2 Sam. 12 - Bhaibheri Rakachena muChindau

Izwi raNathani noKutenderuka kwaDhavhidha

¹ Mambo Mwari wakatuma Nathani kunaDhavhidha. Wakaguma kwaari, wakati kwaari, “Kwaiyapo nevamuna vairi mudhorobha rimweni, umwe waiya mupfumi noumweni waiya murombo.

² Mupfumi waiya nezvifuyo zvakawanda kakurutu makwai nen'ombe;

³ asi murombo waiya asina chiro, kwega kakwai kanobereka, ako kaakatenga nokukarera. Kakakura naye pamwepo nevana vake; kakadya kudya kwake, kakamwira mutsani yake, kakaata paditi pake, kaiya kakadai ngomwanasikana kwaari.

⁴ Zvino kwakaguma muyeni kumupfumi, naye aazi kutora kubva kuzvifuyo zvake, kuti auraire muyeni wakamuhambira; asi wakatora kakwai komurombo, wakauraira uwo wakamuhambira.”

⁵ Zvino ushungu hwaDhavhidha hwakabaka kunouwo munhu. Wakati kunaNathani, “Kudai ngezvaanopona Mambo Mwari, uwo munhu wakaita kudaro unosisira kufa.

⁶ Unozokahwirinzira karongomuna ako kakwai, ngokuti wakaita ichi chiro, ngokuti aazi kumuitira nyasha.”

⁷ Nathani wakati kunaDhavhidha, “Ndiwe uwo munhu! Unoronza izvi Mambo Mwari, Mwari waIsuraeri: Ndakakudzodza kuti uite mambo padera paIsuraeri, neni ndakakusunhura kubva munyara dzaSauri.

⁸ Ndakakupa mhatso yamambo wako, navakadzi vamambo wako paditi rako, ndakakupa mhatso yaIsuraeri neyaJudha; nazvo, kudai izvo zvisikazi kukwana, ndaizokututsirazve icho neicho.

⁹ Ngenyi zvino wakashoora mupango waMambo Mwari, kuti uite zvakashata kudai mukuona kwake? Wakauraya Uria muHiti ngeshoti, ukatora mukadzi wake kuti aite mukadzi wako, ukamuuraya ngeshoti yevana vaAmoni.

¹⁰ Ndizvo zvino shoti aizobvi mumhatso mwako; ngokuti wakandishoora, wakatora mukadzi waUria muHiti, kuita mukadzi wako.

¹¹ Unoronza izvi Mambo Mwari: Ringira, ndinozomusa kushata kwouri kubva mumhatso yako, ndinozotora vakadzi vako pamberi pemadziso ako, ndivape kumuakirwana wako, naye unozoatana nevakadzi vako mukujeka kwezuva iri.

¹² Ngokuti iwewe wakachiita ngokufishika; asi inini ndinozoita ichi chiro pamberi pevaIsuraeri veshe, nepamberi pezuva rakajeka.”

¹³ Dhavhidha wakati kunaNathani, “Ndakashaisha pamberi paMambo Mwari.” Nathani wakati kunaDhavhidha, “Zvino Mambo Mwari wakarekerera chishaishi chako; auzofi.

¹⁴ Zvakanyadaro ngokuita kwako uku ngegwinyiso watuka Mambo Mwari, mwana wounobarirwa iwewe unozofa.”

¹⁵ Nathani wakaenda kumhatso yake. Mambo Mwari wakaita kuti mwana wakabarirwa Dhavhidha ngomukadzi waUria arware kakurutu.

Mukororo waDhavhidha Unofa

¹⁶ Ndizvo Dhavhidha wakapota kunaMwari ngendaa yemwana; Dhavhidha wakaera kudya, wakapotera, akaata pashi usiku hweshe pamavhu.

¹⁷ Vakuru vemhatso yake vakamiruka, vakaenda kwaari, koomumusa kubva pamavhu; asi wakaramba, zve, aazi kudya chingwa navo.

¹⁸ Ngezuva rechinomwe mwana wakafa. Navaranda vaDhavhidha vakatya kumuronzera kuti mwana wafa; ngokuti vakati, “Ringirai, mwana achapona, takaereketa kwaari, naye aazi kupurutana izwi redu; zvino tingaita makonerenyi kumuronzera kuti mwana wafa? Pamweni ungadziremadza.”

¹⁹ Asi apo Dhavhidha aona kuti varanda vake vaiita vherevhere pachavo, Dhavhidha wakazia kuti mwana wafa. NaDhavhidha wakati kuvaranda vake, “Mwana wafa here?” Navo vakati, “Wafa.”

²⁰ Zvino Dhavhidha wakamiruka kubva pamavhu, akashamba, akadzidzodza, akapfeka machira amweni. Wakapotera mumhatso yaMambo Mwari, akadira; zvino wakaenda kumhatso yake; naapo wakada chokudya, vakaisa chokudya pamberi pake, naye wakadya.

²¹ Zvino varanda vake vakati kwaari, “Chiinyi ichi chiro chowaita? Wakaera kudya nokuchema mwana achazwa; asi apo mwana afa, wakamiruka, ukadya chingwa.”

²² Wakati, “Naapo mwana achapona, ndakaera kudya nokuchema; ngokuti ndakati, ‘Ndiani ungazia? Mambo Mwari ungaita nyasha kwendiri nemwana ungapona.’

²³ Asi zvino wafa, ndichaera kudya ngenyi? Ndingachamuunzazve here? Inini ndichaenda kwaari, asi iye aangachauyi kwendiri.”

Kubarwa kwaSoromoni

²⁴ Zvino Dhavhidha wakaembedzera mukadzi wake Bhathishebha, wakapotera kwaari wakaatana naye; naye wakabereka mukororo, wakadudza zina rake kuti Soromoni. Mambo Mwari wakamuda,

²⁵ wakatumira izwi ndiNathani muprofeti; ndizvo wakamududza kuti Jedhidhia, ngendaa yaMambo Mwari.

Dhavhidha Unonyisa Rabha

²⁶ Zvino Joabhi wakarwa neRabha revana vaAmoni, wakatora dhorobha roumambo.

²⁷ Joabhi wakatumira nhumwa kunaDhavhidha echiti, “Ndarwa neRabha, neni ndatora dhorobha remvura.

²⁸ Ndizvo zvino unganidza pamwepo vanhu vakasara, udzimike matende pasinde nedhorobha, uritore; nokuti kudai inini ndikazoritora dhorobha, naro rinozodaidzwa ngezina rangu.”

²⁹ Ndizvo Dhavhidha wakaunganidza vanhu veshe pamwepo, wakaenda Rabha, wakarwa naro, wakaritora.

³⁰ Wakatora dzungudza ramambo wavo raiya mumusoro mwake, rairema makhirogramu makumi matatu namashanu omukore, mukati mwaro mwaiya nebuwe rinomutengo mukuru; rakaiswa musoro raDhavhidha. Wakaunzazve zvakachakatwa zvakawanda kubva mudhorobha.

³¹ Wakaunza vanhu vaiyamwo, wakavaemesa kuti vashande ngesahwo, mapadza esimbi, nemasanho esimbi, nokuvatumira kuita mushando wezvidhina. Ndizvo zvaakaita kumadhorobha eshe evaAmoni. Zvino Dhavhidha nevanhu veshe vakahwirira Jerusarema.