2 MaKro. 25 - Bhaibheri Rakachena muChindau

Amazia Mambo waJudha

¹ Amazia wakatanga kutonga anemakore makumi mairi nemashanu, naye wakatonga muJerusarema makore makumi mairi nemapfumbamwe. Zina ramai ake raizwi Jehoadhani weJerusarema.

² Naye wakaita zvakarurama mukuona kwaMambo Mwari, asi haiwa ngomwoyo wakaperera.

³ Ngokukasira apo umambo hwagwinyiswa munyara dzake, wakauraya varanda vake, avo vaiya vakauraya mambo baba ake.

⁴ Asi aazi kuuraya vana vavo, asi wakaita kudai ngezvakanyorwa mumipango, mubhuku raMosi, apo paakapanga Mambo Mwari echiti, “Madzibaba avazourawi ngendaa dzevana vavo, nevana avazourawi ngendaa dzemadzibaba avo, asi munhu weshe unozofa ngendaa yokushaisha kwake.”

Hondo nevaEdhomu

⁵ Amazia wakaunganidza vanhu vaJudha pamwepo, wakavaemesa ngemhatso dzemadzibaba pashi penduna dzemakumi emazana nedzemazana, veshe vaJudha nevaBhenjamini. Wakaerenga veshe kubvira kunevane makore makumi mairi kuenda mberi, wakaona kuti mazana matatu emakumi emazana (300,000) evamuna vakatsanangurwa, vaikona kubuda koorwa hondo, vaikona kutwara mukhondo nechihlangu.

⁶ Wakathorazve ngwazi kubva muIsuraeri, zana remakumi emazana (100,000), wakadzibhadhara makhirogramu esirivha aida kukwana makumi emazana matatu nemazana marongomuna (3,400).

⁷ Asi munhu waMwari wakauya kwaari echiti, “A mambo, usatendera kuti hondo yaIsuraeri iende newe, ngokuti Mambo Mwari aari kuvaIsuraeri akadi, nokuvana vaEfuremu veshe.

⁸ Asi kudai wechida kuenda, enda hako wega woorwa; ita unogwinya mukurwa, nokuti Mwari unozoita kuti uwe pamberi pegaa rako; ngokuti Mwari unesimba rokudetsera nokuti kudzasa pashi.”

⁹ Amazia wakati kunomunhu waMwari, “Asi tinozoitenyi ngemakhirogramu esirivha makumi emazana matatu nemazana marongomuna (3,400) etakabhadhara hondo yaIsuraeri ndiwo?” Munhu waMwari wakapingura, akati, “Mambo Mwari unokona kukupa zvakawanda kupinda izvo.”

¹⁰ Zvino Amazia wakapetudza hondo iyo yakauya kwaari yechibva kwaEfuremu, kuti ihwirirezve kanyi. Asi ushungu hwavo hwakabaka kakurutu kuvaJudha, navo vakahwirira kanyi kwavo vakatseneka kakurutu.

¹¹ Amazia wakadzigwinyisa, wakatungamirira vanhu vake; wakaenda navo mubani romunyu, akauraya vanhu veSeira gumi remakumi emazana (10,000).

¹² Vanhu vaJudha vakabata vamweni vakasara vechipona gumi remakumi emazana (10,000), vakavaunza padera pebuwe, rakaita ruware, vakavakandira pashi kubvapo, ndizvo vakagukaguka veshe kuita zvigurwa.

¹³ Asi vanhu vehondo vaakapetudza kanyi Amazia, kuti vasaenda koorwa naye, vakauya vakaparadza madhorobha aJudha, kubvira Samaria metsa kuguma Bhethihoroni; vakaurayamwo makumi emazana matatu (3,000) navo vakatora zvakachakatwa zvizhinji.

¹⁴ Zvino ngesure Amazia apetuka kubva koouraya vaEdhomu, wakaunza zvimwari zvevanhu vaSeira, wakazvigadzika kuti zviite zvimwari zvake, naye wakazvidira, wakapisha mutombo unegwema rakanaka kwezviri.

