2 MaKro. 19 - Bhaibheri Rakachena muChindau

Muprofeti Unopanga Jehoshafati

¹ Jehoshafati mambo waJudha wakahwirira Jerusarema kumhatso yake zvakanaka.

² Jehu mukororo waHanani mufemberi wakabuda kooshongana naye, akati kunamambo Jehoshafati, “Unosisisa here kuti udetsere vasikadiri Mwari, wechivada avo vanonyenya Mambo Mwari? Ngendaa yeizvi ushungu hwaMambo Mwari huri padera pako.

³ Zvakanyadaro zviripo zvakanaka zvinooneka mwouri, ngokuti wakaparadza sika dzaAshera dzokudira kubva munyika, newe wakanasirira mwoyo wako kutsvaka Mwari.”

Jehoshafati Unonasirisa Mipango

⁴ Jehoshafati wakagara muJerusarema; zvino wakabudazve wakaenda pakati pevanhu kubva Bheerishebha kunyika yemitunhu yaEfuremu, wakavaunzazve kunaMambo Mwari, Mwari wamadzibaba avo.

⁵ Wakaemesa vatongi munyika, mumadhorobha eshe akashosherwa aJudha, dhorobha ngedhorobha.

⁶ Wakati kunevatongi, “Pinimidzai chomunoita, ngokuti amutongi mwakaemera vanhu, asi mwakaemera Mambo Mwari; unemwi mukutonga.

⁷ Ndizvo zvino kutyisa kwaMambo Mwari ngakugare padera penyu; ngwarai ngezvomunoita, ngokuti akuna kutonga kwakashata kunaMambo Mwari, Mwari wedu, nokuti kutsara vanhu, nokuti kuashira zvitengero.”

⁸ Zve, Jehoshafati wakaemesawo muJerusarema vaRevhi vamweni nevapristi nenduna dzemhatso dzemadzibaba aIsuraeri, kuti vatongere Mambo Mwari, nokugura ndaa apo panophikisanwa. Vaiya nezvigaro zvavo Jerusarema.

⁹ Wakavapanga echiti, “Iyi ndiyo njira yomunozoita ndiyo, mukutya Mambo Mwari, mukugondeka, nomwoyo weshe wakaperera.

¹⁰ Naapo ndaa yaunzwa kwomuri yehama dzenyu avo vanogara mumadhorobha avo, ngendaa yokuparadza ngazi, nendaa yezvironzo, mipango, zviemeso nezvapupu, nemwi munozovapanga kuti vasazoshaisha kupauka pamberi paMambo Mwari, noushungu usauya padera penyu, nepadera pehama dzenyu. Itai izvi, nemwi amuzopauki.

¹¹ Ringirai, Amaria mupristi mukuru uri padera penyu mundaa dzeshe dzaMambo Mwari; naZebhadhia mukororo waIshumaeri mutongi wemhatso yaJudha mundaa dzeshe dzamambo; nevaRevhi vanozomushandira kudai ngevakuru pamberi penyu. Itai ngokushinga naMambo Mwari ngaave nevakarurama!”