2 MaKro. 6 - Bhaibheri Rakachena muChindau

Kuereketa kwaSoromoni kuVanhu

¹ Zvino Soromoni wakati, “Mambo Mwari wakaronza kuti unozogara mukati mwechidima chikurutu.

² Inini ndakuakira mhatso inembiri yokugara kwako, ndau yokuti ugare mhera nariini.”

³ Zvino mambo wakatenderukira kuvanhu akafumisa mbungano yeshe yaIsuraeri; apo mbungano yeshe yaIsuraeri yakaema.

⁴ Naye wakati, “Ngaabongwe Mambo Mwari, Mwari waIsuraeri, uwo ngenyara dzake wakazadzisa izvo zvaakagondisa ngomuromo wake kunaDhavhidha baba angu echiti,

⁵ ‘Kubvira pazuva rendakabudisa vanhu vangu kubva munyika yeEgipite, andizi kutsanangura dhorobha kubva pakati pemadzinza eshe aIsuraeri mwokuti ndiakiremwo mhatso, kuti zina rangu rigaremwo; neni andizi kutsanangura naumwe kuita mutongi padera pevanhu vangu Isuraeri.

⁶ Asi ndatsanangura Jerusarema, kuti zina rangu rigaremwo, neni ndatsanangura Dhavhidha kuti aapadera pevanhu vangu Isuraeri.’

⁷ Zvino zvaiya mumwoyo waDhavhidha baba angu kuti vaakire mhatso zina raMambo Mwari, Mwari waIsuraeri.

⁸ Asi Mambo Mwari wakati kunaDhavhidha baba angu, ‘Wakaita zvakanaka mumwoyo wako kuti wakada kuakira zina rangu mhatso;

⁹ zvakanyadaro iwewe auzoaki mhatso, asi mukororo wako, uwo unozobuda kubva muchiunu chako, ndiye unozoakira zina rangu mhatso.’

¹⁰ Zvino Mambo Mwari wazadzisa chigondiso chake icho chaakaita; ngokuti inini ndakamirudzwa pandau yababa angu Dhavhidha, ndinogara padendemaro raIsuraeri, kudai ngezvaakagondisa Mambo Mwari, neni ndakaakira zina raMambo Mwari mhatso, Mwari waIsuraeri.

¹¹ Mukati mwayo ndakaisamwo bhokisi rechitenderano, umwo mukati mwaro ndimwo munechitenderano chaMambo Mwari, chaakaita nevana vaIsuraeri.”

¹² Zvino Soromoni wakaema pamberi pearita raMambo Mwari mukuona kwembungano yeshe yaIsuraeri, akatambanudza nyara dzake.

¹³ Soromoni waiya akanasira pokuemapo ngethusi, kureba kwaro, mamitha mairi nezvidoko zviiri, kupamhama kwaro, mamitha mairi nezvidoko zviiri, kukwira mudenga mitha rimwe nezvidoko zvitatu, naye waiya akariemesa ngepakati poruwanze rwemhatso; naye wakaema padera paro. Zvino wakagwadama ngemabvi ake pamberi pembungano yeshe yevaIsuraeri, akatambanudzira nyara dzake mudenga.

¹⁴ Wakati, “A Mambo Mwari, Mwari waIsuraeri, akuna Mwari umweni wakadai ndiwe mudenga nokuti munyika, unongwarira chitenderano, mwechionisa rudo rwakagwinya kuvaranda vako, vanohamba pamberi pako ngomwoyo weshe.

¹⁵ Iwewe wakangwaririra muranda wako Dhavhidha baba angu izvo zvowakagondisa kwaari. Ngegwinyiso wakagondisa ngomuromo wako, nyamashi wazadzisa ngenyara yako.

¹⁶ Ndizvo zvino, A Mambo Mwari, Mwari waIsuraeri, ngwaririra muranda wako Dhavhidha, baba angu, izvo zvowakamugondisa wechiti, akuzotamiki naumwe mukuona kwangu unozogara padendemaro raIsuraeri, kudai vana vako vechizongwarira njira yavo kuti vahambe mumipango yangu, kudai ngezvewakahamba iwewe pamberi pangu.

¹⁷ Ndizvo zvino, A Mambo Mwari, Mwari waIsuraeri, izwi rako ngarizadziswe, iro rowakagondisa kunomuranda wako Dhavhidha.

¹⁸ “Ngegwinyiso Mwari ungagara nevanhu here munyika? Kunyazwi denga nedenga rematenga aakukwani iwewe; zvino kunozopinda kwakaitawani kutsonga kuneiyi mhatso yendakaaka!

¹⁹ A Mambo Mwari, Mwari wangu, remeredza mukumbiro womuranda wako, nokupota kwake, uzwe kuchema nokukumbira kwaanokumbira muranda wako pamberi pako.

²⁰ Madziso ako abeukire kuneiyi mhatso masikati nousiku, eya nokuringira pandau apo pewakagondisa kuemesa zina rako; newe uzwe mukumbiro uwo waanokumbira muranda wako akaringira kuneiyi ndau.

²¹ Newe uzwe mukumbiro womuranda wako, nowevanhu vako Isuraeri, naapo vanokumbira vakaringira kuneiyi ndau; uzwe uri mudenga, ndau yako yokugara, uzwe, ukungurire.