¹⁵ Ndizvo ushungu hwaMambo Mwari hwakabaka kunaAmazia, wakatuma muprofeti kwaari, uwo wakati kwaari, “Wakatsvaka ngenyi zvimwari zvevanhu, zvisikazi kukona kurwira vanhu vazvo kubva kunyara yako?”

¹⁶ Asi apo achaereketa mambo wakati kwaari, “Takakuita mupangi wamambo here iwewe? Rekera! Ungaurairwenyi iwewe?” Ndizvo muprofeti wakanyarara, asi wakati, “Ndinozia kuti Mwari waemesa kukuparadza, ngendaa yokuti waita izvi, newe auzi kupurutana kupanga kwangu.”

Hondo neVaIsuraeri

¹⁷ Zvino Amazia mambo waJudha wakatsvaka zano, akatuma kunaJoashi, mukororo waJehoahazi, mukororo waJehu, mambo waIsuraeri, wakati, “Uya, tiringirane hope kuhope.”

¹⁸ NaJoashi mambo waIsuraeri wakatumira izwi kunaAmazia mambo waJudha echiti, “Rukato rwaiya muRebhanoni rwakatumira kumusedhari waiya muRebhanoni, rwechiti, ‘Ipa mwanasikana wako kunomukororo wangu kuita mukadzi wake;’ asi chikara chomushango reRebhanoni chakapindapo, chakatsikira pashi rukato.

¹⁹ Iwewe unoti, ‘Ringira, ndanyisa vaEdhomu;’ nomwoyo wako unodzikudza mukuganza. Zvino gara kanyi; ngenyi wechidzitsvakira madambudziko kuita kuremadzwa kwako, kuti umiremwo, iwewe pamwepo nevaJudha vanewe?”

²⁰ Asi Amazia aazi kupurutana; ngokuti zvakabva kunaMwari, kuti avapire munyara dzemagaa avo, ngokuti vaiya vatsvaka zvimwari zveEdhomu.

²¹ Ndizvo Joashi mambo waIsuraeri wakakwira; vakaonana hope kuhope mukurwa, iye naAmazia mambo waJudha, kuBhetishemeshi, iro riri raJudha.

²² VaJudha vakanyiswa ngevaIsuraeri; veshe vakatiza munhu umwe ngaumwe kuenda kanyi kwake.

²³ Joashi mambo waIsuraeri wakabata Amazia mambo waJudha, mukororo waJoashi, mukororo waAhazia, paBhethishemeshi; wakamuunza Jerusarema, naye wakaputsira pashi rukumbati rweJerusarema kubvira paMusiwo waEfuremu metsa kuMusiwo wokuKhona, nharauko yacho yaida kuita mamitha mazana mairi (200).

²⁴ Naye wakatora zveshe mukore nesirivha, nezvidziyo zveshe zvaiya naObhedhedhomu mumhatso yaMwari; wakatorazve upfumi hwemhatso yamambo, neavo vanhu vaiya vakaitwa chibatiso, naye wakahwirira Samaria.

²⁵ Amazia mukororo waJoashi mambo waJudha wakapona makore gumi nemashanu ngesure kwokufa kwaJoashi mukororo waJehoahazi mambo waIsuraeri.

²⁶ Zvino mishando imweni yaAmazia, yokutanga neyokugumisira, aizi kunyorwa here muBhuku reMadzimambo aJudha neaIsuraeri?

²⁷ Kubvira panguva yaakapauka Amazia kubva kunaMambo Mwari, vakapangana zano rokumumukira muJerusarema; naye wakatizira Rakhishi. Asi vakatuma vanhu, vakamuteera Rakhishi, vakamuuraireyo.

²⁸ Vakamutwara ngemahachi; wakaikwa pamwepo nemadzibaba ake mudhorobha raDhavhidha.