2 MaKro. 35 - Bhaibheri Rakachena muChindau

Josia Unoita Dhiri rePhasika

¹ Josia wakaita dhiri rePhasika kunaMambo Mwari muJerusarema; vakauraira Phasika gwayana ngezuva regumi nemarongomuna romwedzi wokutanga.

² Wakaemesa vapristi mundau dzavo, wakavashingisa kumishando yemhatso yaMambo Mwari.

³ Wakati kunevaRevhi, avo vaidzidzisa vaIsuraeri veshe, vaiya vakachena kunaMambo Mwari, echiti, “Isai bhokisi rakachena rechitenderano mumhatso yerakaakirwa ndiSoromoni mukororo waDhavhidha mambo waIsuraeri; amuchasisiri kuritwara pamafudzi enyu. Zvino shandirai Mambo Mwari, Mwari wenyu, nevanhu vake Isuraeri.

⁴ Mudzinasirire kudai ngokuteererana kwemhatso dzemadzibaba enyu, kudai ngezvikwata zvemishando yenyu, kudai ngokunyora kwaDhavhidha mambo waIsuraeri, nokudai ngokunyora kwomukororo wake Soromoni.

⁵ Mueme mundau yakachena kudai ngezvikwata zvemhatso dzemadzibaba ehama dzenyu vanhutu, ngavawepo vaRevhi muchikwata chimwe ngachimwe chemhatso dzemadzibaba.

⁶ Bairai gwayana rePhasika, mudzichenese pachenyu, munasirirewo hama dzenyu, kuti vaite kudai ngeizwi raMambo Mwari raakaunza ngenyara yaMosi.”

⁷ Zvino Josia wakapa kuvanhu zvifuyo zvimweni, makwayana nezvimbudzana, zveshe kuita midiro yePhasika, kwevari veshe vaiyapo, makumi matatu emakumi emazana (30,000), nemikono makumi emazana matatu (3,000); izvi zvaibva pazvifuyo zvamambo.

⁸ Nduna dzake dzakapa ngokuda kuvanhu, kuvapristi, nokuvaRevhi. Hirikia, Zekharia naJehieri, vakuru vemhatso yaMwari, vakapa kuvapristi kuita midiro yePhasika makumi emazana mairi nemazana matanhatu (2,600) emakwayana nembudzana, nemikono mazana matatu (300).

⁹ Khonaniawo, Shemaia naNethaneri, hama dzake, naHashabhia naJeieri, naJozabhadhi, vakuru vevaRehvi, vakapa kuvaRevhi midiro yePhasika zvimakwayana nembudzana makumi emazana mashanu (5,000), nemikono mazana mashanu (500).

¹⁰ Naapo mushando wanasirirwa, vapristi vakaema pandau dzavo, nevaRevhi vakaema muzvikwata zvavo, kudai ngokupanga kwamambo.

¹¹ Navo vakauraya gwayana rePhasika, nevapristi vakaashira ngazi kubva munyara dzavo, vakaifafaza, naapo vaRevhi vechivhiya.

¹² Vakadusa midiro yokupisha kuti vapire kudai ngezvikwata zvemhatso dzemadzibaba evanhu, kuti vapire kunaMambo Mwari, kudai ngezvakanyorwa mubhuku raMosi. Vakaitazve kudaro nemikono.

¹³ Vakakocha gwayana rePhasika ngomuriro kudai ngechiemeso; navo vakabika zvakapirwa zvakacheneswa muhari, mumabiya, nomumaruwenda, vakazvikoanisa ngokukasira pakati pevanhu veshe.

¹⁴ Ngesure kweizvo vakadzinasirira pachavo nevapristi, ngokuti vapristi mibarirwana yaAroni vaiya vakabatika kakurutu ngokupira midiro yokupisha nemafuta metsa usiku; ndizvo vaRevhi vakadzinasirira, pamwepo nevapristi mibarirwana yaAroni.

¹⁵ Vaembi, mibarirwana yaAsafi, vaiya mundau dzavo, kudai ngokupanga kwaDhavhidha, Asafi, Hemani naJedhuthuni muonesi wamambo. Varindi vaingwarira misiwo yeshe; avazi kuda kuti vasiye mushando wavo, ngokuti hama dzavo vaRevhi vakavanasirira.

¹⁶ Ndizvo mushando weshe waMambo Mwari wakapera kunasirwa ngezuvaro, kuti vangwarire Phasika, nokupira midiro yokupisha padera pearita raMambo Mwari, kudai ngokupanga kwamambo Josia.

¹⁷ Nevana vaIsuraeri vaiyapo vakangwarira Phasika ngouwo mukuwo, nedhiri rechingwa chisina mumera mazuva manomwe.

¹⁸ Akuna Phasika rakadai ngeiro rakambongwarirwa muIsuraeri kubvira kumazuva aSamueri muprofeti; akuna nemadzimambo aIsuraeri akambongwarira Phasika rakadaro kudai ngerakangwarirwa ndiJosia, ngevapristi, vaRevhi, vaJudha veshe, vaIsuraeri veshe vaiyapo, nevagari veJerusarema.

¹⁹ Mugore regumi nemasere rokutonga kwaJosia Phasika iri rakangwarirwa.

Magumo oKutonga kwaJosia

²⁰ Ngesure kweizvi zveshe, apo Josia aiya anasirira temperi, Nekho mambo weEgipite wakakwira koorwa naKharkhemishi ngepasinde peRwizi Yufratesi; naJosia wakabuda kuenda koorwa naye.

²¹ Asi Nekho wakatuma nduna dzake kwaari echiti, “Ndinendaa yenyi newe, iwewe mambo waJudha? Andizi kuuyira koorwa newe nyamashi, asi koorwa nemhatso yendinehondo nayo; naMwari wakandipanga kuti ndiite kudaro ngokukasira. Rekera iwewe kurwisana naMwari uwo uneni, kuti asazokuparadza.”

²² Asi zvakanyadaro Josia aazi kukunukudza hope yake kubva kwaari, asi wakadziitisa akaita kudai ngomunhu umweni, kuitira kuti arwe naye. Aazi kupurutana mazwi aNekho akabva kumuromo waMwari, asi wakauya abatana kurwa hondo mubani reMegidho.

²³ Nevaposheri vemisee vakafura mambo Josia; namambo wakati kunevaranda vake, “Ndiendesenyi, ngokuti ndaremadzwa kakurutu.”

²⁴ Ndizvo varanda vake vakamutora kubva mungoro, vakamuisa mungoro imweni yechipiri navo vakamuunza Jerusarema. Naye wakafiramwo, akaikwa mumaiba emadzibaba ake. Veshe vaJudha neveJerusarema vakachema Josia.

²⁵ Jeremia wakaitawo chiriro kuchema Josia, navo veshe vaembi, vamuna nevakadzi, vakaereketa ndiJosia, mukumuchema kwavo ngenduyo dzechiriro chavo metsa nanyamashi. Vakaita izvi kuti zviite tsika yavo muIsuraeri; ringira, zvakanyorwa mubhuku rezviriro.

²⁶ Zvino mishando imweni yaJosia, nezvakarurama zvaakaita, kudai ngeizvo zveshe zvaiya zvakanyorwa mumupango waMambo Mwari,

²⁷ nezviito zvake, zvokutanga nezvokupedzisira, ringirai zvakanyorwa muBhuku reMadzimambo aIsuraeri naaJudha.