2 MaKro. 24 - Bhaibheri Rakachena muChindau

Joashi Mambo waJudha

¹ Joashi waiya nemakore manomwe apo paakaamba kutonga, naye wakatonga makumi marongomuna emakore muJerusarema. Zina ramai ake raizwi Zibhia weBheerishebha.

² Joashi wakaita zvakanaka mukuona kwaMambo Mwari mazuva eshe okupona kwaJehoiadha mupristi.

³ Jehoiadha wakamutsvakira vakadzi vairi, naye wakabara vakororo nevanasikana.

⁴ Ngesure kweizvi Joashi wakadziemesera kunasirisa mhatso yaMambo Mwari.

⁵ Naye wakaunganidza pamwepo vapristi nevaRevhi, akati kwevari, “Budai muende mumadhorobha eshe aJudha, muunganidze mare kubva kuvaIsuraeri veshe kuti munasirise mhatso yaMwari wenyu gore ngegore, muone kuti mwazviita ngokukasira.” Asi zvakanyadaro vaRevhi avazi kukasira.

⁶ Ndizvo mambo wakadaidza Jehoiadha mukuru, akati kwaari, “Auzi kuita ngenyi kuti vaRevhi vaunze mare yemuthero kubva Judha neJerusarema, kudai ngechironzo chaMosi muranda waMambo Mwari, newomushongano waIsuraeri, newetende rechitenderano?”

⁷ Ngokuti vakororo vaAtharia, iro dzimai rakashata, vakaputsa kupinda mumhatso yaMwari nokushandisa zviro zvaiya zvakapirwa kumhatso yaMambo Mwari, vakazvipira kunaBhaari.

⁸ Ndizvo mambo wakavapanga, vakanasira bhokisi, vakarigadzika ngepabanze pemusiwo wemhatso yaMambo Mwari.

⁹ Vakadaidzira mukati mwaJudha nomukati mweJerusarema reshe kuti vaunze mare yomuthero yakaemeserwa vaIsuraeri ndiMosi muranda waMwari mushango.

¹⁰ Vatungamiriri veshe nevanhu veshe vakadakara, vakaunza mithero yavo, vakaiisa mubhokisi, metsa razara.

¹¹ Mukuwo weshe werakaunzwa bhokisi kunduna dzamambo ngenyara dzevaRevhi, naapo vaona kuti mare yaiya yakawanda mukati mwaro, munyori wamambo nenduna yomupristi mukuru vaizouya nokudurura bhokisi nokuritora, nokuripetudza nokurigadzika pandau yaro. Ndizvo vakaita kudaro zuva ngezuva, vakaunganidza mare ngokuwandisa.

¹² Mambo naJehoiadha vakaipa kuneavo vaiya vakuru mumushando wemhatso yaMambo Mwari, navo vakatora vaaki nevatsetsi kuti vanasirise mhatso yaMambo Mwari, naavo vaikona kushanda ngesimbi nethusi kuti vaakise mhatso yaMambo Mwari.

¹³ Ndizvo avo vakaemeswa mumushando vakashanda vakanasirisa ngenyara dzavo, vakaupedza, navo vakanasirisa mhatso yaMwari kudai ngechiemo chayo, vakaigwinyisisa.

¹⁴ Naapo vaiya vapedza, vakaunza mare yakasara kunamambo nokunaJehoiadha, vakanasira ndiyo zvidziyo zvemhatso yaMambo Mwari, zvidziyo zvokushandisa, zvokupira midiro yokupisha, zvikwaku, zvidziyo zvomukore nezvesirivha. Vakapira midiro yokupisha nguva dzeshe mumhatso yaMambo Mwari mumazuva eshe okupona kwaJehoiadha.

Zviemeso zvaJehoiadha Zvinopetudzwa Sure

¹⁵ Asi Jehoiadha wakakura kuita musharuka naye wakafa; wakafa aane makore zana nemakumi matatu (130).

¹⁶ Navo vakamuika mudhorobha raDhavhidha pakati pemadzimambo, ngokuti waiya akaita zvakanaka muIsuraeri mweshe, kunaMwari nokumhatso yake.

¹⁷ Zvino ngesure kwokufa kwaJehoiadha kwakauya vakuru vekwaJudha, akakudza mambo; zvino mambo wakavapurutana.

¹⁸ Navo vakasiya mhatso yaMambo Mwari, Mwari wemadzibaba avo, vakadira sika dzokudira nemiedzaniso. Noushungu hwakaguma padera paJudha neJerusarema ngendaa yokupauka kwevakaita.

¹⁹ Asi wakatuma vaprofeti pakati pavo, kuti vavapetudze kunaMambo Mwari; navo vakaita chapupu kwevari, asi avazi kupurutana.

²⁰ Zvino Mweya waMwari wakabata Zekharia mukororo waJehoiadha mupristi, naye wakaema pakaturama pamberi pevanhu, wakati kwevari, “Unoronza izvi Mwari, ‘Munopauka ngenyi kubva mumipango yaMambo Mwari, kuti musabudirira? Ngokuti imwimwi mwasiya Mambo Mwari, wamusiyawo imwimwi.’ ”

²¹ Asi vakapangana kumumukira, ngokupanga kwamambo vakamuponda ngemapuwe muruwanze rwemhatso yaMambo Mwari.

²² Joashi mambo aazi kukarakadza nyasha dzaJehoiadha baba vaZekharia dzaakaita kwaari, asi wakauraya mukororo wake. Naapo echifa, wakati, “Mambo Mwari ngaaone ichi, achiunzidzire!”

Magumo oKutonga kwaJoashi

²³ Kumagumo egore, hondo yevaAramu yakauya koorwa naJoashi. Vakaguma Judha neJerusarema, vakauraya vakuru veshe vevanhu kubva pakati pavo, vakatumira zveshe zvakachakatwa zvevakatora kunamambo weDhamasekusi.

²⁴ Kunyazwi hondo yevaAramu yakauya iri zvikwata zvishomani zvevanhu, Mambo Mwari wakapira hondo huru munyara dzavo, ngendaa yokuti vaiya vakasiya Mambo Mwari, Mwari wemadzibaba avo. Ndizvo vakatonga Joashi.

²⁵ Naapo vaiya vabva kwaari, vechimusiya aremadzwa kakurutu, varanda vake vakamumukira ngendaa yengazi yevakororo vaJehoiadha mupristi, vakamuuraya ari mumubhedhi wake. Ndizvo wakafa; vakamutsira mudhorobha raDhavhidha, asi avazi kumuika mumaiba emadzimambo.

²⁶ Avo vakamumukira ndiZabhadhi mukororo waShimeathi muAmoni, naJehozabhadhi mukororo waShimirithi wevaMoabhi.

²⁷ Zvino ngendaa yevakororo vake, nemazwi makuru echiprofeti akaereketwa ngendaa yake, nokuakiswa kwemhatso yaMambo Mwari, ringira zvakanyorwa mududziro rebhuku rendaa dzemadzimambo. NaAmazia mukororo wake wakatonga pandau yake.