2 MaKro. 21 - Bhaibheri Rakachena muChindau

¹ Jehoshafati wakaata nemadzibaba ake, wakaikwa nemadzibaba ake mudhorobha raDhavhidha. Jehoramu mukororo wake wakatonga pandau yake.

Jehoramu Mambo waJudha

² Waiya nehama, vakororo vaJehoshafati: Azaria, Jehieri, Zekharia, Azaria, Mikhaeri naShefatia; veshe ava vaiya vakororo vaJehoshafati mambo waJudha.

³ Baba avo vakavapa zvipo zvikurutu zvesirivha, mukore, nezviro zvimweni zvinomutengo mukuru, nemadhorobha akashosherwa aJudha; asi wakapa umambo kunaJehoramu, ngokuti ndiye waiya dangwe.

⁴ Naapo Jehoramu akwira padendemaro rababa ake, wakagwinyiswa, wakauraya hama dzake dzeshe ngeshoti, nevamweniwo vevakuru vaIsuraeri.

⁵ Jehoramu waiya nemakore makumi matatu nemairi apo paakatanga kutonga, naye wakatonga makore masere muJerusarema.

⁶ Wakahamba ngenjira dzemadzimambo aIsuraeri, kudai ngezvevakaita vemhatso yaAhabhi; ngokuti wakaroora mwanasikana waAhabhi. Naye wakaita izvo zvakashata mukuona kwaMambo Mwari.

⁷ Asi zvakanyadaro Mambo Mwari aazi kuparadza mhatso yaDhavhidha, ngendaa yechitenderano chaakaita naDhavhidha, nokudai ngezvaakagondisa kuti unozopa kujeka kwaari nokumibarirwana yake mhera nariini.

⁸ Mumazuva ake vaEdhomu vakamukira utongi hwaJudha, navo vakadziemesera mambo wavo.

⁹ Ndizvo Jehoramu wakabuda nenduna huru dzake, nengoro dzake dzeshe. Wakamiruka usiku, akarwisa vaEdhomu avo vaiya vakamutendenedza nenduna dzake dzengoro.

¹⁰ Ndizvo vaEdhomu vanondomukira utongi hwaJudha metsa nanyamashi. Panguvayo veRibhinawo vakamukira kubva pashi penyara yake; ngokuti iye waiya akasiya Mambo Mwari, Mwari wemadzibaba ake.

¹¹ Zve, wakaemesa ndau dzakakwirira munyika yemitunhu yaJudha, naye wakatungamirira vagari veJerusarema kuita zvifebi, wakaita kuti vaJudha vapauke.

¹² Tsamba yakauya kwaari yakabva kunaErija muprofeti yechiti, “Unoronza izvi Mambo Mwari, Mwari waDhavhidha baba ako: Ngokuti auzi kuhamba ngenjira dzaJehoshafati baba ako, nokuti ngenjira yaAsa mambo waJudha,

¹³ asi wakahamba kudai ngenjira dzemadzimambo aIsuraeri, wakatungamirira Judha nevagari veJerusarema kuita zvifebi, kudai ngemhatso yaAhabhi yakatungamirira vaIsuraeri kuita zvifebi, ngokuti wakaurayawo hama dzako, nhengo dzemhatso yababa ako, avo vaiya vakanaka kupinda iwewe,

¹⁴ ringira, Mambo Mwari unozounza padera pevanhu vako denda rakashata, vana vako, vakadzi vako, nepezviro zvako zveshe.

¹⁵ Newe pachako unozorwara nhenda yakashata kakurutu nhenda yomundani mwako, metsa noura hwako hwabuda kubanze zuva ngezuva ngendaa yenhenda.”

¹⁶ Mambo Mwari wakamusira Jehoramu ushungu hwevaFiristia nowevaArabhia, avo vanogara pasinde neEthiopia.

¹⁷ Navo vakakwira koorwa naJudha, vakarirwisa, vakapinda mukati mwaro, vakatora zviro zveshe zvevakaona zvomumhatso yamambo, pamwepo nevakororo vake nevakadzi vake; ndizvo akuna mukororo naumwe wakasara kwaari ngepabanze paJehoahazi mukororo wake mudoko.

¹⁸ Zvino ngesure kweizvi Mambo Mwari wakaunza mumaura ake nhenda isikarapiwi.

¹⁹ Munguva iyo, pakaperera makore mairi, maura ake akabuda kubanze, ngendaa yenhenda, naye wakafa mukurwadziwa kukurutu. Vanhu vake mukumuremeredza avana chevakapishira kwaari, kudai ngokupishira kwavakaita kunemadzibaba ake.

²⁰ Waiya nemakore makumi matatu namairi apo paakatanga kutonga, naye wakatonga muJerusarema makore masere. Wakafa, pasina naumwe waimutsumba. Vakamuika mudhorobha raDhavhidha, asi haiwa mumaiba emadzimambo.