2 MaKro. 18 - Bhaibheri Rakachena muChindau

Muprofeti Mikhaia Unongwadza Ahabhi

¹ Zvino Jehoshafati waiya noupfumi hwakawanda, nokuremeredzwa kukurutu; ngokuroodzana wakaita chitenderano pamwepo naAhabhi.

² Ngesure kwemakore akatikuti wakadzaka Samaria kunaAhabhi. Ahabhi wakamuuraira makwai nekabi zvakawanda, nevanhu vaiya naye, wakamunyengerera kuti akwire koorwa naRamothigireadhi.

³ Ahabhi mambo waIsuraeri wakati kunaJehoshafati mambo waJudha, “Ungakwira neni here Ramothigireadhi?” Wakamupingura, “Inini ndakadai ndiwe, nevanhu vangu vakadai ngevako; nesu tinozoa newe mukurwa.”

⁴ Asi Jehoshafati wakatiwo kunamambo waIsuraeri, “Bvunza kutanga, ndinokupota, kuzwa zvinoronza izwi raMambo Mwari.”

⁵ Zvino mambo waIsuraeri wakaunganidza vaprofeti pamwepo mazana marongomuna (400), wakati kwevari, “Tinozokwira here Ramothigireadhi koorwa, nokuti tisakwirayo?” Navo vakati, “Kwirayo, ngokuti Mwari unozoripira munyara dzamambo.”

⁶ Asi Jehoshafati wakati, “Apana here pano muprofeti umweni waMambo Mwari wokuti tibvunze ndiye?”

⁷ Mambo waIsuraeri wakati kunaJehoshafati, “Uchiripo hake munhu umwe, wetingabvunza ndiye kunaMambo Mwari, Mikhaia mukororo waImira; asi inini ndinomuzonda, ngokuti aatongoprofeti kwendiri zvakanaka, asi zvakashata nguva dzeshe.” Jehoshafati wakati, “Mambo asaereketa kudaro.”

⁸ Zvino mambo waIsuraeri wakadaidza nduna yake echiti, “Daidza ngokukasira Mikhaia mukororo waImira.”

⁹ Zvino mambo waIsuraeri naJehoshafati mambo waJudha vaiya vakagara umwe ngaumwe padendemaro rake, vakapfekeswa zvipfeko zvavo, navo vaiya vakagara pambuwa pamhene pokupotera pamusiwo weSamaria; nevaprofeti veshe vaiprofeta pamberi pavo.

¹⁰ Zedhekia mukororo waKhenaana wakadzinasirira nyanga dzesimbi, naye wakati, “Unoronza izvi Mambo Mwari: Ngenyanga idzi unozotunga vaAramu metsa vapedzwa.”

¹¹ Veshe vaprofeti vaiprofeta zvakatodzana vechiti, “Kwira Ramothigireadhi, unyise; ngokuti Mambo Mwari unozoripira munyara dzamambo.”

¹² Nhumwa iyo yakaenda koodaidza Mikhaia yakaereketa kwaari yechiti, “Ringira, mazwi evaprofeti anoereketa zvakanaka kunamambo, veshe umwe ngaumwe; ndizvo ngokudaro, ndinokupota, neako ngaaite kudai ngaavo, uerekete zvakanaka.”

¹³ Asi Mikhaia wakati, “Kudai ngezvaanopona Mambo Mwari, kunyazwi ngechiri chaanozoronza Mwari wangu, ndicho chendinozoereketa.”

¹⁴ Naapo aiya auya kunamambo, mambo wakati kwaari, “Mikhaia, tingaenda here Ramothigireadhi koorwa, nokuti tisaendayo?” Naye wakati kwaari, “Endai, mwoonyisa; vanozopirwa munyara dzako.”

¹⁵ Asi mambo wakati kwaari, “Ndinozokupanga kanganai kuti uerekete gwinyiso rega kwendiri ngezina raMambo Mwari?”

¹⁶ Zvino wakati kwaari, “Ndaona vaIsuraeri veshe vakapararira padera pemitunhu, kudai ngemakwai asina muushi; naMambo Mwari wakati, ‘Ava avana tenzi wavo; munhu weshe ngaaende kumhatso yake ngokunyarara.’ ”

¹⁷ Mambo waIsuraeri wakati kunaJehoshafati, “Andizi kukuronzera here kuti aazoprofeti zviro zvakanaka kwendiri, asi zvakashata zvega?”

