2 Pet. 3 - Bhaibheri Rakachena muChindau

Chigondiso choKuuya kwaMambo

¹ Vanodikanwa, zvino iyi iri tsamba yechipiri yendinonyora kwomuri; mwedziri ndinoda kumusirira mipinimidzo yenyu inegwinyiso ngokumukarakadzisa

² kuti munosisira kukarakadza mazwi akaereketwa karetu ngevaprofeti vakachena, nomupango waMambo noMuponesi waakaereketa kubudikidza ngevapostori venyu.

³ Pakutanga munosisira kuzwisisa izvi, kuti ngemazuva okugumisira vanoita jee vanozouya nejee, vechihamba ngokuemura kwavo,

⁴ vechiti, “Chigondiso chokuuya kwake chiri pari? Ngokuti kubvira panguva yevakaata madzibaba edu, zveshe zviro zvinondogara kudai ngomugarire wazvo kubvira pakutanga pokusikwa!”

⁵ Ngokuti ngemaune vanoriyarwa ndaa iyi, kuti ngeizwi raMwari matenga aiyapo karetu nenyika ngokudaro, yechibudiswa mumvura kubudikidza ngemvura,

⁶ kubudikidza ndiyo nyika yenguvayo yaiyapo yechidumaidzwa ngemvura, nayo yakaparadzwa.

⁷ Asi ngeizwi rimwero aripo matenga nenyika zvakangwaririrwa muriro, zvechingwarirwa metsa zuva rokutongwa nerokuparadzwa kwavanhu vasikadiri Mwari.

⁸ Asi, vanodikanwa, musariyarwa chiro chimwe ichi, kuti kunaMambo zuva rimwe rakadai ngegumi remazana emakore, negumi remazana emakore akadai ngezuva rimwe.

⁹ Mambo aanonoki kuita chigondiso chake, kudai ngenjira yevanoti vamweni unononoka, asi unosengerera kwomuri, asikadi kuti naumwe arashwe, asi kuti veshe vatenderuke.

¹⁰ Asi zuva raMambo rinozoguma kudai ngembavha; naapo matenga anozopinda nokutinhira kukuru, nezvomudenga zvinozonyunguruka ngokupishwa ngomuriro, nenyika nemishando iri mukati mwayo zvinozopishwa.

¹¹ Kwechioneka kuti izvi zveshe zvinonyunguruka kudaro, kunosisira kuti muite vanhu vakaitawani mukupona kweshe kwakachena nomukudira Mwari,

¹² mwechikarira nokushuwira kuuya kwezuva raMwari, ngendaa yaro matenga echibaka anozonyunguruka, nezvomudenga zvinozonyunguruka ngokupishwa ngomuriro?

¹³ Asi kudai ngechigondiso chake, tinokarira matenga matsva nenyika itsva, umwo munogara kururama.

Kupanga kwoKugumisira neNyasha

¹⁴ Ndizvo, vanodikanwa, kwechioneka kuti munokarira zviro zvakadaro, tsamwirirai kuti muoneke ndiye muri mukunyarara, musina ara nendaa;

¹⁵ muerenge kuti kusengerera kwaMambo wedu ruponeso. Ndizvo mukoma wedu unodikanwa Phauri wakamunyorera kudai ngoungwaru hwakapuwa kwaari,

¹⁶ kuereketa ngeizvi kudai ngezvaakaronza mutsamba dzake dzeshe. Munezviro zvimweni zvinokonza kuzwisisa, izvo vasikazii nevasina simba vanozvikunukudza, kudai ngezvevanoitazve kune zvinyorwa zvimweni, vechidziunzira kurashwa kwavo.

¹⁷ Ndizvo imwimwi vanodikanwa, mwakapangiwa karetu, ngwarai kuti murekere kutorwa nokupauswa ngevanhu vasina tsika, mupauke kubva mukutsima kwenyu.

¹⁸ Asi kurai munyasha nomukuzia Mambo wedu noMuponesi Jesu Kristu. Kwaari ngaugare uripo uthende zvino nemhera nariini nariini. Ameni.