2 Sam. 14 - Bhaibheri Rakachena muChindau

Joabhi Unonasirira Kupetuka kwaAbhusaromu

¹ Zvino Joabhi mukororo waZeruia wakaona kuti mwoyo wamambo waidisisa Abhusaromu.

² Joabhi wakatumira vanhu kuThekoa, vakaunza kubveyo mukadzi wakangwara. Wakati kwaari, “Ndinokupota, udziitise mutsumbi, upfeke ngubo dzechiriro, usadzidzodza ngemafuta, asi ita kudai ngomukadzi waitsumba wakafa mukuwo wakareba.

³ Uende kunamambo nokuereketa kudai kwaari.” Ndizvo Joabhi wakamupanga mazwi.

⁴ Naapo mukadzi weThekoa wakauya kunamambo, wakawa pashi ngehope yake pamavhu, wakagwadama echiti, “Detsera, A mambo!”

⁵ Mambo wakati kwaari, “Chiinyi chinokutambudza?” Naye wakapingura echiti, “Ngegwinyiso ndiri shirikadzi, nemwamuna wangu wakafa.

⁶ Murandakadzi wako waiya nevakororo vairi, vakarwa mushango, pasina munhu wokuvaparadzanisa. Umwe wakachaya umweni, akamuuraya.

⁷ Ringira, zvino mhuri yeshe inomukira murandakadzi wako. Vanoti, ‘Tipe uwo wakauraya munun'una wake, kuti timuuraye ngendaa yokupona kwomunun'una wake waakauraya; kunyazwi tinozouraya uwo unogara nhakawo.’ Ndizvo vanozodzima simbe rangu rasara, avasiiri mwamuna wangu zina nokuti chicherechedziso munyika.”

⁸ Zvino mambo wakati kunomukadzi, “Enda kumhatso yako, neni ndinozopanga ngendaa yako.”

⁹ Mukadzi weThekoa wakati kunamambo, “Tenzi wangu, A mambo, kushata ngakugare padera pangu, nepemhatso yababa angu; mambo nedendemaro rake zvisazoa nendaa.”

¹⁰ Mambo wakati, “Uwo unokutambudza muunze kwendiri, naye aazokutambudzizve.”

¹¹ Zvino wakati, “Ndinokupota, mambo ngaacherechedze Mambo Mwari, Mwari wako, kuti vaunzidziri vengazi vasasaurayazve nomukororo wangu asazoparadzwa.” Mambo wakati, “Kudai ngezvaanopona Mambo Mwari, akuzowi pashi norubvudzi rwomukororo wako.”

¹² Naapo mukadzi wakati, “Tendera murandakadzi wako kuti aerekete izwi rimwe kunamakosi wangu mambo.” Mambo wakati, “Ereketa.”

¹³ Mukadzi wakati, “Ndizvo ngenyi zvino wechipinimidza chiro chakadai kuitira vanhu vaMwari? Ngokuti mambo unoereketa izvi kudai ngoumwe unendaa, ngokuti mambo aazi kuunza kanyizve uwo wakadzingwa wake.

¹⁴ Tinosisira kufa teshe, takadai ngemvura inorashwa pamavhu, iyo isikachaunganidzwi. Asi Mwari aazotoreri munhu ndaramo, asi unozoronga mazano okuti wakarashwa asazogara akarashwa kubva kwaari.

¹⁵ Zvino ndauya kooronza izvi kunamakosi wangu mambo, ngokuti vanhu vakandiita kuti nditye; nomurandakadzi wako wakapinimidza echiti, ‘Ndinozoereketa kunamambo; pamweni mambo ungazoita icho chinoronzwa ngomurandakadzi wake.

¹⁶ Ngokuti mambo unozozwa nokusunhura murandakadzi wake kubva kunyara yomunhu unoda kundiuraya, inini nomukororo wangu kubva kunhaka yaMwari.’

¹⁷ Murandakadzi wako wakapinimidza akati, ‘Izwi ramakosi wangu mambo rinozondizorodza;’ ngokuti makosi wangu mambo wakadai ngengirosi yaMwari, unokona kuparadzanisa pakati pezvakanaka nezvakashata. Mambo Mwari, Mwari wako ngaagare newe.”

