2 MaKro. 28 - Bhaibheri Rakachena muChindau

Ahazi Mambo waJudha

¹ Ahazi wakatanga kutonga ane makore makumi mairi; wakatonga makore gumi nematanhatu muJerusarema. Aazi kuita zvakanaka mukuona kwaMambo Mwari, kudai ndiDhavhidha baba ake,

² asi wakahamba ngenjira dzeshe dzemadzimambo aIsuraeri. Wakaita miedzaniso yakanyunguruswa yaBhaari;

³ wakapira midiro mubani romukororo waHinomu, wakaita kuti vakororo vake vaphotye muriro, kudai ngezvainyangadza zvaiitwa ngevemadzinza avo vaakadzinga Mambo Mwari kubva pamberi pevanhu vaIsuraeri.

⁴ Wakapira midiro nokupisha mitombo inegwema rakanaka mundau dzakakwirira, padera pemitunhu, nepashi pomuti weshe wakasvipira.

Hondo neVaAramu neVaIsuraeri

⁵ Ndizvo Mambo Mwari, Mwari wake, wakamupira munyara dzamambo weAramu, uwo wakamunyisa, akatora hloko dzakawanda, akadziunza Dhamasekusi. Wakapirwawo munyara dzamambo waIsuraeri, uwo wakamunyisa ngokuuraya kukurutu.

⁶ Pheka, mukororo waRemaria, wakauraya mwaJudha vanhu zana nemakumi mairi emakumi emazana (120,000) ngezuva rimwe, avo veshe vaiya ngwazi dzakashinga, ngokuti vaiya vasiya Mambo Mwari, Mwari wemadzibaba avo.

⁷ NaZikhiri ngwazi inesimba yokwaEfuremu wakauraya Maaseia mukororo wamambo, naAzirikamu nduna yengome, naErikana muteeri mukuru wamambo.

⁸ Vanhu vaIsuraeri vakatora hloko kubva kuhama dzavo mazana mairi emakumi emazana (200,000), vakadzi, vakororo nevanasikana; vakatorazve zvizhinji zvevakachakata kubva kwevari, vakaunza zvakachakatwa Samaria.

Odhedhi Muprofeti

⁹ Asi muprofeti waMambo Mwari waiyamwo, zina rake ndiOdhedhi; naye wakabuda kooshongana nehondo yakaguma Samaria, wakati kwevari, “Ringirai, ngokuti Mambo Mwari, Mwari wemadzibaba enyu wakamunyangadzirwa Judha, akavapira munyara dzenyu, nemwi mwakavauraya mukunyangadzwa kukurutu ukwo kwakaguma mudenga.

¹⁰ Zvino munoda kutora vana vaJudha neveJerusarema, kuti vaite hloko dzenyu, vamuna nevakadzi. Asi imwimwi munenyi ngepanze pezvishaishi kunaMambo Mwari, Mwari wenyu here?

¹¹ Zvino izwai kwendiri, muhwirinze hloko, dzemwakatora kubva kuhama dzenyu, ngokuti ushungu hunotyisa hwaMambo Mwari huri padera penyu.”

¹² Vamweni vakuru vokwaEfuremu, Azaria mukororo waJohanani, Bherekhia mukororo waMeshiremothi, Jehizikia mukororo waSharumu, naAmasa mukororo waHadhirai, vakaema kurambidza avo vaibva kuhondo,

¹³ navo vakati kwevari, “Musatiunzira hloko muno, ngokuti munoda kuunza padera pedu izvo zviro zvinotiita vashaishi kunaMambo Mwari, kututsira zvishaishi zvetinazvo nendaa. Ngokuti ndaa yedu yakatokura, pane ushungu hunotyisa hunorwisana naIsuraeri.”

¹⁴ Ndizvo vanhu vaiya nezvokurwa ndizvo vakasiya hloko nezvevakachakata pamberi pevakuru nepamberi pembungano yeshe.

¹⁵ Zvino avo vakadudzwa ngemazina avo vakamiruka, vakatora hloko, vakatora zvakachakatwa, vakavasimidza avo vaiya vari mutitinini pakati pavo, vakavapa magwada, vakavapa zvokudya nezvokumwa, vakavadzodza ngemafuta; vakatwara vaiya vasina simba pazvimbongoro, vakavaunza kuhama dzavo Jerikho, kudhorobha remiti yemichindwi. Zvino vakahwirira Samaria.

Ahazi Unokumbira Kudetserwa ngeAsiria

¹⁶ Panguva iyo mambo Ahazi wakatuma vanhu koodaidza madzimambo eAsiria kuti vamudetsere.

¹⁷ Ngokuti vaEdhomu vaiya vakauya koorwisa nokunyisa Judha, vakatora hloko.

¹⁸ NevaFiristia vaiya vakachakatawo madhorobha enyika dziri muShefera, nemadhorobha aiya okubani aJudha, navo vaiya vakatora Bhethishemeshi, Aijaroni, Gederothi, Sokho nemaguta aro, Thimina nemaguta aro, neGimizo nemaguta aro; navo vakagaramwo.

¹⁹ Ngokuti Mambo Mwari wakadzasa Judha pashi ngendaa yaAhazi mambo waIsuraeri, ngokuti wakaita zvakashata muJudha, naye wakapauka akaita usikagondeki kunaMambo Mwari.

²⁰ Ndizvo mambo Tirigathiphirinesa mambo weAsiria wakauya koorwa naye, naye wakamutambudza, aazi kumugwinyisa.

²¹ Ngokuti Ahazi wakatora rupande rwepfuma yemhatso yaMambo Mwari, neyemhatso yamambo, neyenduna, naye wakazvipa kuita muthero kunamambo weAsiria; asi azvizi kumudetsera.

Zvishaishi zvaAhazi

²² Munguva yokutambudzika kwake wakaangira kupauka kubva kunaMambo Mwari, uyu mambo Ahazi.

²³ Ngokuti wakapira midiro kunezvimwari zveDhamasekusi, iro rakamunyisa, naye wakati, “Ngokuti zvimwari zvevaAramu zvakavadetsera, ndizvo ndinozopira midiro kwezviri, kuti zvizondidetserawo.” Asi zvakaita kuparadzwa kwake, nekwevaIsuraeri veshe.

²⁴ NaAhazi wakaunganidza zvidziyo zvemhatso yaMwari, wakazvipwanya kuita zvigurwa zvidziyo zvemhatso yaMwari. Wakakonya misiwo yemhatso yaMambo Mwari, wakadziitira maarita kundau dzeshe muJerusarema.

²⁵ Mudhorobha reshe raJudha wakaita ndau dzakakwirira dzokupishirepo mitombo inegwema rakanaka kuzvimwari zvimweni, wakamusira ushungu hwaMambo Mwari, Mwari wemadzibaba ake.

²⁶ Zvino mishando yake imweni, nenjira dzake dzeshe, kubvira pakutanga metsa pakugumisira, ringira, zvakanyorwa muBhuku reMadzimambo aJudha neaIsuraeri.

²⁷ NaAhazi wakaata nemadzibaba ake, navo vakamutsira mudhorobha, muJerusarema; asi avazi kumuunza mumaiba emadzimambo aIsuraeri. Hezekia mukororo wake wakatonga pandau yake.