2 MaKro. 20 - Bhaibheri Rakachena muChindau

Hondo neEdhomu

¹ Ngesure kweizvi vaMoabhi nevaAmoni nevamweni vevaMeuni vakaguma kunaJehoshafati koorwa hondo.

² Vanhu vamweni vakauya kunaJehoshafati, vakamuronzera vechiti, “Kunouya mbungano huru yehondo koorwa newe inobva Edhomu noruseri rworuandhle; vatoapo paHazazoni-thama,” (iro rinozwi Engedhi.)

³ Jehoshafati wakatya, wakadziemesera pachake kutsvaka Mambo Mwari, wakaita kuti vanhu vaere kudya munyika yeshe yaJudha.

⁴ VaJudha vakaungana kukumbira kuti vadetserwe ndiMambo Mwari; vakabva kumadhorobha eshe aJudha kootsvaka Mambo Mwari.

⁵ Jehoshafati wakaema pakati pomushongano waJudha neJerusarema, mumhatso yaMambo Mwari, pamberi poruwanze rutsva,

⁶ naye wakati, “A Mambo Mwari, Mwari wemadzibaba edu, andiwepi here Mwari womudenga? Andiwepi here unotonga umambo hweshe hwemadzinza? Munyara dzako ririmwo simba nokugwinya, kuitira kuti kusazoapo naumwe ungaemesedzana newe.

⁷ Auzi here, A Mwari wedu, kudzinga vanhu venyika iyi kubva pamberi pevanhu vako Isuraeri, newe ukaipa kumibarirwana yeshamwari yako Abrahama mhera nariini?

⁸ Navo vakagaremwo, vakamuakiramwo mhatso yezina renyu vechiti,

⁹ ‘Kudai kushata kwechizotigumira, shoti, kutongwa, denda rinotyisa nokuti nzara, tinozoema pamberi pemhatso iyi, nepamberi pako, ngokuti zina rako riri mumhatso iyi, techichema kwouri mukutambudzika kwedu, naapo unozozwa nokudetsera.’

¹⁰ Ndizvo zvino, ringira vanhu vaAmoni, nevanhu vaMoabhi, nevoMutunhu Seira, avo vousikazi kutendera Isuraeri kuti avachakate mukubuda kwavo kubva munyika yeEgipite, avo vevakarekera vakakunukuka vevasikazi kuparadza.

¹¹ Ringira njira yevanotiunzidzira ndiyo, vauya kootidzinga, kuti tibve munhaka yako, yowakatipa kuita nhaka yedu.

¹² A Mwari wedu, auzotongi padera pavo here? Ngokuti isusu atina simba rokurwa nembungano huru yakadai ngeiyi yauya koorwa nesu. Atizii nechokuita, asi madziso edu anoringira kwouri.”

¹³ Vanhu veshe vaJudha vakaema pamberi paMambo Mwari, nevadoko vavo, vakadzi vavo, nevana vavo.

¹⁴ Zvino Mweya waMambo Mwari wakauya padera paJahazieri mukororo waZekharia mukororo waBhenaia, mukororo waJeieri, mukororo waMatania, muRevhi wevakororo vaAsafi, ari pakati pembungano.

¹⁵ Wakati, “Izwanyi, imwimwi mweshe vaJudha nevagari veJerusarema, newe mambo Jehoshafati: Unoronza izvi Mambo Mwari kwomuri, ‘Musatya nokuti kupera simba ngendaa yembungano huru iyi; ngokuti kurwa akusikwenyu, asi ngokwaMwari.

¹⁶ Mangwani dzakai koorwa navo; vanozokwira ngokumawere eZizi; munozovaona kumagumo kwebani, ngepamberi peshango raJerueri.

¹⁷ Hondo iyi aisi yenyu kurwa kuti muirwe; torai ndau dzenyu, mueme mwakanyarara, muone kunyisa kwaMambo Mwari kwaanomuitira, imwimwi vaJudha neJerusarema. Musatya, nokuti kupera simba; mangwani budai koorwa navo, ngokuti Mambo Mwari unozoa nemwi.’ ”

¹⁸ Zvino Jehoshafati wakakotamisa hope yake pashi pamavhu, navo veshe vokwaJudha nevagari vemuJerusarema vakawa pashi pamberi paMambo Mwari, vechidira Mambo Mwari.

¹⁹ NevaRevhi, vana vaKohathi nevana vaKhora, vakaema kukudza Mambo Mwari, Mwari waIsuraeri, ngeizwi gurutu.