¹⁸ Zvino mambo wakapingura mukadzi echiti, “Usandifishira chiro chendinobvunza kwouri.” Mukadzi wakati, “Makosi wangu mambo ngaaerekete.”

¹⁹ Mambo wakati, “Nyara yaJoabhi inewe here mukati mweizvi zveshe?” Mukadzi wakapingura, akati, “Kudai ngezvounopona makosi wangu mambo, akuna naumwe ungapaukira kumudyo nokuti kumuoshwe kubva kuneizvo zvakaereketwa ndimakosi wangu mambo. Ngokuti ndiye muranda wako Joabhi wakandipanga, ndiye wakaisa pamuromo womurandakadzi wako aya mazwi.

²⁰ Joabhi muranda wako wakaita izvi kushandura zviripo. Asi mambo wangu wakangwara kudai ngokungwara kwengirosi yaMwari kuzia zviro zveshe zviri munyika.”

²¹ Zvino mambo wakati kunaJoabhi, “Ringira zvino, ndatendera ichi; enda, uunzezve jaha Abhusaromu.”

²² Joabhi wakawa ngehope pashi, wakagwadama akafumisa mambo; naJoabhi wakati, “Nyamashi muranda wako unozia kuti ndaona nyasha pamberi pako, makosi wangu mambo, ngokuti mambo wapingura chakakumbirwa ngomuranda wake.”

²³ Ndizvo Joabhi wakamiruka, wakaenda Geshuri, wakaunza Abhusaromu Jerusarema.

²⁴ Mambo wakati, “Ngaaende kumhatso yake, asazoona hope yangu.” Ndizvo Abhusaromu wakaenda kumhatso yake, asikazi kuona hope yamambo.

Abhusaromu Unoiyaniswa kunaDhavhidha

²⁵ Zvino muIsuraeri mweshe mwaiya musina munhu waikudzwa ngounaku hwake kudai ndiAbhusaromu; ngokuti kubvira kutsoka dzake metsa kuguma kusoro rake paiya pasina chakashata.

²⁶ Naapo ogunda bvudzi resoro rake (ngokuti ngokupera kwegore ngendaa yokurema kwebvudzi rake wairigunda,) wakapima bvudzi resoro rake pachipimo, rairema kupinda makhirogramu mairi, kudai ngokupima kwechipimo chamambo.

²⁷ Abhusaromu wakaberekerwa vakororo vatatu, nemwanasikana umwe, zina rake ndiThamari. Waiya musikana wakanaka kuringirika.

²⁸ Ndizvo Abhusaromu wakagara muJerusarema makore mairi akazara, asikazi kuona hope yamambo.

²⁹ Zvino Abhusaromu wakatumira izwi kunaJoabhi, kuti iye amugumise kunamambo; asi Joabhi aazi kutenda kuti auye kwaari. Wakamutumirazve kwechipiri, asi Joabhi aazi kuuya.

³⁰ Zvino wakati kuvaranda vake, “Ringirai, munda waJoabhi uri pasinde nowangu, naye unebharimwo; endai mwoupisha ngomuriro.” Ndizvo varanda vaAbhusaromu vakapisha munda wake ngomuriro.

³¹ Zvino Joabhi wakamiruka, akauya kunaAbhusaromu kumhatso yake, wakati kwaari, “Ngenyi varanda vako vapisha munda wangu?”

³² Abhusaromu wakapingura Joabhi, akati, “Ringira, ndakakudaidza ndechiti, ‘Uya kwendiri kuti ndikutume kunamambo nomubvunzo kuti ndakaunzirwenyi kubva Geshuri? Zvaiya zvakanaka kwendiri kuti ndindogareyo.’ Zvino ngandione hope yamambo; kuti kuripo kushata kwendiri, ngaandiuraye.”.

³³ Zvino Joabhi wakaenda kunamambo, akamuronzera; naapo wakadaidza Abhusaromu. Ndizvo wakauya kunamambo, akakotamisa hope yake pashi pamberi pamambo; namambo wakachingamidza Abhusaromu ngomuromo.