2 MaKro. 5 - Bhaibheri Rakachena muChindau

¹ Ndizvo mushando weshe wemhatso yaMambo Mwari waakaita Soromoni wakapera. Soromoni wakaunza zveshe zviro mukati, zvakapirwa kunaMwari ndibaba ake Dhavhidha; nesirivha yaiya yakangwarirwa, mukore, nezvidziyo zveshe zvokushandisa, wakazviisa pamwepo muupfumi hwemhatso yaMwari.

Bhokisi reChitenderano Rinounzwa kuTemperi

² Zvino Soromoni wakaunganidza vakuru veshe vaIsuraeri, pamwepo nevakuru vemadzinza, nevatungamiriri vemhatso dzemadzibaba evanhu vaIsuraeri muJerusarema, kuti vakwidze bhokisi rechitenderano chaMambo Mwari kubva mudhorobha raDhavhidha, iro ndiro Zioni.

³ Nevamuna veshe vaIsuraeri vakaungana pamberi pamambo padhiri raiyapo ngomwedzi wechinomwe.

⁴ Nevakuru veshe vaIsuraeri vakauya, nevaRevhi vakatwara bhokisi rechitenderano.

⁵ Ndizvo vakakwidza bhokisi rechitenderano, tende romushongano, nezvidziyo zveshe zvakachena, zvaiya mutende; zvakakwidzwa ngevapristi nevaRevhi.

⁶ Mambo Soromoni nembungano yeshe yaIsuraeri, avo vaiya vaungana pamberi pake, vaiya pamberi pebhokisi rechitenderano, vakapira midiro yemakwai akawanda nekabi zvevaiya vasikakoni kuerenga ngokuwandisa.

⁷ Zvino vapristi vakapotedza bhokisi rechitenderano chaMambo Mwari pandau yaro, kundau yomukati yakachenesesa yemhatso, mundau yakachenesesa kakurutu, pashi pemaphaphiro emakherubhi.

⁸ Ngokuti makherubhi akatambanudza maphaphiro awo padera pendau yebhokisi rechitenderano, ndizvo makherubhi akarifukidza, nemipingo yaro yaiya padera paro.

⁹ Mipingo yaiya yakarebesa, kuti magumo emipingo aioneka mundau yakachenesesa, pamberi pendau yomukati yakachenesesa; asi yaiya isikakoni kuoneka kubva ngokubanze; aripo metsa nanyamashi.

¹⁰ Mwaiya musina chiro mubhokisi rechitenderano kwega marusamba emapuwe mairi aakaisamwo Mosi paMutunhu weHorebhi, apo Mambo Mwari paakaita chitenderano nevana vaIsuraeri ngomukuwo wevakabuda kubva Egipite.

Uthende hwaMambo Mwari

¹¹ Zvino apo vapristi vabuda kubva kundau yakachena (ngokuti vapristi veshe vaiya varipo vaiya vakadzichenesa, vasina ndaa kuti ngewechikwata chipi),

¹² vaembi vevaRevhi veshe, Asafi, Hemani, Jedhuthuni, nevakororo vavo nehama dzavo, vakapfeka machira orukangaza akanaka, vanengoma dzesimbi, magitari, zvidangari, vakaema ngokumabvazuva kwearita, nevapristi zana nemakumi mairi (120), vaiya varidzi vemagwama.

¹³ Raiya bingo revaridzi vemagwama nevaembi kuita pachavo kuti vazwike, mukuridza nokuemba mukukudza nokubonga Mambo Mwari; naapo vakamirudza izwi ravo rengoma ngemagwama nengoma dzesimbi nezvimweni zveshe zvokuridza, mukukudza Mambo Mwari vechiti, “Ngokuti wakanaka, nenyasha dzake dzinogara mhera nariini”, mhatso, mhatso yaMambo Mwari yakadzadzwa ngegore.

¹⁴ Ndizvo vapristi avazi kukona kuema kushandira ngendaa yegore; ngokuti uthende hwaMambo Mwari hwakazadza mhatso yaMwari.