2 MaKro. 13 - Bhaibheri Rakachena muChindau

Hondo yaAbhija naJerobhoamu

¹ Mugore regumi nemasere rokutonga kwaJerobhoamu, Abhija wakatanga kutonga padera paJudha.

² Wakatonga makore matatu muJerusarema. Zina ramai ake raizwi Mikhaia mwanasikana waUrieri weGibhea. Zvino kwaiyapo kurwa pakati paAbhija naJerobhoamu.

³ Abhija wakaronga hondo yake yevanhu vari ngwazi vanoshinga, mazana marongomuna emakumi emazana (400,000) evamuna vakatsanangurwa; naJerobhoamu wakaronga hondo yake kurwa naye yevamuna vakatsanangurwa mazana masere emakumi emazana (800,000), vaiya ngwazi dzinoshinga.

⁴ Zvino Abhija wakaema padera pomutunhu unozwi Zemaraimu, uri mukati mwenyika yemitunhu yaEfuremu, echiti, “Ndizwenyi, iwewe Jerobhoamu nevaIsuraeri veshe!

⁵ Amuzii here kuti Mambo Mwari, Mwari waIsuraeri, wakapa kunaDhavhidha umambo kuti atonge padera paIsuraeri kunoti mhera nariini, kwaari nokunevana vake ngechitenderano chomunyu?

⁶ Asi Jerobhoamu mukororo waNebhati muranda waSoromoni mukororo waDhavhidha wakamiruka, akarwisa mambo wake;

⁷ nevamweni vamuna vasina shwiro vakaungana, kuti varwe naRehobhoamu mukororo waSoromoni, naapo Rehobhoamu achimutsva nomwoyo wake waitya, asikakoni kudzirwira.

⁸ “Nazvino munoda kurwira kudusa umambo hwaMambo Mwari kubva kunyara yomukororo waDhavhidha, ngokuti muri mbungano huru, munemakonyana omukore, emwakaitirwa ndiJerobhoamu kuti aite zvimwari zvenyu.

⁹ Amuzi kudzinga here vapristi vaMambo Mwari, mibarirwana yaAroni, nevaRevhi, mukadziitira vapristi venyu kudai ngevanhu venyika dzimweni? Kunyazwi ndiani unouya kuti adzipire anomukono mutsva nemagondohwe manomwe, unozoita mupristi weizvo zvimwari zvisiri Mwari wegwinyiso.

¹⁰ Asi kwetiri, Mambo Mwari ndiMwari wedu, nesu atizi kumusiya. Tinavo vapristi vanoshandira Mambo Mwari, avo vari mibarirwana yaAroni, nevaRevhi ndivo vanoita mishando yavo.

¹¹ Vanopira kunaMambo Mwari mangwanani eshe nemadeekoni midiro yokupisha nemitombo inegwema rakanaka, vanoisa misara yezvingwa zvinopirwa, patafura romukore wakaereswa rakachena; nezvigadzikiro zvezvibani pamwepo nezvivheneko zvayo, kuti zvibake madeekoni eshe; ngokuti isusu tinongwarira kupanga kwaMambo Mwari, Mwari wedu, asi imwimwi mwakamurasha.

¹² Ringirai, Mwari unesu kuti atitungamirire, nevapristi vakabata magwama kuti varidzire nyandayeyo yehondo kurwa nemwi. A vaIsuraeri, musarwa naMambo Mwari, Mwari wemadzibaba enyu; ngokuti amuzobudiriri akadi.”

¹³ Asi Jerobhoamu wakazvongesa vanhu vamweni ngesure kwavo; ndizvo varwi vake vaiya pamberi paJudha, naavo vakazvongeswa vaiya sure kwavo.

¹⁴ Naapo vaJudha varingira sure, ringira, hondo yaiya yavatendenedza mberi nesure. Vakadaidzira kunaMambo Mwari, nevapristi vakaridza magwama.

¹⁵ Zvino vamuna vaJudha vakadaidzira mhere yehondo. Naapo vanhu vaJudha vachadaidzira, Mwari wakanyisa Jerobhoamu nevaIsuraeri veshe pamberi paAbhija nevaJudha.

¹⁶ Vamuna vaIsuraeri vakatiza kubva pamberi paJudha, naMwari wakavapira munyara dzavo.

¹⁷ Abhija nevanhu vake vehondo vakavauraya vakawanda kakurutu; ndizvo kwakawa vamuna vakafa vaIsuraeri mazana mashanu emakumi emazana (500,000) vakatsanangurwa.

¹⁸ Ndikwo kunyiswa kwevakaitwa vana vaIsuraeri ngouwo mukuwo, nevana vaJudha vakanyisa, ngokuti vakagonda kunaMambo Mwari, Mwari wemadzibaba avo.

¹⁹ Abhija wakarumbirira Jerobhoamu, akatora madhorobha kubva kwaari: Bhetheri nemaguta aro, Jeshana nemaguta aro, naEfroni nemaguta aro.

²⁰ Jerobhoamu aazi kuchaane simbazve ngemazuva aAbhija; Mambo Mwari wakamuchaya, akafa.

²¹ Asi Abhija wakakura musimba. Wakadzitorera vakadzi gumi nevarongomuna, akaita baba wevakororo makumi mairi navairi nevanasikana gumi navatanhatu.

²² Mishando imweni yaAbhija, nenjira dzake, nezviito zvake, zvakanyorwa muBhuku yomuprofeti Idho.