2 MaKro. 29 - Bhaibheri Rakachena muChindau

Hezekia Mambo waJudha

¹ Hezekia wakatanga kutonga apo aanemakore makumi mairi nemashanu; wakatonga makore makumi mairi nemapfumbamwe muJerusarema. Zina ramai ake raizwi Abhija, mwanasikana waZekharia.

² Wakaita zvakanaka mukuona kwaMambo Mwari, kudai ngezvaakaita Dhavhidha baba ake.

Kucheneswa kweTemperi

³ Mugore rokutanga rokutonga kwake, mumwedzi wokutanga wakabeura misiwo yemhatso yaMambo Mwari, wakainasirira.

⁴ Wakapinzamwo vapristi nevaRevhi, wakavaunganidza pamwepo mundau yakapamhama ngokumabvazuva.

⁵ Wakati kwevari, “Purutanai kwendiri, imwimwi vaRevhi! Dzichenesei pachenyu, muchenese mhatso yaMambo Mwari, Mwari wemadzibaba enyu, mubudise kubanze zvinetsvina kubva mundau yakachena.

⁶ Ngokuti madzibaba edu vakapauka, vakaita zvakashata mukuona kwaMambo Mwari, Mwari wedu; vakamusiya, vakafuratira hope dzavo kubva kuugaro hwaMambo Mwari, vakafuratira mishana yavo.

⁷ Vakakonyawo misiwo yeparuwanze, vakadzima zvibani, avazi kupisha mutombo unegwema rakanaka nokuti kupira midiro yokupisha mundau yakachena kunaMwari waIsuraeri.

⁸ Ndizvo ushungu hwaMambo Mwari hwakadzaka padera paJudha neJerusarema, naye wakavaita chiro chinotyisa, chinoshamisa nechinoridzirwa murudzi, kudai ngezvomunoona ngemadziso enyu.

⁹ Ngokuti, ringira, madzibaba edu vakawa ngokupinza kweshoti, vakororo vedu, vanasikana vedu nevakadzi vedu vari muuhloko ngendaa yeizvi.

¹⁰ Zvino zvirimwo mumwoyo mwangu kuti ndiite chitenderano naMambo Mwari, Mwari waIsuraeri, kuti ushungu hwake hunotyisa hukunukuke kubva kwetiri.

¹¹ Vakororo vangu, zvino musaita vanorekeredza, ngokuti Mambo Mwari wakamutsanangura kuti mueme pamberi pake kumushandira, kuti muite vashandiri vake nokupira midiro.”

¹² Zvino vaRevhi vakamiruka, Mahathi mukororo waAmasai, naJoeri mukororo waAzaria, vevakororo vaKohathi; nevevakororo vaMerari, Kishi mukororo waAbhidhi, naAzaria mukororo waJeharereri; nevevaGershoni, Joa mukororo waZima, naEdheni mukororo waJoa;

¹³ nevevakororo vaErizafani, Shimuri naJeueri; nevevakororo vaAsafi, Zekharia naMatania;

¹⁴ nevevakororo vaHemani, Jehueri naShimei; nevevakororo vaJedhuthuni, Shemaia naUzieri.

¹⁵ Vakaunganidza hama dzavo, vakadzichenesa pachavo, vakapotera kudai ngokupanga kwamambo, ngemazwi aMambo Mwari, kuti vachenese mhatso yaMambo Mwari.

¹⁶ Vapristi vakapotera mukati mwemhatso yaMambo Mwari, kuti vaichenese, navo vakabudisa kubanze zviro zvinetsvina zveshe zvevakaona kubva mutemperi raMambo Mwari, vakazviunza muruwanze rwemhatso yaMambo Mwari; nevaRevhi vakazvitora kuti vazvirashe kubanze kuRwizi Kedhironi.

¹⁷ Vakaamba kuchenesa ngezuva rokutanga romwedzi wokutanga, nezuva rechisere rwomwedzi vakaguma kuruwanze rwaMambo Mwari. Zvino vakachenesa mhatso yaMambo Mwari ngemazuva masere; ngezuva regumi namatanhatu romwedzi wokutanga vakapedza.

Temperi Inopirwazve

¹⁸ Zvino vakapotera kunamambo Hezekia, vakati, “Tapedza kuchenesa yeshe mhatso yaMambo Mwari, nearita rokupishira midiro, nezvidziyo zvaro zveshe, netafura remisara yezvingwa, nezvidziyo zvaro zveshe.

