2 MaKro. 10 - Bhaibheri Rakachena muChindau

Madzinza eDera Anomukira

¹ Rehoboamu wakaenda Shekhemu, ngokuti vaIsuraeri veshe vaiya vauya Shekemu kuti vamuite mambo.

² Naapo Jerobhoamu mukororo waNebhati azwa ndizvo, (ngokuti waiya muEgipite, apo paakatizira kubva kunaSoromoni mambo,) zvino Jerobhoamu wakapetuka kubva Egipite.

³ Navo vakatumira vanhu koomudaidza. Ndizvo Jerobhoamu nevaIsuraeri veshe vakauya, vakaereketa kunaRehobhoamu vechiti,

⁴ “Baba ako vakaita kuti joka redu rireme padera pedu. Ndizvo zvino ita kuti mushando wababa ako wairema nejoka rake raakaisa padera pedu zvireruke, nesu tinozokushandira.”

⁵ Wakati kwevari, “Uyaizve kwendiri ngesure kwemazuva matatu.” Ndizvo vanhu vakapararira kuenda.

⁶ Zvino mambo Rehobhoamu wakapangana nevanhu vasharuka avo vaiema pamberi pababa ake Soromoni ngenguva yaaiya achapona echiti, “Kupanganyi kwomunozopanga kwendiri kuti ndipingure ava vanhu?”

⁷ Navo vakati kwaari, “Newe kudai wechizoitira nyasha kuneava vanhu, nokuvadakadzisa, nokuereketa mazwi akanaka kwevari, zvino vanozoita varanda vako mhera nariini.”

⁸ Asi wakaramba kupanga kwevasharuka kwevakamupanga, wakaita bangano nevanhu vatsva vakakura naye, vechiema pamberi pake.

⁹ Naye wakati kwavari, “Kupanganyi kwomunozondipanga imwimwi, kuti ndipingure ava vanhu vakaereketa kwendiri vechiti, ‘Ita kuti joka rababa ako raakaisa padera pedu rireruke?’ ”

¹⁰ Vamuna vatsva vakakura naye vakati kwaari, “Iwewe unozopingura avo vanhu vakati kwouri, ‘Baba ako vakaita joka redu kuti rireme, asi iwewe ita kuti ritirerukire;’ izvi ndizvo zvounozoronza kwevari, ‘Chinwe changu chidoko chakafema kupinda chiunu chababa angu.

¹¹ Zvino apo baba angu pevaimutwarisa joka rinorema padera penyu, inini ndinozotutsira kweriri. Baba angu vakamuorora ngethabusi, asi inini ndinozomuorora ngezvinyaada.’ ”

¹² Ndizvo Jerobhoamu nevanhu veshe vakauya kunaRehobhoamu ngezuva rechitatu, kudai ngezvaakaronza mambo echiti, “Uyaizve kwendiri ngezuva rechitatu.”

¹³ Mambo wakavapingura ngenjira yakakonza. Mambo Rehobhoamu wakaramba kupurutana kupanga kwevamuna vasharuka;

¹⁴ wakavapingura kudai ngokupanga kwevamuna vatsva echiti, “Baba angu vakaita joka renyu kuti rireme, asi inini ndinozoritutsira; baba angu vakamuorora ngethabusi, asi inini ndinozomuorora ngezvinyaada.”

¹⁵ Ndizvo mambo aazi kupurutana kuvanhu; ngokuti kwaiya kuemesa kwaMwari, kuti Mambo Mwari azadzise izwi rake, raakaereketa ndiAhija muShiro kunaJerobhoamu mukororo waNebhati.

¹⁶ Naapo vaIsuraeri veshe vaona kuti mambo aazi kuvapurutana, vanhu vakapingura mambo vechiti, “Tinechikoaniswa chenyi kunaDhavhidha? Atina nhaka kunomukororo waJesi. Munhu weshe ngaapararire kuenda kutende rake, imwimwi vaIsuraeri! Zvino iwewe, Dhavhidha dzipenyere zvemhatso yako.” Ndizvo vaIsuraeri veshe vakapararira kuenda kumatende avo.

¹⁷ Asi Rehobhoamu wakatonga padera pevanhu vaIsuraeri vaigara mumadhorobha aJudha.

¹⁸ Naapo mambo Rehobhoamu paakatuma Hadhoramu, uwo waiya mutungamiriri wemishando yevasungwa, vaIsuraeri vakamuponda ngemapuwe, naye wakafa. Asi mambo Rehoboamu wakakasira kukwira mungoro yake, akatiza kuenda Jerusarema.

¹⁹ Ndizvo vaIsuraeri vakamukira mhatso yaDhavhidha metsa nanyamashi.