2 MaKro. 7 - Bhaibheri Rakachena muChindau

Kupirwa kweTemperi

¹ Naapo Soromoni apedza kukumbira kwake, muriro wakadzaka wechibva mudenga, ukapedza mudiro wokupisha nemidiro imweni; nouthende hwaMambo Mwari hwakazadza temperi.

² Vapristi avazi kukona kupinda mumhatso yaMambo Mwari, ngokuti uthende hwaMambo Mwari hwakazadza mhatso yaMambo Mwari.

³ Naapo vana veshe vaIsuraeri vaona kudzaka kwowakaita muriro kubva mudenga, nouthende hwaMambo Mwari padera petemperi, vakadzikotamisa pashi hope dzavo pamavhu, vakadira nokukudza Mambo Mwari vechiti, “Ngokuti wakanaka, ngokuti rudo rwake runogara mhera nariini.”

⁴ Zvino mambo nevanhu veshe vakapira midiro pamberi paMambo Mwari.

⁵ Mambo Soromoni wakapira mudiro wekabi makumi mairi nemairi emakumi emazana (22,000), nezana nemakumi mairi emakumi emazana (120,000) emakwai. Ndizvo mambo nevanhu veshe vakapira mhatso yaMwari.

⁶ Vapristi vakaema mundau dzavo; nevaRevhiwo vanezviro zvokuemba ndizvo kunaMambo Mwari, izvo zvaakanasira mambo Dhavhidha kubonga Mambo Mwari ndizvo, ngokuti rudo rwake runogara mhera nariini, peshe apo Dhavhidha paaikudza ngemishando yavo. Ngepaseri pavo vapristi vakaridza magwama, nevaIsuraeri veshe vakaema.

⁷ Soromoni wakachenesa ndau yepakati poruwanze, yaiya pamberi pemhatso yaMambo Mwari; ngokuti apo wakapira midiro yokupisha, nemafuta omudiro wokuiyanisa, ngokuti arita rethusi raakaita Soromoni raiya risikakwani kupishirapo midiro yezviyo nemarupande emafuta.

⁸ Panguva iyo Soromoni wakangwarira dhiri mazuva manomwe, nevaIsuraeri veshe vanaye, mbungano hurutu, kubvira Rebho Hamathi metsa kuguma parwizi rweEgipite.

⁹ Ngezuva rechisere vakaita mushongano mukuru; ngokuti vakangwarira mudiro wokupira arita mazuva manomwe, nedhiri mazuva manomwe.

¹⁰ Ngezuva remakumi mairi nematatu romwedzi wechinomwe wakaendesa vanhu kumakanyi avo, vechidakara nokudakadzwa mumwoyo yavo ngounaku hwaMambo Mwari hwaakaonisa kunaDhavhidha nokunaSoromoni nokuvaIsuraeri, vanhu vake.

Mwari Unodzionisazve kunaSoromoni

¹¹ Ndizvo Soromoni wakapedza mhatso yaMambo Mwari nemhatso yamambo; zveshe zvaakaronga Soromoni mumwoyo mwake kuti aite zvemhatso yaMambo Mwari nezvemhatso yake, wakabudirira kuzviita.

¹² Zvino Mambo Mwari wakadzionisa kunaSoromoni usiku, akati kwaari, “Ndazwa mukumbiro wako, neni ndadzitsanangurira iyi ndau kuita mhatso yokupira midiro.

¹³ Naapo ndakonya matenga kuti mvura isanaya, nokuti ndapanga ndongwe kuti dzichakate nyika, nokuti ndatumira nhenda pakati pevanhu vangu,

¹⁴ kudai vanhu vangu vanodaidzwa ngezina rangu vechizodzipfaisa ngokwavo, vakumbire, vatsvake hope yangu, vechitenderuka kubva kunjira dzavo dzakashata; zvino ndinozozwa ndiri mudenga, ndinozorekerera kushaisha kwavo, ndiponese nyika yavo.

¹⁵ Zvino madziso angu anozobeuka nenzee dzangu dzinozopurutana mikumbiro inozokumbirwa kundau iyi.

¹⁶ Ngokuti zvino ndakatsanangura nokuchenesa iyi mhatso, kuti zina rangu rigaremwo mhera nariini; madziso angu nomwoyo wangu zvinozoapo nguva dzeshe.

¹⁷ Neiwewe, kudai wechihamba pamberi pangu, kudai ngezvaakahamba Dhavhidha baba ako, wechiita zveshe kudai ngezvendakakupanga, ukangwarira zviemeso zvangu nezvitongero zvangu,

¹⁸ zvino ndinozogwinyisa dendemaro roumambo hwako, kudai ngezvendakaita chitenderano naDhavhidha baba ako, chinoti, ‘Auzotami munhu wokuita mutongi muIsuraeri.’

¹⁹ “Asi kudai mwechizopauka, nokusiya zviemeso zvangu nemipango yangu, zvendakaisa pamberi penyu, mwechienda kooshandira zvimwari zvimweni nokuzvidira,

²⁰ zvino ndinozomubvita ngenzinde kubva kunyika yangu, yendakamupa; nemhatso iyi yendakachenesa ngendaa yezina rangu, ndinozoirasha kubva mukuona kwangu, ndinozoiita chisana nechinayi pakati pemadzinza eshe.

²¹ Ngendaa yeiyi mhatso zvino inoremeredzwa kakurutu, inozoita chishamiso kuneavo veshe vanopinda ngepeiri; ndizvo umwe ngaumwe waavo unozoti, ‘Ngenyi Mambo Mwari akaita ichi chiro kuneiyi nyika nokuneiyi mhatso?’

²² Zvino vanozoti, ‘Ngokuti vakasiya Mambo Mwari, Mwari wemadzibaba avo, uwo wakavabudisa kubva munyika yeEgipite, navo vakatora zvimwari zvimweni, vakazvidira nokuzvishandira; ndizvo wakavaunzira uku kushata kweshe padera pavo.’ ”