2 MaKro. 23 - Bhaibheri Rakachena muChindau

Kurwisa kwaAtharia

¹ Asi mugore rechinomwe Jehoiadha wakadzigwinyisa, wakatora nduna dzemazana kuita bangano nadzo, Azaria mukororo waJerohamu, Ishumaeri mukororo waJehohanani, Azaria mukororo waObhedhi, Maaseia mukororo waAdhaia, naErishafati mukororo waZikhiri.

² Navo vakaenda ngomuJudha mweshe, vakaunganidza vaRevhi kubva kumadhorobha eshe aJudha, nevakuru vemhatso vemadzibaba aIsuraeri, navo vakauya Jerusarema.

³ Zvino mbungano yeshe yakaita chitenderano namambo mumhatso yaMwari. Jehoiadha wakati kwevari, “Ringirai, uripano mukororo wamambo! Ngaatonge, kudai ngezvaakagondisa Mambo Mwari ngendaa yevakororo vaDhavhidha.

⁴ Izvi ndizvo zviro zvomunozoita: rupande rumwe rwenyu rwechitatu rwevapristi nevaRevhi vanouya pabingo ngeSabatha munozoita varindi vemisiwo,

⁵ rupande rumweni rwechitatu runozoapo kumhatso yamambo, norupande rumweni rwechitatu runozoa patsikiro romusiwo; nevanhu veshe vanozoa pamaruwanze emhatso yaMambo Mwari.

⁶ Musatendera naumwe kuti apotere mumhatso yaMambo Mwari, kwega vapristi, naavo vanoshandamwo vevaRevhi; ndivo vanozopotera, ngokuti vakacheneswa, asi vanhu vamweni veshe vanozongwarira kupanga kwaMambo Mwari.

⁷ VaRevhi vanozotendenedza mambo, umwe ngaumwe anezvokurwa zvake munyara yake; kunyazwi ndiani unozopotera mumhatso unozourawa. Garai namambo apo echipinda mukati naapo echibuda.”

⁸ VaRevhi nevaJudha veshe vakaita kudai ngezvaakavapanga zveshe Jehoiadha mupristi; umwe ngaumwe wakaunza vanhu vake avo vaizopinda pabingo ngezuva reSabatha, naavo vaibuda ngezuva reSabatha; ngokuti Jehoiadha mupristi aazi kuparadza zvikwata.

⁹ Jehoiadha mupristi wakapa kunduna dzezana mikhondo, nezvihlangu zvikuru nezvidoko zvaiya zvamambo Dhavhidha, zvaiya mumhatso yaMwari;

¹⁰ naye wakaemesa vanhu veshe kuita varindi vamambo, munhu weshe anechokurwa ndicho munyara, kubvira ngokubani kwemhatso nokuenda dera kwemhatso kutendenedza arita nemhatso.

¹¹ Zvino wakabudisa mukororo wamambo, vakaisa dzungudza padera pake, vakamupa bhuku rechitenderano; vakamuita mambo. Jehoiadha nevakororo vake vakamudzodza vechiti, “Mambo pona mhera nariini!”

¹² Naapo Atharia azwa bope revanhu vairumba nokukudza mambo, wakapinda mumhatso yaMambo Mwari mune vanhu;

¹³ naapo aringira, akaona mambo akaema pasinde pesika yake pokupotera mukati, nenduna huru nevaridzi vemagwama pasinde pamambo, nevanhu veshe venyika vechidakara, vechiridza magwama, nevaembi vanezviro zvokuemba ndizvo, vechitungamira mukudakara. Atharia wakabaura zvokufuka zvake, akachema echiti, “Kumukira! Kumukira!”

¹⁴ Zvino Jehoiadha mupristi wakabudisa nduna huru dzaiya dzaakaemeswa padera pehondo, echiti kwevari, “Mubudisenyi kubanze, pakati pemisara yavarindi; kunyazwi ndiani unomuteera ngaaurawe ngeshoti.” Ngokuti mupristi wakati, “Musamuuraira mumhatso yaMambo Mwari.”

¹⁵ Ndizvo vakamubata; naye waipinda pamusiwo wemahachi wemhatso yamambo, vakamuurairapo.

Jehoiadha Unonasirisa Mipango

¹⁶ NaJehoiadha wakaita chitenderano pakati pake nevanhu veshe namambo, kuti vanosisira kuita vanhu vaMambo Mwari.

¹⁷ Zvino vanhu veshe vakaenda kumhatso yaBhaari, vakaipwanyira pashi; vakaputsa maarita ake nemiedzaniso yake kuita zvigurwa, vakauraya Mathani mupristi waBhaari pamberi pemaarita.

¹⁸ Jehoiadha wakaemesa mishando yokurindwa kwemhatso yaMambo Mwari munyara dzevapristi vevaRevhi, avo vaakaronga Dhavhidha mumhatso yaMambo Mwari kuti vapire midiro yokupisha yaMambo Mwari, kudai ngezvakanyorwa mumipango yaMosi, ngokudakara nokuemba, kudai ngezvaakaemesa Dhavhidha.

¹⁹ Wakaemesa varindi pamisiwo yemhatso yaMambo Mwari, kuti kusaapo naumwe unopinda wakasvipiswa ngechiro kunyazwi ngechiri.

²⁰ Naye wakatora nduna huru, vakuru, vatongi vevanhu, nevanhu veshe venyika, vakadzaka namambo kubva kumhatso yaMambo Mwari; vakahamba ngepamusiwo wedera kupotera mumhatso yamambo. Vakagadzika mambo padendemaro rake roumambo.

²¹ Ndizvo vanhu veshe venyika vakadakara, nedhorobha raiya nokunyarara, ngesure kwokuurawa kwaAtharia ngeshoti.