¹⁸ Zvino Mikhaia wakati, “Ndizvo izwai izwi raMambo Mwari: Ndakamuona Mambo Mwari akagara padera pedendemaro rake, nehondo yeshe yomudenga yakaema ngokumudyo nokumuoshwe kwake.

¹⁹ Mambo Mwari wakati, ‘Ndiani unozonyengerera Ahabhi mambo waIsuraeri, kuti akwire Ramothigireadhi, afe?’ Zvino umwe wakaereketa chiro chimwe noumweni chimweniwo,

²⁰ metsa mweya wakauya, ukaema pamberi paMambo Mwari, ukati, ‘Inini ndinozomunyengerera,’ Mambo Mwari wakati kwaari, ‘Unozomunyengerera ngenjiranyi?’

²¹ Wakati, ‘Ndinozobuda ndiite mweya wokunyepa mumiromo yevaprofeti vake veshe.’ Zvino Mambo Mwari wakati, ‘Iwewe unozomunyengerera, unozomunyisazve; endayo uite kudaro.’

²² Ndizvo, wona, Mambo Mwari waisa mweya wemanyepo mumiromo yeava vaprofeti vako; Mambo Mwari wakuemesera zvakashata.”

²³ Zvino Zedhekia mukororo waKhenaana wakakwedzera, wakamupamhadza padama rake, akati, “Ngeiri njira yowakahamba ndiyo mweya waMambo Mwari wechibva kwendiri kuereketa kwouri?”

²⁴ Mikhaia wakati, “Ringira, uchazoona ngeiro zuva rounozoenda koodzihwarisa mukamera riri ngomukati.”

²⁵ Mambo waIsuraeri zvino wakati, “Torai Mikhaia, mumupetudze kunaAmoni mutongi wedhorobha nokuna Joashi mukororo wamambo;

²⁶ mwechiti, ‘Unoronza izvi mambo: Isai munhu uyu mutirongo, mumupe chingwa chakatsonga nemvura, metsa ndapetuka mukunyarara.’ ”

²⁷ Mikhaia wakati, “Kudai wechizopetuka mukunyarara, Mambo Mwari aazi kuereketa kubudikidza ndini.” Naye wakati, “Izwanyi, imwimwi mweshe vanhu!”

Kufa kwaAhabhi

²⁸ Ndizvo mambo waIsuraeri naJehoshafati, mambo waJudha, vakakwira Ramothigireadhi.

²⁹ Mambo waIsuraeri wakati kunaJehoshafati, “Inini ndinozodziitisa kuita kudai ngomunhu umweni, kuti ndiende koorwa hondo; asi iwewe pfeka zvokufuka zvako.” Ndizvo mambo waIsuraeri wakadziitisa kudai ngomunhu umweni; ndizvo vakaenda koorwa.

³⁰ Zvino mambo weAramu akapanga nduna dzengoro dzaiya naye echiti, “Musarwa nevadoko nokuti vakuru, kwega irwai namambo waIsuraeri.”

³¹ Naapo nduna dzengoro dzaona Jehoshafati, dzakati, “Ndiye mambo waIsuraeri.” Ndizvo vakakunukuka kuti varwe naye; asi Jehoshafati wakadaidzira, naMambo Mwari wakamudetsera. Mwari wakaita kuti vabve kwaari,

³² ngokuti apo nduna dzengoro dzaona kuti andiyepi mambo waIsuraeri, vakapetuka sure kubva koomurumbirira.

³³ Asi munhu wakatikuti wakakwamura uta wake mambundikidzira, akafura mambo waIsuraeri ngepamarimbanidziro pezvokupfeka zvokurwa zvake; ndizvo wakati kunomunhu wake wengoro, “Petuka, undibvise kubva muhondo, ngokuti ndaremadzwa.”

³⁴ Hondo yakapisha ngeiro zuva, namambo waIsuraeri wakatseyama kudzigwinyisa mungoro yake akaringirana navaAramu metsa madeekoni; zuva rodokupota wakafa.