²² “Kudai munhu echishaishira muakirwana wake, naye echiitiswa mhiko, naye unouya, nokupika mhiko pamberi pearita rako mumhatso iyi,

²³ uzwe uri mudenga muugaro hwako, uite, utonge varanda vako, uunzidzire wakashata, uunzidzire kushata kwake padera pesoro rake; nokupembedza avo vakarurama, ngokuvapa kudai ngokururama kwavo.

²⁴ “Naapo vanhu vako Isuraeri vashaisha pamberi pako, vakanyiswa ngemagaa avo, asi vakapetukazve kwouri, vakatenderukira kuzina rako, vakakumbira nokupota kwouri mumhatso iyi,

²⁵ izwa uri mudenga nokurekerera kushaisha kwevanhu vako Isuraeri, nokuvaunzazve kunyika iyi yowakavapa nokumadzibaba avo.

²⁶ “Naapo denga rakonywa nemvura isikanayi, ngokuti vakashaisha kwouri; navo zvino vakakumbira vechiringira kuneiyi ndau, nokutenda zina rako, vatenderuke kubva kuzvishaishi zvavo ngokuti unovaorora,

²⁷ zvino izwa uri mudenga nokurekerera kushaisha kwevaranda vako, vanhu vako Isuraeri, naapo woovadzidzisa njira kwayo inosisira kuti vahambe ndiyo; unayise mvura padera penyika yako, yowakapa vanhu vako kuita nhaka yavo.

²⁸ “Kuti kwaita nzara munyika, nhenda, chimbarara, chirotarota, ndongwe, mvimvana; kudai magaa avo echivakomba mumadhorobha avo; kunyazwi ngekuri kutambudzika kunyazwi nhenda iripo;

²⁹ kunyazwi ngouri mukumbiro, kunyazwi kupota, kunozokumbirwa ngomunhu kunyazwi ngouri, nokutizve ngevanhu vako veshe vaIsuraeri, apo vanozozia munhu weshe nhenda yake nokuti kurwadziwa kwake, kuti atambanudza nyara dzake kumhatso iyi,

³⁰ izwa uri mudenga, muugaro hwako, kwounogara, rekerera, upe kumunhu weshe kudai ngezviito zvake, uwo mwoyo wake iwewe unouzia, (ngokuti iwewe wega unozia mwoyo wevakororo vevanhu.)

³¹ Ndizvo ngavakutye, vahambe ngenjira dzako mumazuva eshe evanopona munyika yowakapa kumadzibaba edu.

³² “Naapo vapara avo vasiri vevanhu vako Isuraeri, vechibva kunyika iri kuretu ngendaa yezina rako guru, ngendaa yenyara yako inesimba, nomuoko wako wakatambanudzwa; naapo vechiuya vechikumbira vakaringira kumhatso iyi,

³³ izwa iwewe uri mudenga muugaro hwako, uite kunyazwi ngechiri chevanozokumbira kwouri vapara kuitira, kuti vanhu veshe vomunyika vazie zina rako, vakutye, kudai ngezvevanoita vanhu vako Isuraeri, kuti ivozve vazie kuti iyi mhatso yendakaaka inodaidzwa ngezina rako.

³⁴ “Kudai vanhu vako vechibuda kuenda koorwa hondo nemagaa avo, kunyazwi ngenjira iri younozovatuma ndiyo, navo vechikumbira kwouri vakaringira kudhorobha iri, rewakatsanangura, nokumhatso yendakaakira zina rako,

³⁵ Zvino izwa uri mudenga kukumbira kwavo nokupota kwavo, urwire ndaa yavo.

³⁶ “Kudai vechizoshaisha kwouri, (ngokuti akuna munhu usikashaishi akadi), newe wechizovatsenekera, nokuvapira kugaa, navo vanovatora kuvaita hloko kunyika iri kuretu, nokuti iri pasinde;

³⁷ zvino kudai vechizokarakadza vari munyika yevakatorwa kuitwa hloko, nokutenderuka, nokupota kwouri vari munyika youhloko hwavo vechiti, takashaisha, takaita zvakashata, takaita zvisikazi kururama;

³⁸ kuti vakatenderuka ngomwoyo yavo yeshe nomweya yavo yeshe munyika youbatwa hwavo, iyo kwevakatorwa kuitwa vabatwa, nokukumbira kwouri, vakaringira kunyika yavo, iyo yewakapa kumadzibaba avo, dhorobha rewakatsanangura, nemhatso yendakaakira zina rako,

³⁹ zvino izwa mukumbiro wavo nokupota kwavo, uri mudenga muugaro hwako, urwire ndaa yavo, nokurekerera vanhu vako vakashaisha kwouri.

⁴⁰ Zvino Mwari wangu, madziso ako ngaabeuke, nenzee dzako dzipurutane kumikumbiro inozokumbirwa kubva kuneiyi ndau.

⁴¹ “Zvino, miruka, A Mambo Mwari, Mwari, nokuenda kundau yako yokuzorora, iwewe nebhokisi rechitenderano chesimba rako. Vapristi vako, A Mambo Mwari, Mwari, ngavapfekedzwe ngoruponeso, nevakagondeka vako ngavadakare ngounaku hwako.

⁴² A Mambo Mwari, Mwari, usafuratira hope yako kunowakadzodzwa wako. Cherechedza rudo rwako kunomuranda wako Dhavhidha.”