2 MaKro. 32 - Bhaibheri Rakachena muChindau

VaAsiria Vanotyisidzira Jerusarema

¹ Ngesure kweizvi zviro, nemishando yokugondeka, Senakheribhi mambo weAsiria wakauya, akapotera munyika yaJudha, akakomba madhorobha akashosherwa, echikarakadza kuti aatore kuita ake.

² Naapo Hezekia aona kuti Senakheribhi waiya aguma, nokuti waiya akadziemesera kurwa neJerusarema,

³ wakapangana nevakuru nevarwi vake kuti vatsiire zvinyuka zveshe zvemvura zvaiya kubanze kwedhorobha; navo vakamudetsera.

⁴ Vakaunganidzana vanhu vakawanda pamwepo, navo vakatsiira zvinyuka zveshe nerwizi urwo rwaierera kuphotya pakati penyika vechiti, “Zvingaita ngenyi kuti madzimambo veAsiria vagume vaone mvura yakawanda?”

⁵ Hezekia wakadzigwinyisa kuti aakise marukumbati akaputsirwa pashi, wakakwidza mathawa padera pemarukumbati; wakaaka rukumbati rumweni ngokubanze; wakaakisa Miro, mudhorobha raDhavhidha, wakanasira shoti nezvihlangu zvakawanda.

⁶ Naye wakaemesa nduna dzehondo padera pevanhu, wakavaunganidza pamwepo kwaari paruwanze pamusiwo wedhorobha, wakaereketa kwevari mazwi okugwinyisa echiti,

⁷ “Itai vakagwinya nevakashinga. Musatya nokuti kupera simba ngendaa yamambo weAsiria nehondo yeshe yaanayo; ngokuti unesu wakapinda kukura kunewe vanaye.

⁸ Kwaari kunemuoko wenyama, asi kwetiri kunaMambo Mwari, Mwari wedu, kutidetsera nokutirwira hondo dzedu.” Vanhu vakadzigwinyisa padera pemazwi aHezekia mambo waJudha.

⁹ Ngesure kweizvi Senakheribhi mambo weAsiria waiya paRakhishi nehondo dzake dzeshe, wakatuma varanda vake Jerusarema, kunaHezekia mambo waJudha nokuvanhu vaJudha veshe avo vaiya muJerusarema echiti,

¹⁰ “Unoronza izvi Senakheribhi mambo weAsiria: Magondero enyu ari kunaani kuti mugare muugaro hweJerusarema hwakakombwa?

¹¹ Hezekia aamupausi here kuti mufe ngenzara nenyota, apo paanomuronzera echiti, ‘Mambo Mwari, Mwari wedu, unozotirwira kubva kunyara yamambo weAsiria?’

¹² Hezekia andiyepi here wakadusa ndau dzake dzeshe dzakakwirira nemaarita ake, akapanga Judha nevari muJerusarema kuti, ‘Munozodira pamberi pearita rimwe, mupishe mutombo unegwema rakanaka kweriri?’

¹³ Amuzii here izvo zvakaitwa ndini nemadzibaba angu kunevanhu veshe venyika dzimweni? Zvimwari zveidzo nyika zvaiya zvinesimba here kuti zvisunhure nyika dzavo kubva kunyara yangu?

¹⁴ Ndiani waiyapo pakati pezvimwari zveshe zvenyika idzo dzaakaparadza madzibaba angu, uwo waiya nesimba rokurwira vanhu vake kubva munyara dzangu, kuti Mwari wenyu ungakona here kumurwira kubva munyara dzangu?

¹⁵ Ndizvo zvino musachengedzerwa ndiHezekia, nokuti kupauswa ngenjira yakadai, musamugonda, ngokuti akuna chimwari chedzinza reshe noumambo hweshe chaiya nesimba rokurwira vanhu vacho kubva kunyara dzangu, nokubva kunyara dzemadzibaba angu. Kutsonga kwakaitawani kuti Mwari wenyu ungamurwira kubva munyara dzangu!”

¹⁶ Nevaranda vake vakaereketa zvakawanda ndiMambo Mwari, Mwari, nokurwisana nomuranda wake Hezekia.

¹⁷ Zve, wakanyora tsamba dzokutuka Mambo Mwari, Mwari waIsuraeri, nokuereketa zvokurwisana naye echiti, “Kudai ngezvimwari zvemadzinza munyika dzimweni zvisikazi kurwira vanhu vazvo kubva munyara mwangu, ngokudarozve Mwari waHezekia aangarwiri vanhu vake kubva munyara dzangu.”