¹⁹ Zvidziyo zveshe zvaakarasha mambo Ahazi ngokupauka kwake, mukutonga kwake apo paakapauka, takazvinasira, tikazvichenesa; wona, zvino zviri pamberi pearita raMambo Mwari.”

²⁰ Zvino mambo Hezekia wakamuka mangwanani maishi, akaunganidza vatongi veshe vemadhorobha, navo vakakwira kumhatso yaMambo Mwari.

²¹ Navo vakaunza mikono minomwe, magondohwe manomwe, zvimakwai zvinomwe, nemagotokoto manomwe, kuitira umambo mudiro wokushaisha nendau yakachena, nevaJudha. Naye wakapanga vapristi vakororo vaAroni kuti vazvipire padera pearita raMambo Mwari.

²² Ndizvo vakauraya mikono, nevapristi vakaashira ngazi, vakaifafazira paarita; vakauraya magondohwe, vakafafazira ngazi yawo padera pearita; zve, vakauraya zvimakwai vakafafazirazve ngazi yazvo paarita.

²³ Zvino vakaunza magotokoto kuita mudiro wokushaisha pamberi pamambo nepomushongano weshe; navo vakaisa nyara dzavo padera pawo,

²⁴ nevapristi vakaauraya, vakaita mudiro wokushaisha ngengazi yawo padera pearita, kuita kuripirwa kwevaIsuraeri veshe. Ngokuti mambo wakapanga kuti mudiro wokupisha nomudiro wokushaisha upirwe ngendaa yevaIsuraeri veshe.

²⁵ Wakaemesa vaRevhi mumhatso yaMambo Mwari vanengoma dzesimbi, magitari nezvidangari, kudai ngokupanga kwaDhavhidha, nokwaGadhi muonesi wamambo, naNathani muprofeti, ngokuti mupango waibva kunaMambo Mwari kubudikidza ngevaprofeti vake.

²⁶ VaRevhi vakaema, vakabata zveshe zvokushandisa mukuemba ndizvo zvaDhavhidha, nevapristi vanemagwama.

²⁷ Zvino Hezekia wakapanga kuti vapire midiro yokupisha paarita. Naapo mudiro wokupisha pewakatangwa, noruyo rwaMambo Mwari rwakatangwa kuembwawo nehwamanda pamwepo nezvokuridza zvaDhavhidha, mambo waIsuraeri.

²⁸ Mbungano yeshe yakadira, vaembi vakaemba, nevapristi vemagwama vakaridza; neizvi zveshe zvakaangira metsa mudiro wokupisha wapera.

²⁹ Naapo vapedza midiro, mambo naavo veshe vaiyapo vakakotama, vakadira.

³⁰ Mambo Hezekia nevakuru vakapanga vaRevhi kuti vaembe kukudza Mambo Mwari ngemazwi aDhavhidha naaAsafi muprofeti. Vakaemba kukudza ngokudakadzwa, vakakotamisa masoro avo vakadira.

³¹ Zvino Hezekia wakapingura, akati, “Zvino mwadzipira kunaMambo Mwari; kwedzerai pasinde mupire midiro nemidiro yokubonga mumhatso yaMambo Mwari.” Ndizvo mbungano yakaunza midiro yokupisha neyokubonga; naavo veshe vaiya nomwoyo inoda vakaunza midiro yokupisha.

³² Nouwandu hwemidiro yokupisha yakaunzwa ngembungano yaiya mikono makumi manomwe, nemagondohwe zana (100), nezvimakwai mazana mairi (200); zveshe izvi zvaiya midiro yokupisha kunaMambo Mwari.

³³ Nemhuka dzakapirwa kunaMwari dzaiya mikono mazana matanhatu (600), nemakwai makumi emazana matatu (3,000).

³⁴ Asi vapristi vaiya vashomani yaamho, navo avazi kukona kudzinasira dzeshe kuita midiro yokupisha; ndizvo metsa vapristi vamweni vadzichenesa pachavo, hama dzavo vaRevhi vakavadetsera, metsa wakapera; ngokuti vaRevhi vaiya nomwoyo wakapinda kunaka kuti vadzichenese kupinda vapristi.

³⁵ Ngepabanze pemidiro yokupisha yaiya yakawanda, nemafuta emidiro yokunyarara, nemidiro yokumwa, yaipirwa pamwepo nemidiro yokupisha. Ndizvo mishando yemhatso yaMambo Mwari yakaemeswazve.

³⁶ Hezekia nevanhu veshe vakadakara, ngendaa yezvaakaitira vanhu Mwari; ngokuti chiro ichi chakaitwa ngokukasira.