2 MaKro. 15 - Bhaibheri Rakachena muChindau

Asa Unonasirisa Mupango

¹ Mweya waMwari wakauya padera paAzaria mukororo waOdhedhi.

² Wakabuda kuenda kooshongana naAsa, wakati kwaari, “Ndizwe, iwewe Asa, nemwi mweshe vaJudha nevaBhenjamini; Mambo Mwari unemwi, apo muchiri naye. Kudai mwechimutsvaka, munozomuona; asi kudai mwechimurasha, naye unozomurasha.

³ Panguva yakareba vaIsuraeri vakagara vasina Mwari wegwinyiso, vasina nomupristi wokudzidzisa, vasina nomupango.

⁴ Asi apo mukutambudzika kwavo vakatenderukira kunaMambo Mwari, Mwari waIsuraeri, vakamutsvaka, wakaoneka kwevari.

⁵ Munguvadzo zvaiya zvisikazi kuita nyore kwaari unobuda nokwaari unopotera, ngokuti kutambudzika kukuru kwakabata veshe vagari venyika.

⁶ Vakaparadzwa kuita zvigurwa, dzinza rakaparadza dzinza, nedhorobha rakaparadza dhorobha, ngokuti Mwari wakavatambudza ngematambudziko eshe.

⁷ Asi imwimwi, itai vakagwinya! Nyara dzenyu dzisapera simba, ngokuti mishando yenyu inozoripirwa.”

⁸ Naapo Asa azwa mazwi aya, nezvakaprofetwa ndiAzaria mukororo waOdhedhi, wakashingiswa, akadusa miedzaniso inonyangadza kubva munyika yeshe yaJudha neyaBhenjamini, nokubva kumadhorobha eshe aakatora kubva kunyika yemitunhu yaEfuremu. Wakamusira arita raMambo Mwari iro raiya pamberi peruwanze rwemhatso yaMambo Mwari.

⁹ Naye wakaunganidza veshe vaJudha nevaBhenjamini, naavo vakabva kunyika yaEfuremu, yaManase, neyokwaSimeoni, avo vaigara navo kudai ngevapara, ngokuti vakatizira kwaari ngokuwanda kubva kunyika yaIsuraeri, apo vaona kuti Mambo Mwari, Mwari wake unaye.

¹⁰ Vakaungana pamwepo pachavo muJerusarema ngomwedzi wechitatu, ngegore regumi nemashanu rokutonga kwaAsa.

¹¹ Vakapira mudiro kunaMambo Mwari muzuva iro weizvo zvevakachakata, kabi mazana manomwe (700) nemakwai makumi emazana manomwe (7,000).

¹² Navo vakaita chitenderano chokutsvaka Mambo Mwari, Mwari wemadzibaba avo, ngomwoyo wavo weshe, nomweya wavo weshe.

¹³ Kunyazwi ndiani usikatsvaki Mambo Mwari, Mwari waIsuraeri waizourawa, mudoko nokuti mukuru, mwamuna nokuti mukadzi.

¹⁴ Vakapika mhiko kunaMambo Mwari ngeizwi guru nokudaidzira, nokuridza minanzi nemagwama.

¹⁵ VaJudha veshe vakadakara ngemhiko; ngokuti vaiya vakapika ngomwoyo yavo yeshe, vakamutsvaka ngokudisisa kweshe kwavo; naye wakaoneka ndivo, naMambo Mwari wakavapa kuzorora kundau dzeshe dzinovatendenedza.

¹⁶ Mambo Asa wakadusa Maakha mai ake kuti vasaita vahosi, ngendaa yokuti vakaita muedzaniso wokudira unonyangadza mugwasha. Asa wakaputsa muedzaniso wavo, wakaukuya akaupisha kuRwizi Kedhironi.

¹⁷ Asi ndau dzakakwirira adzizi kuduswa kubva muIsuraeri. Zvakanyadaro mwoyo waAsa waiya wakaperera mazuva ake eshe.

¹⁸ Naye wakaunza kumhatso yaMwari izvo zvipo zvemhiko zvababa ake nezvake, sirivha, mukore nezvidziyo.

¹⁹ Kwaiya kusina hondo metsa ngegore remakumi matatu nemashanu rokutonga kwaAsa.