2 MaKro. 9 - Bhaibheri Rakachena muChindau

Kuhambira kwaMambokadzi weShebha

¹ Naapo mambokadzi weShebha akazwa ngembiri yaSoromoni, wakauya Jerusarema kooedza Soromoni ngemibvunzo yaiya yakakonza, anembungano huru, nemakamera aitwara makha, nomukore wakawanda kakurutu, nemapuwe anomutengo mukuru. Naapo aguma kunaSoromoni, wakaereketa naye ngeizvo zveshe zvaiya mumwoyo mwake.

² Soromoni wakapingura yeshe mibvunzo yake; paiya pasina chaiya chakafishika kunaSoromoni chaasikazi kumuronzera.

³ Naapo mambokadzi weShebha aona kungwara kwaSoromoni, nemhatso iyo yaakaaka,

⁴ kudya kwaiya patafura rake, kugara kwevakaita vatungamiriri vake, kuema kwevashandi vake, nezvokupfeka zvavo, vatwari vake vezvidziyo, nezvokupfeka zvavo, nemidiro yake yokupisha iyo yaakapira mumhatso yaMambo Mwari, mweya wake weshe wakaomerwa.

⁵ Ndizvo wakati kunamambo, “Mushumo waiya negwinyiso wendakazwa ndiri munyika yangu ngezviito zvako, nokungwara kwako.

⁶ Asi andizi kutenda mushumo wavo, metsa ndaguma ndemene, ndazvionera ngemadziso angu. Andizi kumboronzerwa norupande rwoukuru hwako noungwaru hwako; ngokuti unopinda kakurutu kukura kunembiri yendakazwa.

⁷ Vanomuchena vanhu vako! Vanomuchena ava varanda vako, vanoangira kuema pamberi pako, vechizwa ungwaru hwako!

⁸ Ngaakudzwe Mambo Mwari, Mwari wako, uwo wakadakara ndiwe, akakugadzika padendemaro rake, kuti uite mambo waMambo Mwari, Mwari wako. Ngokuti Mwari wako wakada Isuraeri, kuti amugwinyise mhera nariini, ndizvo wakakuita mambo padera pake, kuti uite kutonga kwakwo nokururama.”

⁹ Zvino wakapa mambo Soromoni mukore waipinda makhirogramu makumi emazana marongomuna (4,000), nemitombo inegwema rakanaka kakurutu, nemapuwe anomutengo mukuru; kwaiya kusinazve makha akadaro aakapuwa Soromoni ndimambokadzi weShebha.

¹⁰ Nevaranda vaHiramu, nevaranda vaSoromoni vakaunza mukore kubva Ofiri, matanda earigumu, nemapuwe anomutengo mukuru.

¹¹ Namambo wakanasira kubva kumatanda earigumu zvikwiriso zvokukwira ndizvo kumhatso yaMambo Mwari, nokungome yamambo, nezvidangari nemagitari evaembi. Akuzi kumbooneka zvakadai ndizvo karetu munyika yaJudha.

¹² Naapo mambo Soromoni wakapa kunamambokadzi weShebha zveshe zvaaiya nedanha nazvo, zvakapinda zveshe zvaakauya nazvo kunamambo. Ndizvo wakahwirira kunyika yake, iye navaranda vake.

Upfumi hwaMambo Soromoni

¹³ Uremu hwomukore wakaunzwa kunaSoromoni ngegore rimwe waipinda makhirogramu makumi mairi nematatu emakumi emazana (23,000),

¹⁴ ngepabanze pouwo wakaunzwa ngevatengi nevatengesi; nemadzimambo eshe eArabhia, nevatongi venyika vakaunza mukore nesirivha kunaSoromoni.

¹⁵ Mambo Soromoni wakaita zvihlangu mazana mairi (200) ngomukore wakapfurwa; chihlangu chimwe ngachimwe chaiya chakasetwa ngomukore wakaereswa waiya makhirogramu manomwe.

¹⁶ Wakaitazve zvihlangu zvidoko mazana matatu (300) zvakasetwa ngomukore wakapfurwa unoda kuita makhirogramu matatu chimwe ngachimwe; namambo wakazviisa mumhatso yomuGwasha yeRebhanoni.

¹⁷ Mambo wakaitazve dendemaro guru ngenyanga dzenzou, naye akariseta ngomukore wakaereswa.

¹⁸ Dendemaro raiya nezvikwiriso zvitanhatu zvokukwira padendemaro, nechitambariro chetsoka chomukore, icho chaiya chakasungirwa padendemaro, nokurutii rumwe ngerumwe rwechigaro paiya nezvitsimiso zvemioko, nemiedzaniso miiri yemhondoro dzakaema pasinde pezvitsimiso,

¹⁹ nemiedzaniso irigumi nemiiri yemhondoro yaiya yakaema umwe pamagumo echikwiriso chimwe ngachimwe pazvikwiriso zvitanhatu. Kwaiya kusinazve yakatodzana neiyo mukati mwoumambo hweshe humweni.

²⁰ Zvidziyo zveshe zvokumwira zvamambo Soromoni zvaiya zvomukore, nezvidziyo zveshe zvemhatso yomuGwasha reRebhanoni zvaiya zvomukore wakaereswa; sirivha yaiya isikaerengwi ngemazuva aSoromoni.

²¹ Ngokuti ngarava dzamambo dzakaenda Tharshishi nevaranda vaHiramu; kamwe kega pamakore matatu eshe dzaiuya ngarava dzeTharshishi dzaiya dzechiunza mukore, sirivha, nyanga dzenzou, matede, neshiri dzinozwi maphikhoki.

²² Ndizvo mambo Soromoni wakapinda eshe madzimambo omunyika ngepfuma noungwaru.

²³ Madzimambo eshe omunyika akatsvaka kuti aonane naSoromoni, kuti vazwisise ngoungwaru hwake hwaakaisa Mwari mumwoyo mwake.

²⁴ Umwe ngaumwe wavo wakauya nechipo chake, zvidziyo zvesirivha, zvidziyo zvomukore, zvokupfeka, zvokurwa ndizvo, makha, mahachi, nemanyurusi, rupande rwevakaemeserwa gore ngegore.

²⁵ NaSoromoni waiya nezvibaya zvemahachi nengoro makumi emazana marongomuna (4,000) nemahachi makumi emazana gumi namairi (12,000), awo aakaisa mumadhorobha engoro nokunamambo muJerusarema.

²⁶ Naye wakatonga padera pemadzimambo eshe kubvira kuRwizi Yufratesi metsa kuguma kunyika yevaFiristia nokumigano yeEgipite.

²⁷ Mambo wakaita kuti sirivha iwande kakurutu muJerusarema kudai ngemapuwe, nemiti yemisedhari wakaiita kuti iwande kudai ngemiti yemionde iri mumabani.

²⁸ Navo vakaunzira Soromoni mahachi kubva Egipite nokubva kunyika dzeshe.

Zviro Zveshe Zvaakaita Soromoni muKutonga Kwake

²⁹ Zvino mishando imweni yaSoromoni, kubvira yokutanga neyokugumisira, aizi kunyorwa here muBhuku raNathani muprofeti, nokuprofeta kwaAhija muShiroi nomuzvioniso zvaIdho mufemberi ngendaa yaJerobhoamu mukororo waNebhati?

³⁰ Soromoni wakatonga muJerusarema padera paIsuraeri makore makumi marongomuna.

³¹ Soromoni wakaata nemadzibaba ake, naye wakatsirwa mudhorobha raDhavhidha baba ake; naRehobhoamu mukororo wake wakatonga pandau yake.