2 MaKro. 34 - Bhaibheri Rakachena muChindau

Josia Mambo waJudha

¹ Josia waiya nemakore masere apo paakatanga kutonga; wakatonga muJerusarema makore makumi matatu narimwe.

² Wakaita zvakanaka mukuona kwaMambo Mwari, wakahamba ngenjira dzaDhavhidha baba ake; aazi kutongopauka kuenda kumudyo nokuti kumuoshwe.

³ Ngokuti mugore rechisere rokutonga kwake, achiri mutsva, wakatanga kutsvaka Mwari wababa ake Dhavhidha, nomugore regumi nemairi wakatanga kudusa ndau dzakakwirira, nesika dzokudira, miedzaniso yakatsetswa nemiedzaniso yakanyunguruswa, kubva munaJudha nomuJerusarema.

⁴ Mukuona kwake vakaputsa maarita aanaBhaari; wakaputsira pashi maarita okupishira mitombo inegwema rakanaka aiya padera pavo. Wakaputsira pashi sika dzokudira, nemiedzaniso yakatsetswa neyakanyunguruswa, kuita zvigurwa, akaikuya kuita bukuta, wakafafaza bukuta iro padera pemaiba eavo vaiya vakapira midiro kweiri.

⁵ Naye wakapisha magodo evapristi padera pemaarita avo, wakachenesa Judha neJerusarema.

⁶ Mumadhorobha aManase, aEfuremu, aSimeoni metsa kugumira aNafitari, mundau dzawo dzematongo dzaiya dzakatendenedza,

⁷ wakaputsira pashi maarita nesika dzokudira, nokukuya miedzaniso yakatsetswa kuita bukuta, nokutemera pashi maarita eshe okupishira mitombo inegwema rakanaka munyika yeshe yaIsuraeri. Zvino wakahwirira Jerusarema.

Kuoneka kweBhuku reMipango

⁸ Mugore regumi nemasere okutonga kwake, apo achenesa nyika nemhatso, wakatuma Shafani mukororo waAzaria, Maaseia mutongi wedhorobha, naJoa mukororo waJoahazi munyori, kuti vaakise mhatso yaMambo Mwari, Mwari wake.

⁹ Vakaguma kunaHirikia mupristi mukuru, vakamupa mare yaiya yakaunzwa mumhatso yaMwari iyo vaRevhi, vairinda ruwanze, vaiya vaunganidza kubva kunaManase, Efuremu nokubva kunevakasara vaIsuraeri nokubva kwaJudha, Bhenjamini nokuvagari veJerusarema veshe.

¹⁰ Navo vakaiisa munyara dzeavo vairingira mushando wemhatso yaMambo Mwari, nevashandi vaishanda mishando yemhatso yaMambo Mwari, vakaipa kuakisa nokunakisa mhatso.

¹¹ Vakaipa kuvatsetsi nokuvaaki, kutenga mapuwe akatsetswa, nematanda okurimbanidza pamwepo, nokuisa mawaro mumhatso dzakaputswa ngemadzimambo aJudha.

¹² Vanhu vakashanda ngokugondeka. Padera pavo pakaemeswa vaRevhi, Jahathi naObhadhia, vevakororo vaMerari, pamwepo naZekharia naMeshuramu, vevakororo vaKohathi, kuti varingire mushando. Vamweni vevaRevhi, veshe vaizia kuridza zviro zvokuemba ndizvo,

¹³ vaingwarira avo vaitwara mitwaro, zve nokutungamira avo veshe vaiita mishando yembeu dzeshe; nevamweni vevaRevhi vaiya vanyori, nduna, nevarindi vemisiwo.

¹⁴ Naapo vaibudisa mare yakaiswa mumhatso yaMambo Mwari, Hirikia mupristi wakaona bhuku remipango yaMambo Mwari iyo yakapuwa kubudikidza ndiMosi.

¹⁵ Hirikia wakati kunaShafani munyori, “Ndaona bhuku remipango mumhatso yaMambo Mwari.” NaHirikia wakapa bhuku kunaShafani.

¹⁶ Shafani wakaenda nebhuku kunamambo, wakaunzazve izwi kunamambo, echiti, “Zveshe izvo zvakapangwa varanda vako, vanozviita.

¹⁷ Vabudisa yeshe mare yakaoneka mumhatso yaMambo Mwari, vakaipa munyara dzevangwariri vomushando nedzevashandi.”

¹⁸ Zvino Shafani munyori wakaronzera mambo echiti, “Hirikia mupristi wakandipa bhuku.” NaShafani wakaridzidza pamberi pamambo.

