2 Pet. 2 - Bhaibheri Rakachena muChindau

Vaprofeti voKunyepa noKuororwa Kwavo

¹ Asi vaprofeti vokunyepa vakabudapo pakati pevanhu, kudai ngezvevanozoapo vadzidzisi vokunyepa pakati penyu, vanozopotedza ngokufishika zvidzidziso zvinoparadza. Vanozoramba Mambo emene wakavatenga, vechidziunzira padera pavo kuparadzwa kunokasira.

² Vazhinji vanozoteera njira dzavo dzakashata; ngendaa yeava vadzidzisi njira yegwinyiso inozoreyiwa.

³ Mukuemura kwavo vanozomuchengedzera ngemazwi okudziitisa. Kutongwa kwavo kwakaronzwa kubvira karetu akunonoki nokurashwa kwavo akuati.

⁴ Ngokuti kudai Mwari asikazi kukungurira ngirosi pedzakashaisha, asi wakadzikandira mumurindi wakapindisisa kudzama, kuti dzingwaririrwe kutongwa muzvisungo zvechidima;

⁵ kudai asikazi kukungurira nyika yekaretu, asi wakangwarira Noa, muchumairi wokururama, pamwepo nevamweni vanomwe, apo paakaunza ndambi padera penyika yevasikadiri Mwari;

⁶ naye echishandura madhorobha eSodhoma neGomora kuita marota wakaaparadza ngokuapisha ngomuriro, akaaita chionero chezvinozoitika kwavari vasikadiri Mwari;

⁷ kudai akanunura Roti munhu wakarurarama, wakatambudzika kakurutu ngokupona mukuemura kwevakashata,

⁸ (ngokuti munhu uwo wakarurama, echigara pakati pavo zuva ngezuva, wakatambudzika mumweya wake wakarurama zuva ngezuva ngezviito zvavo zvisikazi kururama izvo zvaakaona nokuzwa),

⁹ Mambo unozia njira yokununura vanodira Mwari kubva mukuedzwa nokungwarira vasikazi kururama pashi pokuororwa metsa rigume zuva rokutongwa,

¹⁰ asi kakurutu avo vanohamba ngezvenyama mukuemura kunosvipisa, vechishoora vane simba. Vakatsunga, vanoita kuda kwavo, avatyi kutuka vakuru,

¹¹ apo ngirosi kunyazwi dzinopinda ngoukuru nesimba, adziunzi kutonga kwokuvatuka pamberi pavo kunobva kunaMambo.

¹² Vanhu ava, vakadai ngemhuka dzisina mipinimidzo dzakabarwa kuti dzibatwe, dziurawe. Vanotuka ngendaa dzevasikazwisisi, navo vachaparadzwa mukuora kwavo.

¹³ Vanozoitirwa zvisikazi kururama kuita musharo wavo wokuita zvisikazi kururama. Vanoti kutamba masikati, ndikwo kudakara. Vari maara nemaonje anonyangadza, vechidakara ngokuchengedzera kwavo apo pevanodya nemwi.

¹⁴ Vane madziso akazara ngokuomba, vasikakoni kurekera kushaisha. Vanonyengerera mweya isikazi kugwinya. Vane mwoyo yakarovedzera mukuemura. Vana vokutukwa!

¹⁵ Vakasiya njira yakarurama navo vakapauka, vechiteera njira yaBharamu, mukororo waBheo, uwo wakada musharo wokuita zvakashata.

¹⁶ Asi wakatukwa ngendaa yokupauka kwake; mbongoro isikakoni kuereketa yakaereketa ngeizwi romunhu, nayo yakarambidza kupenga kwomuprofeti.

¹⁷ Ava zvinyuka zvisina mvura nemhute inosundwa ngomubvumo; avo vakangwaririrwa chidima chakasvipa.

¹⁸ Ngokuti vanoereketa mazwi makuru okudzikudza asina shwiro, vanonyengerera mukuemura kwenyama vanhu avo vatopokonyoka kubva kwavari vanogara mukupauka.

¹⁹ Vanovagondisa kusunhurika, asi ivo pachavo ihloko dzokuora; ngokuti munhu unoitwa hloko ngomunhu, kunyazwi ngouri waanonyiswa ndiye.

²⁰ Ngokuti kudai vakapokonyoka kubva kuizvo zvinosvipisa zvenyika kubudikidza ngokuzia Mambo noMuponesi Jesu Kristu, vechikodyaniswazve mwezviri nokunyiswa, chiemo chavo chokugumisira chinoita chakashata kupinda chokutanga.

²¹ Ngokuti kwaiya kwakapinda kunaka kwavari kudai vasikazi kuzia njira yokururama, pano kuti vaizia, vopetuka sure kubva kumupango wakachena uwo wakapirwa kwavari.

²² Kwakaitika kwavari kudai ngemazwi akangwara anegwinyiso anoti, “Imbwa yahwirirazve kumarutsi ayo,” nokuti “Nguruve yakasukwa yahwirirazve kooumbururuka mumatope.”