2 Sam. 11 - Bhaibheri Rakachena muChindau

Dhavhidha naBhathishebha

¹ Muchirimo, ngomukuwo waanoenda madzimambo koorwa, Dhavhidha wakatuma Joabhi, nevaranda vake naye, pamwepo navaIsuraeri veshe; vakaparadza vana vaAmoni, vakakomba Rabha. Asi Dhavhidha wakasara muJerusarema.

² Kwakaitika zuva roobira kuti Dhavhidha wakamiruka kubva pamubhedhi wake, wakahamba padera pedenga remhatso yamambo. Wakaona mukadzi echishamba; mukadzi waiya akanaka yaamho mukuoneka kwake.

³ Dhavhidha wakatuma munhu koobvunza ngendaa yomukadzi. Noumweni wakati, “Uyu andiye Bhathishebha mwanasikana waEriamu, mukadzi waUria muHiti here?”

⁴ Ndizvo Dhavhidha wakatuma nhumwa koomutora, naye wakauya kwaari, wakaatana naye; (ngokuti waiya acheneswa kubva pakusikasukika kwake.) Naye wakahwirira kanyi kwake.

⁵ Mukadzi wakaita mimba, wakatumira izwi kooronzera Dhavhidha echiti, “Ndaanemimba.”

⁶ Ndizvo Dhavhidha wakatumira izwi kunaJoabhi, echiti, “Nditumire Uria muHiti.” NaJoabhi wakatumira Uria kunaDhavhidha.

⁷ Naapo Uria aguma kwaari, Dhavhidha wakabvunza kuti Joabhi wakadini nevanhu, nokuti hondo yakaitawani.

⁸ Zvino Dhavhidha wakati kunaUria, “Dzaka kumhatso yako, ugeze tsoka dzako.” Uria wakabuda kubva mumhatso yamambo, wakateerwa ngechipo chakabva kunamambo.

⁹ Asi Uria wakaata pamusiwo wemhatso yamambo pamwepo nevaranda vamambo wake, aazi kudzaka kumhatso yake.

¹⁰ Naapo vakaronzera Dhavhidha vechiti, “Uria aazi kudzaka kumhatso yake,” Dhavhidha wakati kunaUria, “Iwewe wauya kubva kumuhambo. Ngenyi usikazi kudzaka kumhatso yako?”

¹¹ Uria wakati kunaDhavhidha, “Bhokisi rechitenderano chaMambo Mwari, Isuraeri, Judha, namambo wangu Joabhi vanogara mumatende, navaranda vamambo wangu vanogara pamhene mushango; ndingaita maenderenyi kumhatso yangu, ndidye, nokumwa, nokuata nomukadzi wangu? Kudai ngezvounopona, nomweya wako unopona, andizoiti chiro chakadaro.”

¹² Zvino Dhavhidha wakati kunaUria, “Gara panozve nyamashi, nechimangwani ndinozokurekera kuti uende.” Ndizvo Uria wakagara muJerusarema ngeiro zuva nechimangwani.

¹³ Dhavhidha wakamudaidza koodya nokumwa pamberi pake, naye wakamuita kuti aradze; nomumadeekoni wakabuda kooata pamubhedhi wake, pamwepo navaranda vamambo wake, asi aazi kudzaka kumhatso yake.

¹⁴ Mumangwanani Dhavhidha wakanyora tsamba kunaJoabhi, wakaitumira ngenyara dzaUria.

¹⁵ Wakanyora mutsamba echiti, “Emesa Uria pandau yepamberi peinopisha hondo, zvino mupetuke sure mumurekerepo, kuti abaiwe afe.”

¹⁶ Naapo Joabhi paaitendenedza dhorobha, wakaemesa Uria pandau yaaizia kuti pane ngwazi dzehondo.

¹⁷ Vamuna vedhorobha vakabuda, vakarwa naJoabhi; naapo kwakawa vamweni vevaranda vaDhavhidha, Uria muHiti wakafawo.

¹⁸ Zvino Joabhi wakatumira mushumo kunaDhavhidha wezveshe zvakaitika mukurwa.

¹⁹ Wakapanga nhumwa echiti, “Apo wapedza kushumira mambo zvakaitika mukurwa,

²⁰ zvino kudai ushungu hwamambo hukabaka, naye kudai echiti kwouri, ‘Mwakakwedzera kudaro ngenyi pasinde pedhorobha koorwa? Amuzi kuzia here kuti vaizoposhera misee vari parukumbati?

²¹ Ndiani wakafura Abhimerekhi mukororo waJerubheshethi? Mudzimai aazi kukandira guyo padera pake here kubva parukumbati, kuitira kuti afe muThebhezi? Mwakakwedzera ngenyi pasinde porukumbati?’ Zvino unozoti, ‘Muranda wako Uria muHiti wakafawo.’ ”

²² Ndizvo nhumwa yakaenda, yakaguma, ikaronzera Dhavhidha izvo zveshe zvaakatumirwa ndiJoabhi kuti aronze.

²³ Nhumwa yakati kunaDhavhidha, “Ngegwinyiso vanhu vakatinyisa, vakauya kwetiri murubaya, asi nesuwo takavarumbirira metsa koopinda pamusiwo wedhorobha.

²⁴ Vafuri vakaposhera misee kufura varanda vako kubva parukumbati; vamweni vevaranda vamambo vakafa, nomuranda wako Uria muHiti wakafawo.”

²⁵ Dhavhidha wakati kunonhumwa, “Unozoronzera izvi kunaJoabhi kuti, ‘Ndaa iyi isakutambudza, ngokuti shoti zvino inouraya umwe pano naapo umweni; gwinyisa hondo yako kurwa nedhorobha, urinyise.’ Newe umugwinyise.”

²⁶ Naapo mukadzi waUria azwa kuti Uria mwamuna wake wafa, wakachema mwamuna wake.

²⁷ Naapo chiriro chapera, Dhavhidha wakatuma nhumwa koomutora nokumuunza kumhatso yake, naye wakaita mukadzi wake, wakamuberekera mukororo. Asi chiro ichi chakaitwa ndiDhavhidha achizi kunaka pamberi paMambo Mwari.