2 Madzi. 8 - Bhaibheri Rakachena muChindau

Mudzimai Waibva Shunemu Unopetuka

¹ Zvino Erisha wakaereketa kunomudzimai waakamusira mukororo wake kubva mukufa echiti, “Miruka, uende nemhatso yako, woogara kunyazwi ngepari poungakona; ngokuti Mambo Mwari wakadaidza nzara, nayo inozouya panyika makore manomwe.”

² Ndizvo mudzimai wakamiruka, akaita kudai ngeizwi romunhu waMwari; wakaenda nevemhatso yake, vakagara munyika yevaFiristia makore manomwe.

³ Pakupera kwemakore manomwe, apo mudzimai paakapetuka kubva kunyika yevaFiristia, wakaenda kunamambo kookumbira kuti apuwe mhatso yake nomunda wake.

⁴ Zvino mambo waiereketa naGehazi muranda womunhu waMwari echiti, “Ndironzere, ndinokupota, zviro zvikuru zveshe zvaakaita Erisha.”

⁵ Naapo acharonzera mambo ngenjira yaakamusa ndiyo muiri womunhu wakafa, ringira, mudzimai waakamusira mukororo wake kubva mukufa, wakakumbira kunamambo kuti apuwe mhatso yake nemunda wake. Gehazi wakati, “A, makosi wangu mambo, ndiye mukadzi, nouyu ndiye mukororo wake, umwe wakamuswa kwevakafa ndiErisha.”

⁶ Naapo mambo abvunza mudzimai, ndizvo wakamuronzera. Ndizvo mambo wakamuemesera nduna huru echiti, “Mupetudzirei zveshe zvaiya zvake, pamwepo nazvo zveshe zvakakukurwa mumunda wake kubvira zuva raakasiya munda wake, metsa kuguma nyamashi.”

Erisha naMambo Bhenihadhadhi weAramu

⁷ Erisha wakaenda Dhamasekusi, apo Bhenihadhadhi mambo weAramu echirwara. Naapo aronzerwa kuti, “Munhu waMwari waguma muno,”

⁸ mambo wakati kunaHazaeri, “Tora chipo munyara yako, uende kooshongana nomunhu waMwari. Ubvunze kunaMambo Mwari kubudikidza ndiye wechiti, ‘Ndinozopona here iyi nhenda?’ ”

⁹ Ndizvo Hazaeri wakaenda kooshongana naye, akatora chipo kuenda nacho, cheizvo zveshe zvakanaka zveDhamasekusi, mitwaro inokwana makamera makumi marongomuna. Naapo apotera akaema pamberi paErisha, akati, “Mukororo wako, Bhenihadhadhi mambo weAramu, wandituma kuuya kwouri echiti, ‘Ndinozopona here kubva kuneiyi nhenda?’ ”

¹⁰ Erisha wakati kwaari, “Enda wechiti kwaari, ‘Ngegwinyiso unozopona hako,’ asi Mambo Mwari wandionisa kuti ngegwinyiso unozofa.”

¹¹ Erisha wakamuringisisa muhope mwake, metsa iye wakatsveruka. Zvino munhu waMwari wakachema.

¹² Hazaeri wakati, “Mambo wangu unochema ngenyi?” Wakapingura, “Ngokuti ndinozia kushata ukwo kwounozoitira vana vaIsuraeri; ngokuti unozopisha marukumbati avo ngomuriro, unozouraya majaha avo ngeshoti, nevana vavo unozovapwanyira pashi kuita zvigurwa, nevakadzi vavo vanemimba unozovatumbura.”

¹³ Hazaeri wakati, “Muranda wako chiinyi, imbwa hayo, kuti aite chiro chakakura kudai?” Erisha wakapingura akati, “Mambo Mwari wandionisa kuti iwewe unozoita mambo padera peAramu.”

¹⁴ Zvino wakamiruka kubva kunaErisha, akaenda kunamambo wake, uwo wakati kwaari, “Erisha watinyi kwouri?” Naye wakapingura akati, “Wandironzera kuti ngegwinyiso unozopona.”

¹⁵ Asi ngechimangwani wakatora jira rinoutindi, akarinyika mumvura, akambonya ndiro mambo muhope yake, metsa afa. Hazaeri wakatonga pandau yake.

Mambo Jehoramu weJudha

¹⁶ Ngegore rechishanu rokutonga kwaJoramu mukororo waAhabhi mambo waIsuraeri, Jehoramu mukororo waJehoshafati mambo waJudha wakaamba kutonga.

¹⁷ Waiya aane makore makumi matatu namairi apo paakatanga kutonga; wakatonga makore masere muJerusarema.

¹⁸ Wakahamba munjira dzemadzimambo aIsuraeri, kudai ngezvakaitwa ngevemhatso yaAhabhi, ngokuti mukadzi wake waiya mwanasikana waAhabhi. Wakaita zvakashata mukuona kwaMambo Mwari.

¹⁹ Asi Mambo Mwari waiya asikadi kuparadza Judha ngendaa yaDhavhidha muranda wake, kudai ngezvaakagondisa kwaari kuti unozomupa chibani kwaari nokune mibarirwana yake mhera nariini.

²⁰ Mumazuva ake vaEdhomu vakamukira Judha, vakadziitira mambo wavo.

²¹ Zvino Joramu wakaambuka kuenda Zairi, nengoro dzake dzeshe naye. Wakamiruka usiku, wakarwisa vaEdhomu nenduna dzengoro dzavo, avo vaiya vamutendenedza; asi vanhu vake vehondo vakatizira kumatende avo.

²² Ndizvo vaEdhomu vaimukira utongi hwaJudha metsa nanyamashi. Naapo vaRibhina vakavamukirawo ngouwo mukuwo.

²³ Zvino mishando imweni yaJoramu nazvo zveshe zvaakaita, azvizi kunyorwa here muBhuku reMishando yeZuva ngeZuva yeMadzimambo aJudha?

²⁴ Ndizvo Joramu wakaata nemadzibaba ake, naye wakaikwa navo mudhorobha raDhavhidha. Ahazia mukororo wake wakaita mambo pandau yake.

Mambo Ahazia waJudha

²⁵ Mugore regumi namairi rokutonga kwaJoramu mukororo waAhabhi, mambo waIsuraeri, Ahazia mukororo waJehoramu mambo waJudha wakaamba kutonga.

²⁶ Ahazia waiya nemakore makumi mairi namairi apo paakatanga kutonga; wakatonga gore rimwe muJerusarema. Zina ramai ake raizwi Atharia, muzukurusikana waOmuri mambo waIsuraeri.

²⁷ Wakahambawo ngenjira yemhatso yaAhabhi, wakaita zvakashata mukuona kwaMambo Mwari, kudai ngezvevakaita vemhatso yaAhabhi, ngokuti waiya mukwambo wevemhatso yaAhabhi.

²⁸ Wakaenda naJoramu mukororo waAhabhi koorwa hondo naHazaeri mambo weAramu muRamothigireadhi, apo vaAramu pevakaremadza Joramu.

²⁹ Mambo Joramu wakahwirira Jezireeri koorapwa maronda ake aakaremadzwa ngevaAramu muRama, panguva yaakarwa naHazaeri mambo weAramu. Ahazia mukororo waJehoramu mambo waJudha wakadzaka koona Joramu mukororo waAhabhi muJezireeri, ngokuti waiya echirwara.