2 MaKro. 26 - Bhaibheri Rakachena muChindau

Uzia Mambo waJudha

¹ Zvino vanhu veshe vaJudha vakatora Uzia, uwo waiya nemakore gumi nematanhatu, vakamuemesa kuita mambo pandau yababa ake Amazia.

² Wakaakisa Erothi, akarihwirinza kunaJudha, ngesure apo mambo aata nemadzibaba ake.

³ Uzia wakatanga kutonga anemakore gumi nematanhatu, naye wakatonga makore makumi mashanu nemairi muJerusarema. Zina ramai ake raizwi Jekhoria weJerusarema.

⁴ Naye wakaita zvakanaka mukuona kwaMambo Mwari, kudai ndizvo zveshe zvakaitwa ndiAmazia baba ake.

⁵ Wakadziemesera pachake kutsvaka Mwari ngemazuva aZekharia, uwo wakamupanga ngokutya Mwari; nomukuwo weshe waakamutsvaka Mambo Mwari, Mwari wakamufumisa.

⁶ Wakabuda koorwa hondo nevaFiristia, wakapwanyira pashi rukumbati rweGathi, nerukumbati rweJabhine, norukumbati rweAshidhodhi; wakaaka madhorobha panyika yeAshidhodhi, naapo peshe pakati pevaFiristia.

⁷ Mwari wakamudetsera kurwa nevaFiristia, nokurwa nevaArabhia, avo vaigara muGuribhaari, nokurwa nevaMeuni.

⁸ VaAmoni vakabhadhara muthero kunaUzia, nembiri yake yakapararira metsa kuguma kumigano yeEgipite, ngokuti wakadzigwinyisa kakurutu.

⁹ Zve, Uzia wakaaka mathawa muJerusarema ngepaMusiwo wepaKhona nePamusiwo wokuBani, nepakumonerera porukumbati, wakaagwinyisa.

¹⁰ Wakaaka mathawa mushango, wakatsa zvinyuka zvakawanda, ngokuti waiya nezvifuyo zvakawanda, mweshe munyika dzemubani nedzakaterama; waiya nevarimi nevatongori vevhini mumitunhu nomunyika dzakavhundira, ngokuti waida kurima.

¹¹ Zve, Uzia waiya nezvikwata zvevamuna vakanasirirwa koorwa, avo vaienda koorwa ngezvikwata zvikwata, kudai ngokuteererana kwouwandu hwokuerengwa kwavo ndiJeieri munyori naMaaseia mutongi, avo vaiya pashi penyara yaHanania, umwe wenduna dzamambo.

¹² Uwandu hwevakuru vemhatso dzemadzibaba vaiya ngwazi dzinesimba nokushinga vaiya makumi emazana mairi nemazana matanhatu (2,600).

¹³ Pashi penyara dzavo paiya nehondo, yaiya mazana matatu nemanomwe emakumi emazana nemazana mashanu, (307,500) avo vairwa hondo ngesimba guru kudetsera mambo kurwa nemagaa.

¹⁴ Uzia wakavanasirira veshe vehondo zvihlangu, mikhondo, zviqoko, magangautare mbita, nemapuwe ezvimvii.

¹⁵ MuJerusarema wakanasira michini, yakanasirwa ngevamuna ngwazi, kuti iiswe padera pemathawa, nepamakhona erukumbati, kuitira misee yaiposherwa nemapuwe makuru. Nembiri yake yakapararira kundau dziri kuretu, ngokuti wakadetserwa ngenjira inoshamisa kakurutu metsa agwinya.

Uzia Unoororwa ngendaa yoKudzikudza

¹⁶ Asi apo aiya agwinya mwoyo wake wakadzikudza zvakaunza kuurawa kwake. Ngokuti wakashaisha kunaMambo Mwari, Mwari wake, wakapotera mutemperi raMambo Mwari kooita mudiro wokupisha padera pearita rokupishira mitombo inegwema rakanaka.

¹⁷ Asi Azaria mupristi wakapoteramwo ngesure kwake, ane vapristi vaMambo Mwari makumi masere, vaiya vanhu voungwazi;

¹⁸ Vakarambidza Uzia mambo, vakati kwaari, “Andiwepi unosisira kuti upishire mitombo inegwema rakanaka kunaMambo Mwari, asi ngezvevapristi, mibarirwana yaAroni, avo vakaemeserwa kuti vapishe mitombo inegwema rakanaka. Buda kubva kundau yakachena; ngokuti iwewe wakaita zvakashata; akuzokuunziri kuremeredzwa kubva kunaMambo Mwari, Mwari.”

¹⁹ Zvino Uzia wakanyangadzwa. Waiya nechidziyo munyara yake chokupishira mitombo inegwema rakanaka, naapo achakanyangadzirwa vapristi, nhenda yemapere yakabuda pahuma yake pamberi pevapristi mumhatso yaMambo Mwari, pasinde pearita rokupishira mitombo inegwema rakanaka.

²⁰ Naapo Azaria mupristi mukuru navo veshe vapristi vakamuringira, vakaona kuti waiya aane mapere pahuma yake. Vakakasira kumubudisa kubvapo, naye emene wakakasira kubudamwo, ngokuti Mambo Mwari waiya amuorora.

²¹ Uzia mambo wakaita mapere metsa zuva rokufa kwake, aane mapere wakagara ega mumhatso yakaparadzana, ngokuti wakaparadzaniswa kubva kumhatso yaMambo Mwari. Jothamu mukororo wake waiya mukuru padera pemhatso yamambo, echitonga padera pevanhu venyika.

²² Zvino mishando imweni yaUzia, yokutanga neyokupedzisira, yakanyorwa ndiIsaya muprofeti, mukororo waAmozi.

²³ Uzia wakaata nemadzibaba ake; vakamuika pamwepo nemadzibaba ake mumunda wemaiba emadzimambo, ngokuti vakati, “Une mapere.” Jothamu mukororo wake wakatonga pandau yake.