¹⁸ Vakadaidzira ngeizwi guru ngendimi yevaJudha kunevanhu veJerusarema vaiya padera porukumbati, kuvatyisidzira nokuvakarudza, kuita kuti vangakona kutora dhorobha.

¹⁹ Vakaereketa ndiMwari weJerusarema vechimuedzanisa nezvimwari zvevanhu venyika, izvo zviri mishando yenyara dzevanhu.

²⁰ Zvino Hezekia mambo nomuprofeti Isaya mukororo waAmozi vakakumbira ngendaa iyi vechichema kuneWedenga.

²¹ Mambo Mwari wakatuma ngirosi iyo yakauraya ngwazi dzeshe dzakashinga, vatungamiriri nenduna dzaiya mukamba yamambo weAsiria. Ndizvo wakahwirira kunyika yake echitsveruka. Naapo akaguma mumhatso yechimwari chake, vamweni vevana vakabarwa ndiye vakamuurayapo ngeshoti.

²² Ndizvo Mambo Mwari wakaponesa Hezekia nevagari veJerusarema, kubva kunyara yaSenakheribhi mambo weAsiria, nokubva kunyara dzemagaa ake eshe; wakavapa kuzorora kumarutii eshe.

²³ Nevazhinji vakaunza zvipo kunaMambo Mwari muJerusarema, nezvipo zvakapinda kunaka kunaHezekia mambo waJudha, kuitira kuti akudzwe mukuona kwemadzinza eshe, kubvira ngouwo mukuwo kuenda mberi.

Kurwara kwaHezekia noKudzikudza kwake

²⁴ Mumazuva awo Hezekia wakarwara kwokuda kufa. Wakakumbira kunaMambo Mwari, wakamupingura, akamupa chioniso.

²⁵ Asi Hezekia aazi kupetudzira ngenjira yakanaka kudai ngeizvo zvaakaitirwawo, ngokuti mwoyo wake wakadzikudza. Ndizvo ushungu hwakauya padera pake, nepadera paJudha neJerusarema.

²⁶ Zvino Hezekia wakadzipfaisa pachake kubva mukudzikudza kwomwoyo wake, veshe iye nevagari veJerusarema, ndizvo ngokudaro ushungu hwaMambo Mwari ahuzi kuchauyazve padera pavo, mazuva eshe okupona kwaHezekia.

Upfumi hwaHezekia neMbiri yake

²⁷ NaHezekia waiya noupfumi huzhinji, nokuremeredzwa kukurutu; naye wakadziitira mhatso dzoupfumi yesirivha, yomukore, yemapuwe akanaka, yemakha, yezvihlangu, neyembeu dzeshe dzezviro zvinomutengo mukuru;

²⁸ matura okuisa zviyo, vhini, mafuta; nezvibaya zvembeu dzeshe dzezvifuyo, nezvibaya zvemakwai.

²⁹ Wakadzinasirira madhorobha, noupfumi hwezviyo zvakawanda; ngokuti Mwari waiya amupa upfumi hwakawanda kakurutu.

³⁰ Ndiyezve Hezekia wakakonya muromo wechinyuka wedera wemvura Gihoni, wakaidzasa ngokumabirirazuva kwedhorobha raDhavhidha. Hezekia wakabudirira kumishando yake yeshe.

³¹ Ndizvo ngendaa yenhumwa dzamambo weBhabhuroni avo vakatumwa kuuya kwaari, kuti vabvunze ngechishamiso chakaitwa munyika, Mwari wakamusiya ega pachake, kuti amuedze, kuti azie ngeizvo zveshe zvaiya mumwoyo mwake.

Magumo oKutonga kwaHezekia

³² Zvino mishando imweni yaHezekia, nokururama kwake, ringira yakanyorwa muchioniso chaIsaya muprofeti mukororo waAmozi, muBhuku reMadzimambo aJudha naaIsuraeri.

³³ Hezekia wakaata nemadzibaba ake, vakamuika muiba rerupande rwedera rwemaiba emibarirwana yaDhavhidha. Navo veshe vaJudha, nevagari veJerusarema vakaita chiriro chokumuremeredza pakufa kwake. Manase mukororo wake wakatonga pandau yake.