2 MaKro. 14 - Bhaibheri Rakachena muChindau

Mambo Asa Unonyisa VaEthiopia

¹ Ndizvo Abhija wakaata nemadzibaba ake, navo vakamuika mudhorobha raDhavhidha. Asa mukororo wake wakatonga pandau yake. Mumazuva ake nyika yaiya nokunyarara makore gumi.

² Asa wakaita zvakanaka nezvakarurama mukuona kwaMambo Mwari, Mwari wake.

³ Wakadusa maarita ezvimwari zvipara, nendau dzakakwirira, akaputsa sika, akaputsira pashi sika dzokudira.

⁴ Wakapanga Judha kuti atsvake Mambo Mwari, Mwari wemadzibaba avo, nokungwarira mupango nezvironzo.

⁵ Wakadusazve kubva mumadhorobha eshe aJudha ndau dzakakwirira nemaarita okupishirapo mitombo inegwema rakanaka. Noumambo hwaiya nokunyarara pashi pake.

⁶ Wakaaka madhorobha akashosherwa muJudha, ngendaa yokuti nyika yaiya nokunyarara. Kwaiya kusina hondo mumakore awo, ngokuti Mambo Mwari wakamupa kunyarara.

⁷ Wakati kunaJudha, “Ngatiake aya madhorobha, tiatendenedze ngemarukumbati, tiise thawa, misiwo nemipiningidzo; nyika ichiri yedu, ngokuti takatsvaka Mambo Mwari, Mwari wedu; takamutsvaka naye wakatipa kunyarara kumarutii eshe.” Ndizvo vakaaka, vakabudirira.

⁸ Asa waiya nehondo yevamuna vaJudha mazana matatu emakumi emazana (300,000) vaitwara zvihlangu nemikhondo, nevaBhenjamini vaitwara zvihlangu nevanofura ngemisee, vaiya mazana mairi nemakumi masere emakumi emazana (280,000); veshe ava vaiya ngwazi dzinoshinga.

⁹ Zera weEthiopia wakabuda koorwa navo anehondo yevarwi vaiya mirioni (10,000,000) nengoro mazana matatu (300); vakaguma Maresha.

¹⁰ Asa wakabuda kooshongana naye, navo vakaronga hondo dzavo mubani reZefatha muMaresha.

¹¹ Asa wakachema kunaMambo Mwari, Mwari wake, akati, “A Mambo Mwari, apana muparadzaniso kwouri pakudetsera vanesimba nevasina simba. Tidetsere, iwewe Mambo Mwari, Mwari wedu, ngokuti tinogonda kwouri, nomuzina rako tauya koorwa neiyi mbungano. A Mambo Mwari, ndiwe Mwari wedu; usatendera munhu kuti anyise padera pako.”

¹² Ndizvo Mambo Mwari wakanyisa vaEthiopia pamberi paAsa nepamberi paJudha; nevaEthiopia vakatiza.

¹³ Asa nehondo yaiya naye vakavarumbirira metsa Gera, nevaEthiopia vakaurawa metsa pasisina naumwe wakasara; ngokuti vakapedzwa pamberi paMambo Mwari nepamberi pehondo yake. Vanhu vaJudha vakatora zvakachakatwa zvizhinji.

¹⁴ Vakanyisa madhorobha eshe akatendenedza Gera, ngokuti kutyisa kwaMambo Mwari kwakaguma padera pavo. Vakaputsira pashi madhorobha eshe; ngokuti zvaiyapo zvakachakatwa zvakawanda kakurutu.

¹⁵ Vakarwisazve matende aavo vaiya nezvibaya zvezvifuyo, vakatora makwai nembudzi zvakawanda nemakamera. Zvino vakahwirira Jerusarema.