2 Madzi. 7 - Bhaibheri Rakachena muChindau

¹ Asi Erisha wakati, “Izwai imwimwi izwi raMambo Mwari: unoronza izvi Mambo Mwari, ‘Mangwani ngouyu mukuwo chipimo choufu hwakamotseka chinozotengeswa ngechigurwa chimwe chesirivha, nezvipimo zviiri zvebhare zvinozotengeswa ngechigurwa chimwe chesirivha, pamusiwo weSamaria.’ ”

² Zvino nduna iyo yaitseamwa ndimambo panyara yayo yakapingura munhu waMwari yechiti, “Ringira, kunyazwi Mambo Mwari waizoita mafasitera mudenga, kungaitika chiro chakadaro here?” Asi Erisha wakati kwaari, “Ringira, unozozviona ngemadziso ako, asi auzozvidyi.”

Hondo yeVaSiria Inoenda

³ Zvino kwaiyapo vanhu varongomuna vaiya nemapere ngokubanze kwomusiwo wedhorobha, avo vakati umwe kunoumweni, “Tinogarirenyi pano metsa kufa?

⁴ Kudai techiti, ‘Ngatipinde mudhorobha,’ nzara irimwo mudhorobha, nesu tinozofamwo; asi tikanyandogara pano, tinozofawo. Ndizvo zvino, uyai, ngatipotere mukamba yevaAramu; kuti vasatiuraya, tinozopona, asi kuti vatiuraya, tinozofa.”

⁵ Ndizvo vakamiruka kwooita mambakwedza, kuenda mukamba yevaAramu; asi apo vaguma kumugano wekamba yevaAramu, ringira, mwaiya musina vanhu.

⁶ Ngokuti Mambo Mwari waiya akaita kuti hondo yevaAramu izwe bope rengoro neremahachi, nebope rehondo huru; kwakaita kuti vakaereketa umwe kunoumweni vechiti, “Wonai, mambo waIsuraeri watora madzimambo evaHiti, nemadzimambo evaEgipite, kuti varwe nesu.”

⁷ Ndizvo vakamiruka, vakatiza apo kwooita mambakwedza, vakasiya matende avo, mahachi avo, zvimbongoro zvavo, kamba yakandosara kudai ngezveyaiya yakandodaro, vakatiza kuti vadziponese.

⁸ Naapo ava vanhu vaiya nemapere vaguma kumagumo ekamba, vakapotera mutende, vakadya nokumwa, vakatoramwo sirivha, mukore nezvokufuka, navo vakaenda koozvifisha. Zvino vakapetuka, vakapinda mutende rimweni, vakatorazve kubvamwo zviro zvimweni, vakaendazve koozvifisha.

⁹ Zvino vakati umwe kunoumweni, “Zvetinoita zvakashata. Iri izuva remashoko akanaka; kudai isusu tikanyarara, techigarira metsa kujeka kwemambakwedza, tinozooneka tinendaa; ndizvo zvino, uyai, kuti tiende tironzere vemhatso yamambo.”

¹⁰ Ndizvo vakaenda, vakaronzera varindi vomusiwo wedhorobha, vakavaronzera vechiti, “Takaguma kukamba yevaAramu, asi atizi kuonamwo munhu, nokuti izwi romunhu, musina chiro asi mahachi akasungwa, zvimbongoro zvakasungwa, nematende akandodai ngezvakandodaro.”

¹¹ Zvino varindi vomusiwo vakazvidaidzira; vakaronzera kunevemhatso yamambo.

¹² Mambo wakamiruka usiku, akati kunevaranda vake, “Zvino ndinomuronzera izvo zvetaitirwa ngevaAramu. Vanozia kuti tinenzara; ndizvo vamiruka kubva mukamba, vaenda koodzifisha murubaya vechiti, ‘Naapo vobuda kubva mudhorobha, tinozovabata vechizwa, topinda mudhorobha.’ ”

¹³ Umwe wevaranda vake wakapingura, akati, “Tendera vanhu vamweni vatore mahachi mashanu, eawo akasara mudhorobha, ngokuti avo vakasara vanozotambudzikira mbungano yeshe yaIsuraeri, iyo yaparadzwa; ngatitume tione.”

¹⁴ Ndizvo vakatora vanhu vairi, ngoro mbiri nemahachi; namambo wakavatuma kuteera hondo yevaAramu echiti, “Endai, muone.”

¹⁵ Ndizvo vakavateera metsa paJorodhani; ringira, njira yeshe yaiya yakazara ngezvokufuka nezvidziyo, zvevaiya vechirasha vaAramu mukutiza kwavo. Ndizvo nhumwa dzakapetuka sure, dzikaronzera mambo.

¹⁶ Zvino vanhu vakabuda, vakachakata matende evaAramu. Ndizvo chipimo choufu hwakamotseka chakatengeswa ngechigurwa chimwe chesirivha, nezvipimo zviiri zvebhare chigurwa chimwe chesirivha, kudai ngezverakaronza izwi raMambo Mwari.

¹⁷ Zvino mambo wakaemesa nduna iyo yaaitseama panyara yayo kuti irinde musiwo; vanhu vakamutsikatsika pamusiwo, akafa, kudai ngezvaakaronza munhu waMwari, apo mambo paakadzaka kwaari.

¹⁸ Ngokuti apo munhu waMwari paakaereketa kunamambo echiti, “Zvipimo zviiri zvebhare zvinozotengwa ngechigurwa chimwe chesirivha, nechipimo choufu hwakamotseka chinozotengwa ngechigurwa chimwe chesirivha, zvinozoitika kudaro pooda kuita mukuwo wakadai mangwani pamusiwo weSamaria.”

¹⁹ Nduna huru yakapingura munhu waMwari yechiti, “Kunyazwi kudai Mambo Mwari aizoita mafasitera mudenga, kungaitika chiro chakadaro here?” Naye wakapingura akati, “Ringira, unozozviona ngemadziso ako, asi auzozvidyi?”

²⁰ Ndizvo ngegwinyiso zvakaitika kudaro kwaari; vanhu vakamutsikatsika pashi, akafa pamusiwo.