2 MaKro. 8 - Bhaibheri Rakachena muChindau

Kubudirira kwaSoromoni

¹ Pamagumo emakore makumi mairi, umwo Soromoni mwaakaaka mhatso yaMambo Mwari nemhatso yake,

² Soromoni wakaakisa madhorobha awo akahwirinzirwa kwaari ndiHiramu, akaita kuti vana vaIsuraeri vagaremwo.

³ Soromoni wakaenda Hamathi-zobha, akarinyisa.

⁴ Wakaaka Thadhimori mushango, nawo madhorobha eshe okungwarira zviro, aakaaka muHamathi.

⁵ Wakaakazve Bhethihoroni redera naBhethihoroni rokubani, madhorobha akashosherwa, anemarukumbati, nemisiwo, nemipiningidzo,

⁶ neBhaarathi, nemadhorobha eshe okungwarira zviro aiya aSoromoni, nemadhorobha eshe engoro, nemadhorobha evagadhi vemahachi, nazvo zveshe zvaiya nedanha nazvo Soromoni kuti azviake muJerusarema, muRebhanoni, nomukati mwenyika dzeshe dzoumambo hwake.

⁷ Vanhu veshe vakasara vevaHiti, vaAmori, vaPherizi, vaHivhi nevaJebhusi, avo veshe vaiya vasiri vaIsuraeri,

⁸ vakabva kumibarirwana yavo vakasiiwa munyika, avo vasikazi kuparadzwa ngevana vaIsuraeri, avo Soromoni wakaita kuti vabhare chibharo metsa nanyamashi.

⁹ Asi kuvana vaIsuraeri Soromoni aazi kuvaita hloko dzomushando wake; vaiya vanhu vokurwa hondo, nduna huru, nenduna dzengoro dzake, nedzevagadhi vemahachi.

¹⁰ Naava ndivo vaiya vakuru venduna dzaSoromoni, vaiya mazana mairi nemakumi mashanu (250), avo vaitonga padera pevanhu.

¹¹ Soromoni wakaunza mwanasikana waFaro kubva mudhorobha raDhavhidha kumuisa mumhatso yaakamuakira, ngokuti wakati, “Mukadzi wangu aazogari mumhatso yaDhavhidha mambo waIsuraeri, ngokuti ndau idzo dzakaguma bhokisi rechitenderano chaMambo Mwari dzakachena.”

¹² Zvino Soromoni wakapira midiro yokupisha kunaMambo Mwari padera pearita raMambo Mwari iro raakaaka pamberi poruwanze,

¹³ kudai ngemabingo akaemeserwa zuva rimwe ngarimwe, anoda kuti apirwe kudai ngokupanga kwaakaita Mosi, ngemazuva eSabatha, ngemazuva okutawa kwomwedzi, nemazuva emadhiri matatu egore, dhiri rezvingwa zvisina mumera, dhiri remavhiki nedhiri remichacha.

¹⁴ Wakaemesa mabingo emishando yevapristi, neemishando yevaRevhi, kudai ngokupanga kwaDhavhidha baba ake, kuti vaite mishando yokukudza nemishando yavo yokushanda pamwepo nevapristi, kudai ngezvaidiwa pabingo rezuva ngezuva, nevangwariri vemisiwo mumabingo avo emisiwo yakawanda, ngokuti Dhavhidha munhu waMwari wakapanga kudaro.

¹⁵ Avazi kupauka kubva kunezvakapanga mambo kwevari vapristi nevaRevhi ngendaa yechiro cheshe nendaa yezviro zvoupfumi.

¹⁶ Ndizvo mushando weshe waSoromoni wakapera kubvira pazuva rokuamba rakaemeswa tsikiro remhatso yaMambo Mwari, metsa ipere. Ndizvo mhatso yaMambo Mwari yakapera zvakaperera.

¹⁷ Zvino Soromoni wakaenda Ezionigebha nokuErothi, nyika yevaEdhomu murutii rworuandhle.

¹⁸ Hiramu wakatumira kwaari ngarava ngenyara dzevaranda vake, varanda vaiya noruziyo ngendaa yoruandhle. Vakaenda Ofiri pamwepo nevaranda vaSoromoni, vakatora kubvapo makhirogramu omukore aida kupinda makumi emazana gumi nemashanu (15,000), vakaaunza kunamambo Soromoni.