2 MaKro. 1 - Bhaibheri Rakachena muChindau

Mambo Soromoni Unokumbira Ungwaru

¹ Soromoni mukororo waDhavhidha wakadzigwinyisa muumambo hwake; Mambo Mwari, Mwari wake waiya naye, naye wakamukudza kakurutu.

² Soromoni wakadaidza vaIsuraeri veshe, nduna dzemakumi emazana nedzemazana, vatongi veshe, nevatungamiriri veshe vaIsuraeri nevakuru vemhatso dzemadzibaba.

³ Zvino Soromoni nembungano yeshe yaiya naye, vakakwira kuenda kundau yakakwirira paGibheoni; ngokuti tende romushongano raMwari, iro rakaitwamwo ndiMosi, muranda waMambo Mwari, mushango raiyapo.

⁴ Asi Dhavhidha waiya akakwidza bhokisi rechitenderano chaMwari kubva Kiriathijearimu, akariisa kundau iyo Dhavhidha yaakarinasirira, ngokuti waiya akaridzimikira tende muJerusarema.

⁵ Zve arita rethusi iro rakanasirwa ndiBhezareri mukororo waUri, mukororo waHuri, raiyapo pamberi pethabhenakeri raMambo Mwari. NaSoromoni nembungano yeshe vakabvunzapo kunaMwari.

⁶ Soromoni wakakwirapo kuarita rethusi pamberi paMambo Mwari, iro raiya patende romushongano, akapira midiro gumi remazana (1,000) yokupisha padera paro.

⁷ Ngouhwo usiku Mwari wakadzionisa kunaSoromoni, akati kwaari, “Kumbira icho chendingakupa.”

⁸ Soromoni wakati kunaMwari, “Iwewe wakaonisa nyasha dzakakura kunababa angu Dhavhidha, akandiita mambo pandau pake.

⁹ A Mambo Mwari, Mwari, ita kuti chigondiso chako kunaDhavhidha, baba angu chizadzisike; ngokuti wandiemesa kuti ndiite mambo padera pevanhu vakawanda kudai ngebukuta renyika.

¹⁰ Ndipe zvino ungwaru nokuzia, kuti ndikone kubuda nokupotera pamberi pevanhu ava; ngokuti ndiani ungakona kutonga ava vanhu vako vakawanda kudai?”

¹¹ Mwari wakapingura Soromoni echiti, “Ngokuti ichi chaiya chiri mumwoyo mwako, newe auzi kukumbira zviro zvakawanda, upfumi, kuremeredzwa, nokuti kufa kwemagaa ako, nokuti kupona kwako kuti kurebe; asi wakumbira ungwaru nokuzia pachako, kuti utonge vanhu vangu, vendakakuita mambo padera pavo,

¹² ungwaru nokuzia zvinozopuwa kwouri. Ndinozokupawo upfumi, zviro zvakawanda, nokuremeredzwa, izvo zvisikazi kumbopuwa kunamambo naumwe wakadaro wakatanga pamberi pako, nokuti unozoteera sure kwako unozopuwa zvakadaro.”

¹³ Ndizvo Soromoni wakabuda kubva kundau yakakwirira paGibheoni, kubva pamberi petende romushongano kuenda Jerusarema. Naye wakatonga padera paIsuraeri.

Simba raMambo Soromoni noUpfumi

¹⁴ Soromoni wakaunganidza pamwepo ngoro nemahachi; naye waiya nemazana gumi nemarongomuna (1,400) engoro, nemahachi gumi nemairi emakumi emazana (1,200), awo aakaisa mumadhorobha engoro, namambo muJerusarema.

¹⁵ Mambo wakaita sirivha nomukore kuti zviwande muJerusarema kudai ngemapuwe, nemiti yemisidhari wakaiita kuti iwande kudai ngemionde yaiya muShefera.

¹⁶ Soromoni waiya nemahachi akaunzwa kubva Egipite neKuei vatengesi vamambo vakaaashira kubva Kue ngomutengo wao.

¹⁷ Vakaunza kubva Egipite ngoro, vaitengesa ngezvigurwa zvesirivha mazana matanhatu (600), nehachi rakaunzwa kubveyo rakatengeswa ngezvigurwa zvesirivha zana nemakumi mashanu (150). Ndizvo kubudikidza ndivo izvi zvakaunzirwa madzimambo eshe evaHiti, nemadzimambo evaAramu.