¹⁹ Naapo mambo azwa mazwi emipango, wakabaura zvokufuka zvake.

²⁰ Namambo wakapanga Hirikia, Ahikamu mukororo waShafani, Abhidhoni mukororo waMikha, Shafani munyori, naAsaia muranda wamambo echiti,

²¹ “Endai, mubvunze kunaMambo Mwari ngendaa yangu, neyeavo vakasara muIsuraeri nevomuJudha, ngendaa yemazwi ebhuku rakaoneka; ngokuti ushungu hwaMambo Mwari hwakakura uhwo hunodururwa padera pedu, ngokuti madzibaba edu avazi kungwarira izwi raMambo Mwari, kuita zveshe kudai ngeizvo zvakanyorwa mubhuku iri.”

²² Ndizvo Hirikia naavo veshe vakatumwa ndimambo vakaenda kunaHuridha muprofeti womukadzi, mukadzi waSharumu mukororo waTokhathi, mukororo waHasira, mungwariri wezvokufuka, uwo waigara muJerusarema munharaunda yokubani; navo vakaereketa ngamazwi awo kwaari.

²³ Wakavapingura echiti, “Unoronza izvi Mambo Mwari, Mwari waIsuraeri: Muronzerenyi munhu uwo wamutuma kwendiri,

²⁴ ‘Ndizvo zvinoronza Mambo Mwari: Ringira, ndinozounza dambudziko padera peiyi ndau, nepadera pevagari vayo, eya, kudai ndizvo zvituko zveshe zvakanyorwa mubhuku iri rakadzidzwa pamberi pamambo wevaJudha.

²⁵ Ngokuti vakandisiya vakapishira mitombo inegwema rakanaka kunezvimwari zvimweni, ndizvo vandimusira ushungu ngemishando yeshe yenyara dzavo; ndizvo ushungu hwangu hunozodururwa padera pendau iyi, nahwo ahuzodzimwi.’

²⁶ Asi ngendaa yamambo waJudha, uwo wakamutuma kuuya koobvunza kunaMambo Mwari, ndizvo munozoti kwaari, ‘Ndizvo zvinoronza Mambo Mwari Mwari waIsuraeri, ngendaa yemazwi awo ewakazwa:

²⁷ Ngendaa yokuti mwoyo wako waiya wakapfaa, newe wakadzipfaisa pamberi paMwari, apo pewakazwa mazwi ake ngendaa yendau iyi, nendaa yevagari vayo, newe wakadzipfaisa pamberi pangu, ukabaura zvokufuka zvako, ukachema pamberi pangu, neni ndakakuzwawo, unoronza Mambo Mwari.

²⁸ Ringira, ndinozokuunganidza kunemadzibaba ako, newe unozoikwa muiba rako mukunyarara; madziso ako aazooni iri dambudziko reshe rendinozounza padera peiyi ndau, nepadera pevagari vayo.’ ” Ndizvo vakapetuka neizwi kunamambo.

Josia Unoita Chitenderano choKupurutana Mambo Mwari

²⁹ Zvino mambo wakatumira izwi nokuunganidza vakuru veshe vaJudha neveJerusarema.

³⁰ Mambo wakakwira kupotera mumhatso yaMambo Mwari, nevanhu veshe vaJudha, vagari veshe veJerusarema, vapristi, vaRevhi, nevanhu veshe, vakuru nevadoko; wakadzidza mukuzwa kwavo eshe mazwi ebhuku rechitenderano rakaonwa mumhatso yaMambo Mwari.

³¹ Mambo wakaema pandau yake, wakaita chitenderano pamberi paMambo Mwari, kuteera Mambo Mwari, kungwarira mipango yake, zvapupu zvake nezviemeso zvake, ngomwoyo wake weshe nomweya wake weshe, nokuita mazwi echitenderano akanyorwa mubhuku iri.

³² Zvino wakaita kuti veshe avo vaiyapo muJerusarema nomuBhenjamini kuti vagondise pachavo kwechiri. Nevagari veJerusarema vakaita kudai ngechitenderano chaMwari wemadzibaba avo.

³³ Josia wakadusa zveshe zvinyangadzo kubva munyika dzeshe dzevana vaIsuraeri, naye wakaita veshe vaiya muIsuraeri kuti vadire Mambo Mwari, Mwari wavo. Mumazuva ake eshe okupona kwake avazi kupauka kubva mukuteera Mambo Mwari, Mwari wemadzibaba avo.