²⁰ Navo vakamiruka mangwanani maishi, vakabuda kuenda mushango reTekoa; naapo vachabuda Jehoshafati wakaema akati, “Ndizwenyi, imwimwi vaJudha nevagari veJerusarema; tendai kunaMambo Mwari, Mwari wenyu, ngokudaro munozogwinyiswa; mugonde vaprofeti vake, nemwi munozobudirira.”

²¹ Naapo paakapangana nevanhu, wakaemesa avo vaizoembera Mambo Mwari, kuti vamukudze muunaku hwokuchena kwake, apo vechienda pamberi pehondo vechiti, “Ngaabongwe Mambo Mwari, ngokuti rudo rwake runogara mhera nariini.”

²² Naapo vechitanga kuemba nokukudza, Mambo Mwari wakaemesa varwi ngokufishika koorwisa vaAmoni, nevaMoabhi, nevoMutunhu Seira, avo vaiya vauya koorwisa vaJudha, ndizvo vakavauraya.

²³ Ngokuti vana vaAmoni nevaMoabhi vakamiruka koorwa nevagari voMutunhu Seira, kuvaparadza yaamho; naapo vaiya vapedza kuparadza vagari voMutunhu Seira, veshe vakadetserana kuurayana pachavo umwe ngaumwe.

²⁴ Naapo vaJudha vokwedzera kuthawa rokurindira romushango, vakaringira kumbungano; ringira, vaiya vaa miiri yakafa pamavhu; akuna naumwe wakapokonyoka.

²⁵ Naapo Jehoshafati nevanhu vake vaguma kuti vatore izvo zvakachakatwa kubva kwevari, vakaona pakati pavo zvifuyo zvakawanda, zviro zvakawanda, machira, zvinemeso zvinomutengo mukuru, izvo zvevakadzitorera pachavo, zvakawandisa kupinda izvo zvevaikona kutwara. Vakapedza mazuva matatu vechiunganidza zvakachakatwa, ngendaa youwandu hwazvo.

²⁶ Ngezuva rechirongomuna vakaungana pamwepo muBani reBherakha, ngokuti vakakudzapo Mambo Mwari; ndizvo zina rendau iyo yakadaidzwa kuti Bani reBherakha metsa nanyamashi.

²⁷ Zvino vanhu veshe vokwaJudha neveJerusarema, naJehoshafati ari pamberi pavo, vakapetuka Jerusarema ngokudakara, ngokuti Mambo Mwari wakavaita kuti vadakare padera pemagaa avo.

²⁸ Vakaguma Jerusarema kumhatso yaMambo Mwari, vane magitari, zvidangari nemagwama.

²⁹ Nokutyisa kwaMwari kwaiya padera poumambo hweshe hwenyika, apo pevakazwa kuti Mambo Mwari wakarwa namagaa aIsuraeri.

³⁰ Ndizvo umambo hwaJehoshafati hwaiya nokunyarara, ngokuti Mwari wake wakamupa kuzorora kundau dzeshe dzakamutendenedza.

Magumo oKutonga kwaJehoshafati

³¹ Ndizvo Jehoshafati wakatonga padera paJudha. Waiya anemakore makumi matatu namashanu apo paakaamba kutonga; wakatonga makore makumi mairi namashanu muJerusarema. Zina ramai ake raizwi Azubha mwanasikana waShirihi.

³² Wakahamba munjira yaAsa baba ake, aazi kupauka kubva kweiri, echiita izvo zvakanaka mukuona kwaMambo Mwari.

³³ Asi ndau dzakakwirira adzizi kuduswa; ngokuti vanhu vaiya vasati vaemesa mwoyo yavo kunaMwari wemadzibaba avo.

³⁴ Zvino mishando imweni yaJehoshafati kubvira yokutanga neyokupedzisira, yakanyorwa muUrongwa yaJehu mukororo waHanani, uwo wakanyorwa ndiye muBhuku reMadzimambo aIsuraeri.

³⁵ Ngesure kweizvi Jehoshafati mambo waJudha wakaita ukama naAhazia mambo waIsuraeri, uwo wakaita zvakashata kakurutu.

³⁶ Wakadzibatanidza pamwepo naye mukunasira ngarava dzokuenda Tharshishi; navo vakanasira ngarava muEzionigebha.

³⁷ Naapo Erieza mukororo waDhodhavhahu weMaresha wakaprofetira Jehoshafati echiti, “Ngokuti wakadzibatanidza naAhazia, Mambo Mwari unozoparadza mishando yako.” Nengarava dzakapwanyika dzikakorera kuenda Tharshishi.