2 MaKro. 31 - Bhaibheri Rakachena muChindau

Hezekia Unonasirisa Ndaramo yoKudira

¹ Zvino apo izvi zveshe zvapera, veshe vaIsuraeri vaiyapo vakabuda, vakaenda kumadhorobha aJudha, vakaputsa sika dzokudira kuita zvigurwa, vakatemera pashi matanda okudira, vakaputsira pashi ndau dzakakwirira nemaarita, muJudha mweshe, muBhenjamini, muEfuremu nomwaManase, metsa vaiya vapedza kuparadza zveshe. Zvino vana vaIsuraeri veshe vakahwirira kumadhorobha avo munhu weshe kuzviro zvake.

² Hezekia wakaemesa vapristi nevaRevhi muzvikwata zvavo, munhu weshe kudai ngomushando wake, vapristi nevaRevhi vakaemeserwa kupira midiro yokupisha nemidiro yokunyarara, kuti vashandire pamisiwo yekamba yaMambo Mwari nokubonga nokukudza.

³ Wakaunza rupande rwechikoaniswa chamambo kubva kuzviro zvake chemidiro yokupisha: midiro yokupisha yemangwanani neyemadeekoni, midiro yokupisha yemaSabatha, yokutawa kwomwedzi, neyemadhiri akaemeswa, kudai ngezvakanyorwa mumupango waMambo Mwari.

⁴ Wakapanga vanhu avo vaigara muJerusarema kuti vape chikoaniswa chevapristi nevaRevhi, kuti vadzipire mumupango waMambo Mwari.

⁵ Ngokukasira apo izwi rapararira, vanhu vaIsuraeri vakaunza ngokuwanza zviyo zvokutanga zvekoroni, vhini, mafuta, uchi, nazvo zveshe zvinomera muminda; neminikero yechegumi yezviro zveshe vakazviunza ngokuwanza.

⁶ Vana vaIsuraeri nevaJudha, avo vaigara mumadhorobha aJudha, vakaunzawo chegumi chen'ombe, nechemakwai, nechegumi chezviro zvakapirwa kunaMambo Mwari, Mwari wavo, navo vakazviunganidza kuita mirwi.

⁷ Mumwedzi wechitatu vakaamba kuunganidza zviro mumirwi, navo vakazvipedza ngomwedzi wechinomwe.

⁸ Naapo Hezekia nevakuru vakaguma vauya vakaona mirwi, vakakudza Mambo Mwari nevanhu vake Isuraeri.

⁹ Hezekia wakabvunza vapristi nevaRevhi ngendaa yemirwi iyo.

¹⁰ Azaria mupristi mukuru wemhatso yaZadhoki wakamupingura echiti, “Kubvira apo vanhu pevakaamba kuunza zvipo kumhatso yaMambo Mwari, tinazvo zvakakwana zvokudya, techisiya zvakawanda; ngokuti Mambo Mwari wakafumisa vanhu vake; ndizvo tinazvo zvakasara ndiyo mirwi iyi mikuru.”

¹¹ Zvino Hezekia wakavapanga kuti kunasirirwe makamera okungwarira zviro mumhatso yaMambo Mwari, navo vakaanasirira,

¹² Ngokugondeka vakapinzemwo zvipo, zvegumi, nezviro zvakapirwa kunaMambo Mwari. Khonania muRevhi ndiye waiya mutongi padera pazvo, naShimei hama yake ndiye waiya muteeri wake.

¹³ Naapo Jehieri, Azazia, Nahathi, Asaheri, Jerimothi, Jozabhadhi, Erieri, Isimakhia, Mahathi naBhenaia, ava ndivo vaiya varingiri vezviro pashi penyara yaKhonania naShimei hama yake, vakaemeswa ndiHezekia mambo naAzaria mutongi mukuru wemhatso yaMwari.

¹⁴ NaKore mukororo waImina muRevhi, uwo waiya murindi womusiwo wokumabvazuva, waiya mukuru padera pezvipo zvakapirwa ngokuda kunaMwari, kuti akoanisire zvipo zvaMambo Mwari neizvo zvakachenesesa.

¹⁵ Edheni, Miniamini, Jeshua, Shemaia, Amaria naShekania, vaimudetsera ngokugondeka kukurutu mumadhorobha evapristi, kuti vape zvikoaniswa kunehama dzavo, vakuru nevadoko zvakatodzana kudai ngezvikwata zvavo,

¹⁶ ngepabanzi peavo vakaerengwa ngemazina emadzibaba avo, vamuna kubvira vaane makore matatu nokuenda mberi, veshe vaipotera mumhatso yaMambo Mwari, kudai ngemabingo avo omushando aidiwa ezuva ngezuva ngemishando yavo kudai ngendau dzavo nezvikwata zvavo.

¹⁷ Kuerengwa kwevapristi kwakaitwa kudai ngokuteererana kwemhatso dzemadzibaba avo; idzo dzevaRevhi kubvira ngevaiya nemakore makumi mairi nokuenda mberi, kudai ngemishando yavo kudai ngokuteerana kwezvikwata zvavo.

¹⁸ Vapristi vakaerengwa pamwepo nevana vavo veshe vadoko, vakadzi vavo, vakororo vavo, nevanasikana vavo veshe, mbungano yeshe; ngokuti vaiya vakagondeka vakadzingwarira pachavo kuti vaite vakacheneswa.

¹⁹ Mibarirwanawo yaAroni vapristi avo vaiya muminda kunharaunda dzemadhorobha avo, dhorobha ngedhorobha vanhu vakadudzwa ngemazina vaizopa zvikoaniswa kuvamuna veshe pakati pevapristi, nokwevari veshe vakaerengwa pakati pevaRevhi.

²⁰ Hezekia wakazviita izvi munyika yeshe yaJudha; wakaita izvo zvaiya zvakanaka, zvakarurama, nezvakagondeka pamberi paMambo Mwari, Mwari wake.

²¹ Nomushando weshe waakaamba mumushando wemhatso yaMwari, nokudai ngechironzo nemipango, kutsvaka Mwari wake, wakaita zveshe ngomwoyo wake weshe; naye wakabudirira.