2 MaKro. 3 - Bhaibheri Rakachena muChindau

¹ Zvino Soromoni wakatanga kuaka mhatso yaMambo Mwari muJerusarema, paMutunhu Moria, pandau yaakaoneka Mambo Mwari kunababa ake Dhavhidha, kundau yaakaemesa Dhavhidha pambuwa yokupurira yaOrinani muJebhusi.

² Wakatanga kuaka ngezuva rechipiri romwedzi wechipiri, ngegore rechirongomuna rokutonga kwake.

³ Izvi ndizvo zvipimo zvaSoromoni mukuaka mhatso yaMwari: Kureba kwayo kudai ngokupima kwokutanga mamitha makumi mairi nemanomwe, kupamhama kwayo mamitha mapfumbamwe.

⁴ Berere remberi kwemhatso kureba kwaro kwaiedzana nokupamhamha kwemhatso, mamitha mapfumbamwe, nokuturama kwaro mudenga mamitha makumi mashanu nemarongomuna. Mukati mwekamera wakariseta ngomukore wakaera.

⁵ Rupande rukuru rwemhatso wakarukwakwatidza ngematanda omusaipresi, akaseta ngomukore wakaera, akanangura padera payo miedzaniso yemiti yemibvumo neyemaketani.

⁶ Wakanemesa mhatso ngemapuwe anomutengo mukuru. Mukore uwo waiya mukore wakabva Pharavhaimu.

⁷ Ndizvo wakaseta mhatso, mwamba, sika, marukumbati nemisiwo, zveshe ngomukore; wakanangura makherubhi padera pemarukumbati.

⁸ Wakaaka ndau yakachenesesa; kureba kwayo kwaiya kwakadai ngokupamhamha kwemhatso, mamitha mapfumbamwe, kupamhama kwayo kwaiya mamitha mapfumbamwe; wakaiseta ngomukore wakaereswa, kuwanda kwawo kwaiya mametiriki thanisi aida kuita makumi mairi omukore.

⁹ Nouremu hwezvipikiri hwaiya magramu omukore mazana mashanu nemakumi manomwe (570). Naye wakaseta makamera omuturika ngomukore.

¹⁰ Mukati mwemhatso yakachenesesa wakanangura miedzaniso miiri yemakherubhi, akaiseta ngomukore.

¹¹ Maphapiro emakherubhi aida kuita mamitha mapfumbamwe: phaphiro rimwe nekherubhi raiya mamitha mairi nezvidoko zviiri rechibata rukumbati rwemhatso, nephaphiro raro rimweni raiya mamitha mairi nezvidoko zviiri kureba kwaro, awo akatambanudzwa kumarutii, rimwe rakabatana nephaphiro rekherubhi rimweni pakati pekamera, echiguma parukumbati kumarutii eshe ekamera, akanasa kutambanudzwa kupamhama kweshe echida kuita mamitha mapfumbamwe.

¹² Nekherubhi iri, phaphiro rimwe raiita mamitha mairi nezvidoko zviiri kureba, nephaphiro rimweni raiya mamitha mairi nezvidoko zviiri, rechigwamana nephaphiro rekherubhi rokutanga.

¹³ Maphaphiro emakherubhi aya akatambanudzwa aiita mamitha anoda kuita mapfumbamwe; nawo aiema ngetsoka dzawo, nehope dzawo dzairingira pakati pemhatso.

¹⁴ NaSoromoni wakanasira jira retemperi ngemiara yakasvipirika, yakatsvukuruka, yakatsvuka, nejira rorukangaza rakanaka, wakarukirapo miedzaniso yemakherubhi.

Sika Mbiri dzeThusi

¹⁵ Pamberi pemhatso wakaita sika mbiri, imwe ngaimwe mamitha gumi namashanu nehafu kureba, nezvipanda zvaiya padera padzo, sika imwe ngaimwe mamitha mairi nezvidoko zviiri kureba.

¹⁶ Wakaita hata dzemaketani, akadziisa padera pesika; wakaita zana remaphomegraniti, akaaisa padera pehata dzemaketani.

¹⁷ Wakaemesa sika pamberi petemperi, imwe ngokumudyo, neimweni ngokumuoshwe; wakadudza zina reimwe yokumudyo kuti Jakhini, nezina reyokumuoshwe kuti Bhoazi.