaAbhusaromu. Kasirai kutiza, ngokuti unozotibata ngokukasira, nokuunza kushata padera pedu, nokurwisa dhorobha ngokupinza kweshoti.”

¹⁵ Varanda vamambo vakati kunamambo, “Ringira, varanda vako vanotenda kuita zveshe zvinogurwa ndimambo.”

¹⁶ Ndizvo mambo wakabuda, nevemhatso yake yeshe vakamuteera, ngepabanze pemabunha ake gumi, avo vaakasiya kuti vangwarire mhatso.

¹⁷ Mambo wakabuda, nevanhu veshe vakamuteera, vakaema pamhatso yokupedzisira.

¹⁸ Nevaranda vake veshe vakapinda ngepasinde pake; navo veshe vaKherethi, vaPherethi veshe, nevaGithi veshe mazana matanhatu (600), avo vakamuteera kubva Gathi, vakapinda kutanga mberi kwamambo.

¹⁹ Zvino mambo wakati kunaIthai muGithi, “Ngenyi iwewe wechihamba nesu? Hwirira kundau yako, woogara namambo; ngokuti iwewe uri mupara nouwo wakadzingwa kubva kunyika yake.

²⁰ Ngokuti wakaguma zuro, kwakanaka here kuti ndikutore, uhambehambe nesu nyamashi, apo ndechienda pendingakona? Chihwirira sure, utore hama dzako; nyasha negwinyiso ngazvigare newe.”

²¹ Asi Ithai wakapingura mambo echiti, “Kudai ngezvaanopona Mambo Mwari namakosi wangu mambo achapona, kunyazwi ngepari paanoenda makosi wangu mambo, kunyazwi mukufa nokuti mukupona, naapo muranda wako unozoapowo.”

²² Dhavhidha wakati kunaIthai, “Enda zvino, uhambe.” Ndizvo Ithai muGithi wakahamba nevanhu vake veshe nevana vadoko veshe vaiya naye.

²³ Nyika yeshe yakachema ngeizwi gurutu, nevanhu veshe vakaenda; mambo emene wakaambuka mufuya Kedhironi, nevanhu veshe vakaambuka ngenjira inoenda mushango.

²⁴ Ringira, Zadhoki, navaRevhi veshe vaiya naye, vechitwara bhokisi rechitenderano chaMwari; navo vakagadzika pashi bhokisi rechitenderano chaMwari; Abhiatha wakakwira metsa vanhu veshe vakapera kubuda kudhorobha.

²⁵ Zvino mambo wakati kunaZadhoki, “Hwirinzai bhokisi rechitenderano chaMwari kudhorobha. Kudai ndechiona nyasha mukuona kwaMambo Mwari, unozondiunzazve, nokurionisa kwendiri, nokundionisa pandau perinogara.

²⁶ Asi kudai echizoti, ‘Andizi kudakara ndiwe;’ ringira, ndiri pano, ngaaite kudai ngezvaanoda ndini.”

²⁷ Mambo wakatizve kunaZadhoki mupristi, “Ringira, hwirira kudhorobha ngokunyarara, iwewe naAbhiatha nevakororo vako vairi, Ahimaazi mukororo wako, naJonathani mukororo waAbhiatha.

²⁸ Wona, ndinozogara pazambuko reshango, metsa rigume izwi rinobva kwouri kundiziisa.”

²⁹ Ndizvo Zadhoki naAbhiatha vakahwirinza bhokisi rechitenderano chaMwari Jerusarema vakagarayo.

³⁰ Asi Dhavhidha wakakwira ngenjira inokwira Mutunhu wemaOrivhi, echichema mukukwira kwake, akafukidza soro rake, asina magwada patsoka; nevanhu veshe vaiya naye vakafukidza masoro avo, vakakwira vachichema mukuhamba kwavo.

³¹ Dhavhidha wakaronzerwa kuti, “Ahithoferi uri mukati mwebangano raAbhusaromu.” NaDhavhidha wakati, “A Mambo Mwari, ndinokupota, shandurai kupanga kwaAhithoferi kuita upenzi.”

³² Naapo Dhavhidha aguma padera pomutunhu, apo paidirwa Mwari, ringira Hushai muAkhi wakauya kooshongana naDhavhidha, anebhachi rake rakabaurwa, nemavhu pasoro rake.

³³ Dhavhidha wakati kwaari, “Kudai wechizohamba neni, ungazoita mutwaro kwendiri.

³⁴ Asi kudai wechipetuka kudhorobha, wechizoti kunaAbhusaromu, ‘Ndinozoita muranda wako, A mambo; kudai ngezvendaiya muranda wababa ako karetu, ngokudarozve ndinozoita muranda wako;’ ngokudaro unozorambidza kupanga kwaAhithoferi.

³⁵ Vapristi Zadhoki naAbhiatha vanozoapo newe. Ndizvo kunyazwi chiinyi chounozozwa kubva kumhatso yamambo, unozozvironzera Zadhoki naAbhiatha vapristi.

³⁶ Ringira, vanavo vakororo vavo vairi, Ahimaazi mukororo waZadhoki naJonathani mukororo waAbhiatha. Kubudikidza ndivo munozotumira kwendiri zveshe zvomunozozwa.”

³⁷ Ndizvo Hushai, mungani waDhavhidha wakaguma kudhorobha, naAbhusaromu wakauya Jerusarema.