2 MaKro. 30 - Bhaibheri Rakachena muChindau

Kunasirira Phasika

¹ Hezekia wakatumira izwi kuvaIsuraeri veshe nokuvaJudha, wakanyorazve tsamba kunaEfuremu naManase, kuti vauye kumhatso yaMambo Mwari muJerusarema, kuti vangwarire Phasika kunaMambo Mwari, Mwari waIsuraeri.

² Ngokuti mambo nevakuru vake, nembungano yeshe muJerusarema vaiya vapangana kuti vangwarire Phasika ngomwedzi wechipiri

³ (ngokuti vaiya vasikakoni kuringwarira panguva yaro yemene, ngokuti vapristi vaiya vasikazi kudzichenesa pachavo vakakwana nokuti vanhu vaiya vasati vaungana muJerusarema.)

⁴ Urongwa uhu hwaiya hwakanaka mukuona kwamambo nokumbungano yeshe.

⁵ Ndizvo vakaemesa chironzo kuti kudaidzirwe kuvaIsuraeri veshe, kubvira Bherishebha metsa Dhani, kuti vanhu vauye vangwarire Phasika kunaMambo Mwari, Mwari waIsuraeri, paJerusarema; ngokuti vaiya vasati variita ngokuwandisa kudai ngezvakanyorwa.

⁶ Ndizvo vatwari vakaenda muIsuraeri mweshe nemwaJudha, netsamba dzakabva kunamambo nevakuru vake, kudai ngezvaakapanga mambo echiti, “Imwimwi vana vaIsuraeri, petukaizve kunaMambo Mwari, Mwari waAbrahama, waIsaka nowaIsuraeri, kuti naye apetuke kunevakasara venyu, vakapokonyoka kubva kunyara yemadzimambo evaAsiria.

⁷ Musadai ngemadzibaba enyu nehama dzenyu, avo vaiya vasina gonda kunaMambo Mwari, Mwari wemadzibaba avo, ndizvo wakavaita kuti vaparadzwe, kudai ngezvomunoona.

⁸ Zvino musaita vanemitsipa yakaoma, kudai ngezvevaiya vakaita madzibaba enyu, asi imwimwi dzipirenyi kunaMambo Mwari, mupotere mumhatso yake yakachena, iyo yaakachenesa mhera nariini, mushandire Mambo Mwari, Mwari wenyu, kuti kutyisa kwoushungu hwake kuduswe kubva kwomuri.

⁹ Ngokuti imwimwi mukapetuka kunaMambo Mwari, hama dzenyu nevana venyu vanozoona nyasha kubva kunevakavatora kuvaita hloko, nokupetuka kunyika iyi. Ngokuti Mambo Mwari, Mwari wenyu, wakanaka unenyasha, naye aazofuratiri hope yake kubva kwomuri, kudai mwechipetuka kwaari.”

¹⁰ Ndizvo vatwari vakahamba kubva kudhorobha rimwe kuenda kunerimweni, vakahamba mukati mwenyika yokwaEfuremu neyokwaManase, metsa kuguma Zebhuruni; asi vakavasheka kuvashoora, vakavaitira jee.

¹¹ Kwega vashomani vakabva kwaAsha, vakabva kwaManase, nevakabva kwaZebhuruni vakadzipfaisa pachavo, vakauya Jerusarema.

¹² Nyara yaMwari yaiyawo padera paJudha, kuvapa mwoyo umwe kuti vaite izvo zvaakavapanga mambo nevakuru vake, ngeizwi raMambo Mwari.

Vanoita Dhiri rePhasika

¹³ Vanhu vakawanda vakaungana muJerusarema kuti vangwarire dhiri rokudya chingwa chisina mumera ngomwedzi wechipiri, yaiya mbungano hurutu yaamho.

¹⁴ Vakamiruka kushanda, vakadusa maarita aiya muJerusarema, nemaarita eshe okupishira mutombo unegwema rakanaka vakaadusa, vakaakandira muRwizi weKedhironi.

¹⁵ Navo vakauraya gwaiyana rePhasika ngezuva regumi nemarongomuna omwedzi wechipiri. Vapristi nevaRevhi vaitsveruka, navo vakadzichenesa, vakaunza midiro yokupisha mumhatso yaMambo Mwari.

¹⁶ Vakatora ndau dzavo kudai ngomuitiro wavo, kudai ngomupango waMosi munhu waMwari; vapristi vakafafaza ngazi, yevakaashira kubva kunyara dzevaRevhi.

¹⁷ Ngokuti vaiyapo vakawanda mukati mwembungano vaiya vasikazi kudzichenesa pachavo; ndizvo vaRevhi ndivo vakabata mushando wokuuraira zvePhasika zveavo veshe vaiya vasikazi kusukika, kuti zvicheneswe kunaMambo Mwari.

¹⁸ Ngokuti uzhinji hwevanhu, vazhinji vavo vaibva kwaEfuremu, kwaManase, kwaIsakha, nekwaZebhuruni, vaiya vasikazi kudzichenesa pachavo, asi zvakanyadaro vakadya Phasika, asi haiwa kudai ngezvakanyorwa. Asi Hezekia wakavakumbirira echiti, “Mambo Mwari wakanaka varekerere umwe ngaumwe,

¹⁹ weshe waemesa mwoyo wake kuti atsvake Mwari, Mambo Mwari, Mwari wemadzibaba ake, kunyazwi aazi kusukika kudai ngokusukika kwenjira yemhatso yakachena.”

²⁰ Mambo Mwari wakazwa Hezekia, wakaponesa vanhu.

²¹ Nevana vaIsuraeri vaiya muJerusarema vakangwarira dhiri rokudya chingwa chisina mumera mazuva manomwe ngokudakara kukurutu; vaRevhi nevapristi vakakudza Mambo Mwari zuva ngezuva, vechiemba ndizvo zvinoita bope guru kunaMambo Mwari.

²² Hezekia wakaereketa ngenjira inoembedzera kunevaRevhi veshe vakaonesa kuzia kwakanaka mumushando waMambo Mwari. Ndizvo vanhu vakadya kudya kwedhiri ukwo mazuva manomwe, vechipira midiro yokunyarara, vechibonga kunaMambo Mwari, Mwari wemadzibaba avo.

²³ Zvino mbungano yeshe yakatenderana kuti ingwarirezve dhiri mazuva manomwe amweni; ndizvo vakaringwarira mazuva manomwe amweni ngokudakara.

²⁴ Ngokuti Hezekia mambo waJudha wakapa mbungano mikono gumi rimwe remazana (1,000) nemakwai makumi emazana manomwe (7,000) kuita mudiro, nevakuru vakapa mbungano mikono gumi remazana (1,000) nemakwai makumi emazana gumi (10,000). Vapristi vazhinji vakadzichenesa pachavo.

²⁵ Mbungano yeshe yokwaJudha, vapristi nevaRevhi, nembungano yeshe yeavo vakabva munyika dzaIsuraeri, nevapara vakabva munyika dzaIsuraeri, nevapara vaigara muJudha, vakadakara.

²⁶ Kwaiyapo kudakara kukurutu muJerusarema, ngokuti kubvira kumukuwo waSoromoni mukororo waDhavhidha mambo waIsuraeri, akuzi kumboapo chiro chakadaro muJerusarema.

²⁷ Zvino vapristi nevaRevhi vakamiruka, vakafumisa vanhu; nemazwi avo akazwika, nokukumbira kwavo kwakakwira kundau yake yokugara yakachena mudenga.