2 Sam. 10 - Bhaibheri Rakachena muChindau

Dhavhidha Unonyisa VaAmoni neVaAramu

¹ Ngesure kweizvi, mambo wevaAmoni wakafa, nomukororo wake Hanuni wakatonga pandau yake.

² Dhavhidha wakati, “Ndinozoita zvakanaka kunaHanuni mukororo waNahashi, ngokuti baba ake vakaita zvakanaka kwendiri.” Ndizvo Dhavhidha wakatuma varanda vake kuti vamuembedzere ngendaa yababa ake. Naapo varanda vaDhavhidha pevakaguma munyika yevana vaAmoni,

³ makota evana vaAmoni vakati kunaHanuni mambo wavo, “Unopinimidza kuti Dhavhidha unoremeredza baba ako, ngokutuma vaembedzeri kwouri here? Dhavhidha aazi kutuma here varanda vake kwouri, kuti vadongorere dhorobha, kuriringisisa, kuti arinyise?”

⁴ Ndizvo Hanuni wakabata varanda vaDhavhidha, wakapara rupande rwendebvu dzavo umwe ngaumwe, wakacheka zvokusimira zvavo ngepakati panhunji dzavo, wakavaendesa.

⁵ Naapo paakaronzerwa Dhavhidha, wakatuma vanhu kooshongana navo, ngokuti vanhu vakatsverudzwa kakurutu. Mambo wakati, “Garai Jerikho, metsa ndebvu dzenyu dzakura, nemwi munozopetuka uno.”

⁶ Naapo vana vaAmoni vaona kuti vainuhwa pamberi paDhavhidha, vana vaAmoni vakatuma koothora kuti vavabhadhare mare vaAramu veBhethirehobhi, nevaAramu veZobha, vaiya makumi mairi emakumi emazana (20,000) evarwi vaihamba ngetsoka, nevamambo Maakha gumi rimwe remazana (1,000), nevanhu vaTobhi vaiya makumi emazana gumi namairi (12,000).

⁷ Naapo Dhavhidha azwa izvi, wakatuma Joabhi nehondo yeshe yengwazi.

⁸ VaAmoni vakabuda, vakaemesa hondo yavo pokupinda ndipo pamusiwo; asi vaAramu veZobha nevokwaRehobhi, nevanhu vaTobhi, nevaMaakha, vaiya ngokwavo mushango.

⁹ Naapo Joabhi aona kuti hondo dzakamutendenedza mberi nesure, wakatsanangura vamuna vaIsuraeri vakagwinya, wakavaemesa kuti varwe nevaAramu;

¹⁰ vanhu vake vamweni vakasara wakavapa munyara yaAbhishai munun'una wake kuti avaemese kurwa nevana vaAmoni.

¹¹ Wakati, “Kudai vana vaAramu vechizondikurira, zvino iwewe unozondidetsera; asi kudai vana vaAmoni vechizokukurira, neni ndinozouya kookudetsera.

¹² Shingai, ngatigwinye, tirwire vanhu vedu nemadhorobha aMwari wedu; naMambo Mwari ngaamuitire icho chinooneka chakanaka kwaari.”

¹³ Ndizvo Joabhi nevanhu vaiya naye vakakwedzera pasinde kurwa nevaAramu; navo vakatiza kubva pamberi pake.

¹⁴ Naapo vana vaAmoni vaona kuti vaAramu vatiza, navowo vakatiza kubva pamberi paAbhishai, vakapotera mudhorobha. Zvino Joabhi wakahwirira kubva koorwa nevana vaAmoni, wakauya Jerusarema.

¹⁵ Asi apo vaAramu vaona kuti vanyiswa pamberi pevaIsuraeri, vakadziunganidza pamwepo.

¹⁶ Hadhadheza wakatuma vanhu kootora vaAramu vaiya ruseri rwomufuya Yufratesi; vakauya Heramu, naShobhakhi, nduna yehondo yaHadhadheza, yakahamba pamberi pavo.

¹⁷ Naapo pezvakaronzwa kunaDhavhidha, wakaunganidza vaIsuraeri veshe, wakaambuka Jorodhani, wakaguma Heramu. VaAramu vakadziemesa kurwa naDhavhidha, vakarwa naye.

¹⁸ VaAramu vakatiza kubva pamberi pevaIsuraeri, naDhavhidha wakauraya vanhu vezvikwata zvengoro dzevaAramu mazana manomwe (700), vevagadhi vemahachi makumi marongomuna emakumi emazana (40,000), naye wakabaya Shobhakhi, nduna yehondo yavo, naye wakafirapo.

¹⁹ Naapo madzimambo eshe vaiya varanda kunaHadhadheza vakaona kuti vanyiswa pamberi pevaIsuraeri, vakatenderana kunyarara nevaIsuraeri, vakavashandira. Ndizvo vaAramu vakatya kuzodetsera vana vaAmoni mhera nariini.