2 MaKro. 16 - Bhaibheri Rakachena muChindau

Madambudziko naIsuraeri

¹ Mugore remakumi matatu nematanhatu rokutonga kwaAsa, Bhaasha mambo waIsuraeri wakauya koorwa naJudha, naye wakaaka Rama, kuitira kuti asaapo unobuda nokuti kupotera kunaAsa mambo waJudha.

² Zvino Asa wakabudisa sirivha nomukore kubva kumhatso youpfumi hweshe hwaMambo Mwari, nohwemhatso yamambo, wakazvitumira kunaBhenihadhadhi mambo weAramu, waigara Dhamasekusi echiti,

³ “Ngachiapo chitenderano pakati pedu iwewe neni, kudai ngezvechaiyapo pakati pababa ako nababa angu; ringira, ndinokutumira sirivha nomukore; enda woogura chitenderano chako naBhaasha mambo waIsuraeri, kuti iye abve kwendiri.”

⁴ Bhenihadhadhi wakapurutana kunamambo Asa, wakatuma nduna dzehondo dzake kuti dzirwise madhorobha aIsuraeri. Vakanyisa Ijoni, Dhani, Abherimaimu nemadhorobha eshe okungwariremwo zviro eNafitari.

⁵ Naapo Bhaasha azwa ndizvo, wakarekera kuaka Rama, wakarekera mushando wake.

⁶ Zvino mambo Asa wakaunza vaJudha veshe, navo vakadusa mapuwe eshe eRama, nematanda aro, izvo zveshe zvaaiaka ndizvo Bhaasha; naye wakaaka ndizvo Gebha neMizipha.

Muprofeti Hanani

⁷ Ngenguvayo Hanani muprofeti wakauya kunaAsa mambo waJudha, wakati kwaari, “Ngokuti wakagonda kunamambo weAramu, usikagondi kunaMambo Mwari, Mwari wako, ndizvo hondo yamambo weAramu yakapokonyoka kubva munyara yako.

⁸ Dzisaiyapo hondo huru here dzevaEthiopia nedzevaRibhia, vanengoro nevagadhi vemahachi vakawanda? Asi ngokuti wakagonda kunaMambo Mwari, iye wakavapira munyara dzako.

⁹ Ngokuti madziso aMambo Mwari anoringira apo naapo kupotya nyika yeshe, kugwinyisa avo vanemwoyo yakaperera kwaari. Ndizvo muizvi waita ngoupenzi; ngokuti kubvira zvino munozorwa hondo.”

¹⁰ Zvino Asa wakanyangadzwa ngomuprofeti, naye wakamuisa mumanguri mutirongo, ngokuti wakamunyangadza ngeiyi ndaa. NaAsa wakatambudza vamweni vevanhu ngomukuwo umwewo.

Magumo oKutonga kwaAsa

¹¹ Ringirai, mishando yaAsa kubvira yokutanga neyokugumisira, yakanyorwa muBhuku reMadzimambo aJudha naIsuraeri.

¹² Asa mugore remakumi matatu nemapfumbamwe rokutonga kwake wakabatwa ngenhenda mutsoka dzake, nenhenda yake yakaangirira kukura; kunyazwi mukurwara kwake aazi kutsvaka Mambo Mwari, asi wakatsvaka kudetserwa kubva kunyanga.

¹³ Zvino Asa wakaata nemadzibaba ake, wakafa ngegore remakumi marongomuna narimwe rokutonga kwake.

¹⁴ Vakamutsira muiba rake, raakadziitira emene mudhorobha raDhavhidha. Vakamuradzika mumubhedhi uwo waiya unemakha anegwema rakanaka, nembeu dzakaparadzana dzemitombo inegwema rakanaka yakanasirwa ngenyanga inozia mitombo; navo vakamuitira muriro mukurutu kumuremeredza.