2 MaKro. 33 - Bhaibheri Rakachena muChindau

Manase Mambo waJudha

¹ Manase waiya anemakore gumi nemairi apo paakatanga kutonga; naye wakatonga makore makumi mashanu nemashanu muJerusarema.

² Wakaita izvo zvaiya zvakashata mukuona kwaMambo Mwari, kudai ngezvinyangadzo zvevasikadiri Mwari, avo vaakadzinga Mambo Mwari kubva pamberi pevana vaIsuraeri.

³ Ngokuti wakaakisazve ndau dzakakwirira dzaakaputsa Hezekia baba ake, wakaemesa maarita aanaBhaari, wakaita sika dzokudira, akadira hondo yeshe yomudenga, akaishandira.

⁴ Naye wakaaka maarita mumhatso yaMambo Mwari, iyo yaakaronza Mambo Mwari echiti, “Zina rangu rinozogara muJerusarema mhera nariini.”

⁵ Wakaakira maarita hondo yeshe yomudenga mumaruwanze mairi emhatso yaMambo Mwari.

⁶ Wakaita kuti vakororo vake vapotye mumuriro mubani romukororo waHinomu; zve, wakagonda vafemberi nemaninji, akashandisa un'anga, akashandisa masaramuso, akashandisa vanomukirwa, nevaroyi. Wakaita zvakashata kakurutu mukuona kwaMambo Mwari, kumusira ushungu hwake.

⁷ Wakaemesa muedzaniso wakatsetswa, muedzaniso wechimwari, mumhatso yaMwari, iyo Mwari yaakati kunaDhavhidha nokunemukororo wake Soromoni, “Mumhatso iyi, nomuJerusarema, iro rendakatsanangura kubva pakati pemadzinza eshe aIsuraeri, kuti ndiisemwo zina rangu mhera nariini.

⁸ Andizodusi nakamwe rutsoka rwaIsuraeri kubva kunyika iyo yendakaemesera madzibaba enyu, kudai kwega vechizongwarira zveshe zvendakavapanga ndizvo, mipango yeshe, zvironzo nezviemeso, zvakaunzwa kubudikidza ndiMosi.”

⁹ Manase wakaita kuti Judha nevagari vemuJerusarema vapauke, ndizvo vakaita kushata kwakapindisisa kupinda vasikadiri Mwari, avo vaakauraya Mambo Mwari kubva pamberi pevana vaIsuraeri.

Manase Unotenderuka

¹⁰ Mambo Mwari wakaereketa kunaManase nokunevanhu vake, asi avazi kupurutana.

¹¹ Ndizvo Mambo Mwari wakaunza padera pavo nduna dzehondo dzamambo weAsiria, avo vakabata Manase, vakamuisa makato eminzwa, vakamusunga ngemanguri esimbi, vakamutora kuenda naye Bhabhuroni.

¹² Naapo aamukutambudzika, wakatsvaka Mambo Mwari, Mwari wake, naye wakadzipfaisa kakurutu pamberi paMwari wamadzibaba ake.

¹³ Wakakumbira kwaari, naMwari wakaashira kukumbira kwake, wakazwa kupota kwake, wakamuunzazve Jerusarema nokuumambo hwake. Zvino Manase wakazozia kuti Mambo Mwari ndiye Mwari.

¹⁴ Ngesure kweizvi wakaaka rukumbati rwokubanze kwedhorobha raDhavhidha, ngokumabirirazuva kweGihoni mubani, metsa pakupinda paMusiwo Hove, wakaenda narwo mberi rwakatendenedza Oferi, wakarukwidza kakurutu. Wakaisa nduna dzokurwa hondo mumadhorobha eshe akashosherwa muJudha.

¹⁵ Wakadusa zvimwari zvipara, nomuedzaniso kubva mumhatso yaMambo Mwari, nemaarita eshe aaiya akaaka mumutunhu wemhatso yaMambo Mwari, nomuJerusarema, naye wakairasha kubanze kwedhorobha.

¹⁶ Wakaakisawo arita raMambo Mwari, wakapirapo midiro yokuiyanisa neyokubonga; akapanga Judha kuti adire Mambo Mwari, Mwari waIsuraeri.

¹⁷ Vanhu zvakanyadaro vakaangirira kupira midiro kundau dzakakwirira, asi kwega kunaMambo Mwari, Mwari wavo.

Magumo oKutonga kwaManase

¹⁸ Zvino mishando imweni yaManase, nomukumbiro wake kunaMwari wake, nemazwi evaonisi avo vakaereketa kwaari ngezina raMambo Mwari, Mwari waIsuraeri, ringirai zvakanyorwa muBhuku reMadzimambo aIsuraeri.

¹⁹ Mukumbiro wake, nenjira iyo Mwari yaakaashira ndiyo kupota kwake, kushaisha kwake kweshe nokusikagondeka kwake, ndau dzakakwirira dzaakaaka, paakaita sika dzokudira nemiedzaniso yakatsetswa apo asati adzipfaisa, izvi zvakanyorwa mubhuku revafemberi.

²⁰ Ndizvo Manase wakaata nemadzibaba ake, vakamuika mumhatso yake. Amoni mukororo wake wakatonga pandau yake.

Amoni Mambo waJudha

²¹ Amoni waiya nemakore makumi mairi nemairi apo paakatanga kutonga; wakatonga makore mairi muJerusarema.

²² Wakaita zvakashata mukuona kwaMambo Mwari, kudaiwo ndiManase baba ake. Amoni wakapira midiro kunemiedzaniso yakatsetswa iyo yakaitwa ndibaba ake Manase, wakaidira.

²³ Aazi kudzipfaisa kunaMambo Mwari, kudai ndibaba ake Manase wakadzipfaisa, asi uyu Amoni wakapauka kakurutu nokupinda kushata.

²⁴ Varanda vake vakapangana zano, vakamuuraya ari mumhatso yake.

²⁵ Asi vanhu venyika vakauraya veshe avo vakapangana zano ndimambo Amoni; nevanhu venyika vakaita Josia mukororo wake mambo pandau yake.